Exodo 17
17
Saajiajiniji mohuaca pacaretasacari
1Puetunu supuetana Israelcuajinio caneno pueyajanaari Sin jiyanishano cariiquia jiyajiniji quiojoquiaari. Naa jacaria quenaacotuquiaari nojori jiyajiniaranoori taa Pueyaso puetaquiaari nojoricuajani. Naa pueyaracaanu nojori rucuanenu nuhuajitij, Refidim jiyanishanojinia tiuquiijioseeriuhua. Mohuaca jiyaquiiri quiriquiaa. ¿Pueyatucua casaa shipiniri na ratusocoriquianoni? Shaaqui. 2Naacuatej, pueyari Moiseescua niquiaari. Naa na riushujiutiatureeri:
—¡Mohuaca canaa quia raatojore!
Moiseesri saniniuujia naa cuno pojori riucuareequij:
—¿Casaara naa nia mosecoya mohuaca nia masenura janiyacuaani? ¿Niaateeri Pueyaso rerequeteyaruhua, taa soj?
3Pueyari seetanujuanaa jiyacari jiyamuecoriquiaa. Cunora Moisees riushujiutiatureeri. Naa na sequetuquiaariiri:
—¿Casaara canaa quia mashiquiquianu Egipto jiyajinijicuaraarani, canaa quia cusojuanuusocoriquiano canaa niquiohuataja, puetunu canaa seyajaajanio? ¿Naatejaaratej?
4Jiyacaritij, Moiseesri Pueyaso secojoree. Naa na sequereeri:
—¿Taa cua miyacuaa nio pueyani, Pueyasonaa? Socua cua jacutunutaniya saitiaari. Janiyari cusotashuyareecujua.
5Pueyasoori naa riucuaree Moiseestej:
—Noojiaqueya pueyajinijinio jiyaniijianucuara cuaara quia cojiiria saajiaacua nojori quia puetasacari. Majaari quia nataca cartenu. Quiocua na cacareja, teyonuta quia piquianu Nilo moocuajani nanacara na jatanura. ¡Ritiatej, tarishiyarohuacuaraate! 6Janiyari Horeb tuhuananuucua quia sashiyani, puereetuuca saajiaacua. Quiaa jaara cuno saajia piri quia natacata, mohuacaari pueya ratusocoriquiano shoonutaniya tiji.
Moiseesri naa miiquiaari Israel pueya jiyaniijianucua niquiara, taa Pueyaso sequequiaari na miiniuriacuajani. 7Naacuatej, pueya riushujiutianuucua nojuaja, Moiseesri nojori quishaqui jiyaniquirii Meriba. Masata na sesojoquiaarijaariuhuaj, cuno pojori taacanuunuucua Pueyasoocuaji. Pueyari naa sequetujua Pueyasoocuaji na taacanuutuucuatej. “¿Pueyasotee niya pata quiyajaarani?”
Currently Selected:
Exodo 17: arl
Highlight
Share
Copy
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.
