Geenesis 22
22
Pueyaso sanishacari Abraham
1Pasanaataja na nuhuaji, Pueyasoori Abraham saniquiaari na niishiniuria majatee Pueyaso sequesano na cuaracashitiniu quiquiaani. Cunora naa na jiyaniquiriiri:
—Abrahamnaa.
Na riucuareeri:
—¿Casaateni?
2Pueyasoori naa na sequeree:
—Quia niyanu Isaac, cuno niquiriyatu jiyanohua quia panishano quia mueyaniyojuani, nojuaja quia jiyataare Moriah jiyajinia. Quiaa jaara cuno jiyajinia tiuquishii, janiyajanaari tuhuananu quia niquitiniutianiyani. Quiocua cuno tuhuananuucua mosee quia niyanu. Quiaari tii quiria na catijiareequinioj.
3Naacuatej Abrahamri jiyanohua tariquiicuaji sanequiaari. Na burro nijinia niataree cajitiuuri tii na cajijiara. Mojoquiiriijaariuhuaj Pueyasoocuara na catijiatajara neyanu. Abrahamri neyanu jiyataquiaari querajaa nera poonijionaa na seyajaajanio. 4Tres juuca nojori rucuanenu nuhuaji, Abrahamri tucuacaanuji niquirii Pueyaso sequesano tuhuananu. 5Jiyacari cuno querajaa na seru sequereeri:
—Niyaja cucuaji nia jiitiarecuaa cua burro. Janiyari quiyanuniyojuata quianutaniya niiquiji socua nia tacojini. Canaa cuaara catijiasee Pueyasoocuara na panishanojaatijiaj canaa maniniuhuaqueetanura nojuaja, canaacua tacatemohuaniuhuaj.
6Abrahamri mojoco jiunioconucua paree. Neyanu Isaac numueecuaji na niareeri. Nojuajaari cushiishi ririiquiujia manijaajanio. Neyanuta canujuucuatiuyareeri. 7Pasanaataja na nuhuaji, Isaacri na que Abraham sequeree:
—¡Cua quenaa!
Na queeri na riucuaree:
—¿Casaate sanaa? Neyanuuri na sequeree:
—Paari mojocoracani, manijaajanio. ¿Teeteeri Pueyasora pa catijiasocoriquiano borreeconijia?
8Abrahamri neyanu riucuaree:
—Pueyasocuaja pa niquitionutaniya nera pa catijiasocoriquiano borreco, sanaaj.
Nojoriiri mariyataa pacutaareecuhuaj. 9Nojori jaara tiuquishiiquiaari Pueyaso sequesano tuhuananuucua, tii jiyojetaseeri. Abrahamri sai paatirii na caco na catijiajara neyanu. Mojoco tanutetaree na cacojaariuhuaj. Naa na miiniu nuhuajitij, neyanu morojoreeri. Saitia na juhuacu mojoco caco neyanu moronucua niatareeri. 10-11Neyanu na jiriatajara nocuara na rishacari cushiishi juucua, jiyacaritij Pueyasoori jiya cajiniocuaji naa nocua nacaree:
—¡Abrahamnaa! ¡Abrahamnaa!
Pueyaso riucuareeri:
—¿Casaatenij? ¡Niyacuajanijia!
12Pueyasoori na sequeree:
—Tuma taa mii mueyatej. Quiarijianij, shusha quia niataree cutaranijia. Quiaaquiiri seetanujuanaa cua puereja. Majaari quenaaja quia ruuretanu quirii janiya jiyacunujuanaa quia niyanu monu, quiria quia catijiasocoriquiano.
13Jiyacarijiatej, Abrahamri borreeco niquirii naanacucuajinia cushiriquitiano na nacajajiniji. Abrahamri nocua canujiyaree. Borreeco quiaseeri. Cuno borreeco moree neyanu nitiiri. Pueyasora na catijiareeri. 14Na nuhuaji, Abrahamri naa jiyaniquiquiaari cuno tuhuananutej: “Pueyasoori pa panishano niquitiojua.” Naacuatej, pueyari quiarijiaja naa jiyaniquiyajaa: “Noo tuhuananuucua Pueyasoori pa juuretasano niquitiojua.”
15Jiya cajiniocuaji, Pueyasoori naa pacutequiaari Abraham sequenutej:
16—Janiyari naa sequeyaquij Abrahamnaaj: Quia tojiniuucua cua sequesano, tojetaarucuajanaa quia ruuretaaquiniuucua niquiriyatu quia niyanuniyojua quiria na monuni, janiyari saniniuujia quiarijia seetanujuanaa quia sequeyacujua. 17Janiyari jiyanohua maninia miiniutianiya quiajaniyanijia. Naacuatej, janiyari quiocuajinio caneno pueya canijianutaniya jiyanohua saniniuunijia. Nojoriiri juhua jiya cajiniocua riya quiriquiano, juhua shoniniacu caminia shuriuquioco paaquiojua jaaquia quiriquianojaariuhuaj, serojosootej. Naajuhuaj, nojoriiri tojetaarucuajanaa na paraa shocotasoo quiriquiano, nujuatasoojuhuaj. 18Naajuhuaj, janiyari puetunu mijiria quijiaca pueyapue miiriquiano maninia quiocuajinio caneno pueya seerani cua sequesano tojijia quia quiniuucua.
19Cuno nuhuaji, Abrahamri neyanuta na poonijonaa na pueyacua tacateyarohua, tee nojori na tiujiamaquiaaricuajani. Na nuhuaji, nojoriiri mariyataa tacatequiaariuhua cuniquiji Beerseba jiyanishano tiacajiniohua. Abrahamri cuno tiacajinia jiyojequiaari tii na quiniuria.
Currently Selected:
Geenesis 22: arl
Highlight
Share
Copy
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.
