Geenesis 27
27
Jacobjiniji pohuatasano
1Tari Isaac quishacari jiyanohua saaquiano, nojuajaari cariyojuarura quiquiaari. Nojuajaari tamonu juuca na jiyapueranu Esauu piiquiaari. Naa na sequereeri:
—¡Quiyanunaa!
Esauuri na que riucuaree:
—¿Casaate cua quenaa?
2Na queeri na sequeree:
—Quiyanunaa, quiaacuajaari cua niquiya. Tojetaarucuajanaa tari puera saaquianonijia. ¿Casaate cua toyani? Janiya naasucuaari canashiyaquiji nimishiriquianoni. 3Sanajanaa, cua nuhuajiria miaquenu paniya quia cuanitiananunijia. Naacuatej, janiyari paniyani quiarijia quia quianura cuanitianuucua. Quia cashanata quia jiacoo casaa cua miaquesocoriquiano. 4Quiaa jaara casaa mocoo sanaa, quiocua maninia na sumatusuhuanoj taa cua maniniucuaquiaacuajani. Quiocua tariucua sumatuu quiria patare miji. Janiyacua na miaquetareni. Cua miaquenu nuhuaji, cua shaajeyaquishacarijia, janiyacua maninia rupaajinia quia sequereni Pueyaso miiniuria maninia quiajaniya.
5Puetunu naa Isaac sequesacari na jiyapueranutej, necocua Rebecaari na tojiriquiaa. Naacuatej, Esauu jaara quiaquiaari cuanitianuucua na quera, 6jiyacaritij Rebecaari naa neyanu Jacob sequereecujua:
—Sanajanaa, niya tojirii quia quenijia. Naa quia tarajanu Esauu sequereeri: 7“Quiyanunaa, quiarijia quiria quia cuanitiacoo. Quiocua quia cuanitiananu sumatusuhua quiria. Janiyacua na miaquereni. Naa cua miaquenu nuhuajitij, janiyacua quiocua niarohua cua juaashiquiani maninia rupaajinia cua sequesacari quiajaniya Pueyaso miiniuria maninia quiajaniya.” 8Naacuatej quiyanunaa, cua sequesano quia tojiri: 9Quiarijiaja ritia quia neteyare pa seyacua. Quiria miji quia quioocoo querajaa cabra macujuashi. Quia quera na sumatureera maninia taa na maniucuaquiaa miaquenucuajani. 10Jaara tariucua sumatusano quiri, quiocua nocua na pataare na miaquetenuucua. Na miaquenu nuhuaji, nojuajaari quiocua nianutaniya na juaashiquia maninia rupaajinia na sequenura quiajaniya Pueyaso miiniuria maninia quiajaniya na shaajeyaquishacarijia.
11Jacobri na nucua sequeree:
—Cua nucuanaa, cua tarajanuuri cutara jiyanohua cajacaraca. ¿Janiyateeri naa cajacaracaajataj? 12Cua nucuanaa, ¿janiyatucua taa miiricuaani cua que jaara quiaquere cua cuaqueya na niishiniuria janiya? ¿Janiyatucua taa miirini nojuaja jaara niishiri janiyari neyanu Jacobni? Cua que jaara niishiri janiyari Jacobni, nojuajaari cua sequenutaniya janiyari na rerequeteyani. Naacuatej, cua queeri cua sesacanutaniyani. Majaari tari maninia rupaajinia na sequenu quiniutianiya Pueyaso miiniuria maninia janiya.
13Na nucuaari naa Jacob riucuareequij:
—Quiyanunaa, maja puerenu. Naajaa, quia que cuaara cua sesacaara quia nitiqui. Janiya cutaraari quia sequeyani, ritia cua sequesano quia miirijiaj. Ritia miji quia quioocoo cua sequesano querajaa cabra macujuashi.
14Jacobri na nucuara netecoo ritia cabra macujuashiyacua. Na nucua na niquitiosuhuari. Na nucuaari saniniuujia na sumatureecujua. Maninia na sumatureeri juhua neyaca Isaac maniniucuasanojua. 15Esauu toque maniniuquiiri na nucua shuriucua racatasano quijia tiaco. Rebecajanaari cuno toque puerooree neyanu Jacob na cushitishocoriquiano. 16Na nuhuaji, na puecoosano cabra macujuashiya shoqueta Jacob numatucua mishiquiojoreeri, puetunu na riquiajanaanio tee cajacaaju quijiatucuaja Jacobni. 17Naa na jeenucaanu nuhuaji neyanu Jacobtej, na sumatusano casaa na niquitioreeri na majeetejosano panjaajanio.
18Jacobri saniniuujia na queecua na tiuquitiaqueecujua. Na que sequeseeri:
—¡Cua quenaa!
Na queeri na riucuaree:
Niyacuajanijia. ¿Cantequia sanaa?
19Jacobri na que riucuaree:
—Janiyacuaja quia jiyapueranu Esauuni, cua quenaa. Tari quia panishano miirii quiaranijia, cua quenaa. Quia sanere. Maninia quia cajiri, cua quenaa. Quiocua cua cuanitiananu miaquere. Quia miaquenu nuhuaji quiocua cucua niarohua quia juaashiquia, maninia rupaajinia quia sequenura janiya.
20Isaacri na nequesotaree:
—¿Quiaateeri namitia ritia cuanitiacooruhua quiyanunaa?
Jacobri na que riucuaree:
—Jiyocuacaanu quijia quia Pueyasocuajaari cua niquitioreeno, cua quenaa.
21Na queeri Jacob sequereecujua:
—Miji cucua quia cateconure. Quia quiaquereera cua niishiniuria quiaate seetanujuanaa quiyanu Esauuni.
22Jacobri na queecua cateconuree na que quiaquenura nojuaja. Isaacri naa sequeree:
—Quia pocuanuuri juhua Jacob pocuanujua. Quia numatucua cutaraari quiyanu Esauu numatucua.
23Naacuatej Isaacri maja na niishiniu quiriquiaa Jacobri na sapojoriquiaa. Na numatucuacuajaari seetanujuanaa juhua Esauu numatucua quiriquiaa cajatuneca. Isaac sequeyaquishacarijia neyanu maninia rupaajinia, 24nojuajaari naa Jacob nequesotarohuariuhuaj:
—¿Quiaateeri seetanujuanaa quiyanu Esauujaarani?
Jacobri na que riucuaree:
—Taaquiriirini, cua quenaa, janiyacuaaquiniateja Esauunijiaj.
25Naacuatej, na queeri na sequeree:
—Quiria quia taquiriqui quia cuanitiananujiniji quia sumatusano. Janiyacua miaquenu nuhuaji maninia rupaajinia sequerohua quiajaniyani.
Jacobri na que mianuuteree. Vino pataree nerajaariuhuaj. Saaquiano Isaacri juhuajaniya miaqueree, ratureejaariuhuaj. 26Na nuhuaji neyanu Jacob sequerohuari:
—Miji cucua quia cateconure. Cua nujuure, quiyanunaa.
27Jacob cateconusacari na queecua, na que na nujuunura, Isaacri neyanu quiaree. Na toque nujuunequereeri. Naa na miiniu nuhuajitij, naa maninia rupaajinia na sequeree neyanuucua na juaashiquia na niasacariiri:
—Seetanujuanaa, quiyanu Esauu naaqui naata nujuureenijia; juhua cuhuariquiajinia Pueyaso moritianishano nataacuaca shuucuacaja. 28Pueyaso cuaara quia nataacuacaacua nitiiria maru, maninia quia nataacuaca moritianura. Naacuatej, quiaari jiyanohua queraatia paatijioriquiano quia nataacuacajiniji quia carojotasano: queraatia trigo, queraatia uva caacanio. 29Jiyanohua queraatia pueya cuaara quiara poonijionaa quiiria. Puetunu nio jiyajinijinio pueyajanaa cuaara quiocuara mojoquetacoora, juhua nojori camarnu quia quiniuucua. Tama quia tapueyocuaca camarnujaaja quia quiri nojori quia tojitiniuria quia cumaaca. Nojori cuaara quiocuara mojoquetacoora quia tojijiaca nojori quiniuucua. Naajuhuaj, cante quiocuajinio caneno pueya quejaa sesacanuni, nojuajaari saniya sesacasaariquiano. Saniniuujia, canapuetej maninia rupaajinia quiocuajinio caneno pueya maniniuhuaqueetajacani, nojoriiri maninia miishaariquianojuhuaj.
30Naa Isaac sequenu nuhuaji maninia rupaajinia neyanu Jacobtej, Jacobri na que shuriucuaji tohuatacuhua. Esauuri jiyacari shusha na cuanitiananu tiuquitiariquiohua. 31Esauuri na quera sumatusuhua na cuanitiananujuhuaj. Naa na sumatunu nuhuaji na queratej, na queecua na pataareeri. Naa na sequeseeri:
—Cua quenaa, quia sanere. Cua cuanitiananu quia miaquere. Quiocua na nuhuaji maninia rupaajinia cua sequerohua quia jiyapueranu cua quiniuucua.
32Isaacri neyanu Esauu nequesotaree:
—¿Canteeri quiajaniyanijia?
Naa na riucuareeri:
—Janiyacuajaruhua quia jiyapueranu Esauuni.
33Isaacri jiyanohua shiriiquirii. Jiyanohua na tetecanuta naa sequereeri:
—¿Canteeri na cuanitiananujiniji tari cua miaquetequiinitioj? Quia tiuquiyaquishacarijia, janiyari quiria na patasano sumatuu miaqueree puetunujuanaani. Janiyari tari maninia rupaajinia na sequereeni. Nojuajaari naacua quiarijia nera Pueyaso cua masesano jiitiaa.
34Naa na que sequesano Esauu tojishacaritij, jiyanohua nujuquereeri. Na nujuquenuta naa nacaree na queecuaari:
—¡Cua quenaa, maninia rupaajinia cua sequerejuhuaj Pueyaso miiniuria maninia janiya!
35Isaacri neyanu Esauu riucuaree naatej:
—Quia tarajanuqui cua sapojoqueeni. Quiarano cua riuriotaca riutiocoqueeno tari quiocuaji.
36Esauuri naa sequereequij:
—Seetanujuanaaquiiri. Nojuajaari riutiocojojuajuhuanajaj. Naacua jiyaniquishaaquiaariquiiri “Jacob.” Nojuajaari tari cua pacutejiya naa sacuaraatia miiniutij. Nojuajaari coteenu cua jaariutiacanu quiriano quia jiitiasano quia jiyapueranu cua quiniuucua. Quiarijia socua pacuterohuariuhuaj. Quiriano rupaa maniniu quia jiitiasano riutiocorohuariuhuaj. ¿Cua quenaa, majateeri tamonu casaa quiriano quia sequesocoriquiano rupaa maniniu cureenujua?
37Isaacri neyanu Esauu riucuaree:
—Cua tojiri quiyanunaa. Janiyari tari cumaaca niquitioree quia tarajanu Jacobni. Nojuajanaari na cumaaca quia tojitiriquiano. Jiya tarajanujuanaa, puetunu na muetusanojanaari nera poonijionaa quiriquiano. Janiyari maninia rupaajinia na sequereejaniuhuaj. Naacuatej, nojuajaari na carajotasano trigo paatijioriquiano jiyanohua queraatiatej. Na natasano uvaari jiyanohua queraatia mueturiquianojuhuaj. Naacuatej, nojuajaari na caacara na rapijiosano cajitijiotariquiano jiyanohua queraatiatej. ¿Quiarijiaariuhuaj quiyanunaa, casaa cua miya quiaraarinijia?
38Esauuri na que shiniujiurii. Naa na sequereeri:
—Cua quenaa, quiaateeri puera na puecaree niquiriyatuucuacuaa. Cureeree jiyoteeri. ¡Pueyaso niquiara maninia rupaajinia cua sequerejuhuaj!
Esauuri nujuquenu pacuterohuacuhua. Jiyanohua sariyocuariquiaari.
39Na queeri jiyacari naa na sequereequij:
—Quiaari tucuacaanu quiriquiano jiya maniniujiniji. Maruqueyari maja quenaaja quiocua niyojoriquiano tojetaarucuajanaa quia nataacuaca na piquiojonura quenaaja. 40Tama quiajaniyajaarijia quia paraa nujuatariquiano quia nijiniaquetucuaja mueruuta. Quiaari quia tarajanu seru quiriquiano. Tama quia cumamacaashacarijiaaja, quiaari naacua tama rupateriquianojaaja quia tarajanujiniji. Quiocuajinio caneno pueyari naa miijiosaariquianotej.
Jacob mashishacari Esauucuaji
41Naa Jacob riutioconuucua tarajanuucuaji na que na niatenu na que juaashiquia nocua, maninia rupaajinia na que sequenura nojuajatej, Esauuri naacua maja na niquiniu paniniu quijia na juaaniutia tarajanu Jacob. Esauuri naa niishiriojojua noojiajinia: “Cua quecuaja namitia quera shaajeya. Janiyacua cua que shaajenu nuhuaji cua tarajanu Jacob moreni.”
42Rebeca jaara niishiquiaari Esauuri monu niishiriojoriquiaa tarajanu, Jacob numootequiaariiri. Naa na sequereeri:
—Cua tojiri, quia tarajanu Esauuri quia monutaniya. 43Naacuatej, quiyanunaa, niiquiji ritia quia mashiri Haraan tiacajinia. Quiocua cua nanu Labaan tiajinia quishii. 44Quiocua tii quishii quia tarajanu juaaniu cuaara tajiyateerajaatijia. 45Nojuaja cuaara quia miishano niyajetaarajuhuaj. Janiyacua na nuhuaji quia numooteriquiani tiajinia quia tacatenuhuara cucua. Maja cutaraari cua mueejutenu paniniu niquiriyatu juucajiniaja quia mona namishaanuucua quiocua.
46Na nuhuaji Rebecaari naa sequequiaari neyaca Isaactej:
—Janiyari nio Hitita taatujuri taajeree tarini, Esauu camiyosano necocohuaranoni. Jacob jaara nio Canaan jiyajinijinio Hitita taatu camirijuhuaj, socua maninia juhuari cua shaajenura.
Currently Selected:
Geenesis 27: arl
Highlight
Share
Copy
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.
