Geenesis 28
28
1Jiyacaritij Isaacri neyanu Jacob piiquiaari na nacasusocoriquiano. Coteenu maninia rupaajinia neyanu sequereeri. Naa na sequereejaariuhuaj:
—Majaari nio Canaan jiyajinijinio taatu caminiu. 2Quia jiyaso Betuel quijia Padaan-aram jiyajinia quia quiaare cutara. Quiocua quia cama Labaan niyatu tarajanu camishii tii cutara. 3Puetunu cumaacaraca quijia Pueyasojuanaa cuaara maninia miiria quiajaniya. Nojuaja cuaara canijiaara jiyanohua queraatia quiocuajinio caneno pueya. Naacuatej, quiaari jiyanohua queraatia jiyacajinia quijia pueyapue supuetana quiriquiano. 4Pueyasojuanaa cuaara naa maninia miiria quiajaniyatej, quiocuajinio caneno pueyapuejaajanio. Pueyasojuanaacuajaari naa maninia rupaajinia sequequiaari cua shipinio Abrahamtej. Naacuatej, quia niquiohuacuajinio caneno pueyapueeri nio pa quijia jiya camaruhua quiriquiano tee pa quiya juhua tamonu jiyajinijinio rucoojojuacacuajani.
5Saaquiano Isaacri naa Padaan-aram jiyajinia jiyaroquiaari neyanu Jacobtej. Jacobri naacua tiuquishiiquiaari na cama Labaan tiajiniatej. Labaanri Betuel niyanu. Nojoriiri Arameo pueyata jiyaniquishano quijia. Labaancuajaari Rebeca nanu. Rebeca saniniuujia, nojuajaari Jacob, Esauu nucuacuaja.
Esauu camishacari Ismael niyatu
6Isaac niasacari na juaashiquia Jacobcua maninia rupaajinia na sequenura neyanu, Esauuquiiri na que niquiriquiaa naa miyanotej. Na que tojiriijaariuhuaj tarajanu sequeyano Padaan-aram tiacajinijinio maaji na caminiuria tiijiuhuaj, maja na caminiuria cutara Canaan jiyajinijinio taatu. 7Niquiriijaariuhuaj Jacobri Padaan-aram tiacajinia quiaquiaari taa na que na nucua rootaquiaari nojuacuajani. 8Esauuri naacua niishiquiaari na quequiiri seetanujuanaa maja na maniniucuanu quiriquiaa cuno Canaan jiyajinijinio taatujuri. 9Esauuri naacua na cama Ismaelcua quiaquiaari. Ismaelcuajaari Abraham niyanujuhuaj. Esauuri na que parajanu niyatu Mahalat riquiaari necocuara. Mahalatri Nebaiot rimiatu. Nojoricuajaari Ismael niquiohua quijia. Esauuri naacua riquiaari socua maajitij, juucua Canaan jiyajinijinio na camiyosano taatujuri jiitiaja juucuacuajaari.
Pueyaso muetasacari Jacobcua Beteljinia
10Jacobri Beerseba tiacajiniji quiaquiaari. Haraan tiacajiniara neteja nucoco quiamaari. 11Nucocojua na quiasacari ninimiaquiaariiri. Naacuatej narejashiquijia cunoco pojoseequiaariiri. Juhua na nacaacuaji matajara niaquiaari saajiaari nocua na maquejara. Naa maquequiaariiri. 12Naa na maquesacari cuno niucua tiitij, nojuajaari naa maquiyojoree cuno niucua: Tacatu niquiriquiaa jiyocuaji nujuataanoori. Jiya cajiniocua taretariquiaari. Pueyaso seyari camiji rosetariquiaa, tamasacaari saniniuujia tacatariquiohuacujua. 13Jacobri jiyacari Pueyasojuanaa niquirii na shuriucua nujuaanojuhuaj. Naa na sequequiaari:
—Janiyajanaacuajaari Camarnujuanaani. Quia jiyaso Abraham Pueyasotuhuaj, quia que Isaac Pueyasonio. Naacuatej, quiajaniya, quiocuajinio caneno pueyajaajanio, janiyari puetunu nio jiyajanaa nia niquitioriquianoni, nio jiya quiaa tii pojiyani. 14Quiocuajinio caneno pueyari jiyanohua caneriquiano, juhua jiyojuaja serojosoo. Nojori canesacari, nojoriiri nio jiyajinia paaqueriquiano. Nojoriiri naa niyaquejoriquiano pananu tiuquishacora, pananu muetasamajinio; naajuhuaj, pananu muetasamaji miaquetajara, na muenecaranio. Puetunu mijiria quijiaca pueyajanaari quiataja cojiritiasaariquiano maninia miiniu quia seera, quiocuajinio caneno pueya seerajaajanio. 15Janiyacuajaari quiata quiyani. Tiquiyocua quia quiasacari, janiyacuajaari quia cojuariquianoni. Janiyari nio jiyajiniohua quia tacatoriquianohuaniuhuaj. Majaari cua cartenu quiniutianiya quiajaniya janiya cuaara quiara tohuatere seetanujuanaa cua sequesano quiajaniyajaatijiaj.
16Jacob jaara niucuaquiaariuhua naa na maquiyojonu nuhuajitij, naa tama noojiajiniajaaja niishiriojoriquiaari: “Pueyasoqui seetanujuanaa niya quiya janiya tii maqueyani. Majaari cua niishiniu quiriquiaaquinioj.”
17Jiyacaritij, Jacobri jiyanohua puereree. Na puerenuta naa niishiriojoreeri: “Niya cua maquesaquiquiiri tojetaarucuajanaa puereeta maniniushiqui juhua Pueyaso quishaquijia. Majaari sesa miijia quijiara. ¡Niyaquiiri Pueyaso quiquiojuhuanajaj, jiya cajiniocua tiuquitiaja tiootiujuhuaj!”
18Jaara juhuaquequiaari, Jacobri jiyanohua tariquiicuaji sanequiaari. Na nacaacuaji na maquejara na niasano saajia nujuateree Pueyasoraari. Naa na miiniu nuhuajitij, cuno saajiaacua totarohua shiyocuaari. 19Tariucuacaanu cuniquini, tii quijiaari tiaca. Na sesaari naa quijiatej, “Luz.” Jacobri saniniuujia na jiyaniquiquiaari “Betel.” Nio sequeya “Pueyaso tia.”
20Cuniquijiani, Jacobri naa sequequiaari seetanujuanaa Pueyasotej:
—Pueyasonaa, quiaa jaara quiarijia cua cojiyare quia cojuanura janiya tee cua quiaacuajani, naajuhuaj, quiaa jaara cua niquitiore cua miaquesocoriquiano, cua cushishocoriquianojuhuaj, janiyari quia timitianutaniyani. 21Naajuhuaj, janiya jaara cua quiniutiaja cami tacatemohua cua que quiquiojiniohuarani, janiyari seetanujuanaa cua Camarnura quia jiyatenutaniyani, Pueyasonaa. 22Nio saajia niya cua nujuatesano juhua moriujiuni, nioori juhua quia tiaranojua, Pueyasonaa. Naacuatej, quiaa jaara cua niquitiore queraatia casaa, janiyari puetunu cuno cien casaajinijinio quia niquitioriquiano diez casaani.
Secaja pohuatasano
(Geen 29.1–32.6)
[Jacobri Haraan tiacajinia tiuquiquiaari. Labaan tiajinia quishiiri. Cuno Labaan jiyanishano pueyanoori Abraham tarajanu jianianu quijia. Querajaa niquiojoririaca quijiaari: Liia, Raqueljuhuaj. Jacobri coteenu Liia camiquiaari. Na nuhuaji Raquel camiquiaarijaariuhuaj. Jacobri na camara poonijioquiaari catorce marijiaa. Nojuajaari naa poonijioquiaari na camaratej, na cama niquitiojonuucua Liia, Raquelnio necocuarano. Na nuhuaji Pueyasoori Jacob numootequiaari na cama na cartenura, tama na jiyajiniohua na quianuhuara. Quera Jacob tiuquitiasacari na pueya, na seya, Edom jiyajinia, nojuajaari noojiaqueya na pueyajinijinio puetaniquiaari nojori tonura tarajanu Esauu nojuajiniji. Na jiyaramiquishano seya jaara tari numootequiaari Esauu, na nuhuaji nojoriiri Jacobcua riujiuuquiaariuhua. Nojoriiri Jacob numooteree Esauujiniji. Nojoriiri naa Jacob sequeree: “Quia tarajanu Esauuri quia naacunuucua niya cuatrociento na pueyata.”]
Currently Selected:
Geenesis 28: arl
Highlight
Share
Copy
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.
