Geenesis 42
42
Josee tapueyocuaca quiojosacari Egipto jiyajinia
1Jiyacarijuhuaj, saaquiano Jacobri pohuatasaaquiaari Egipto jiyajinia quiyaquinia trigo. Naacuatej, naa necohua sequequiaariiri:
—Niaari niyaja macuhuajetacoya nia miaajaa. ¿Majateeri nia miaajaara nia tacaaquionuni? 2Egipto jiyajinia quiyaquinia trigo cumaneecata masesocoriquiano. Nocua nia quiojoreja, puera nia maserecuaaja. Pocua quenaaja cuno rishitiareniyojuanijia.
3Jiyacaritij, diez Josee tapueyocuacaari Egiptojinia quiojoquiaari trigo masenuucua. 4Jacob saniniuujia, nojuajaari maja na shanacunu quiquiaari Benjamiin quianura tapueyocuacata. Benjamiincuajaari jiyareta Josee tarajanujuanaa quijia cutara. Jacobri maja na cartenu quiquiaari neyanu Benjamiin tapueyocuacata na quianura Egiptojinia. Na queeri na pueretaquiaari shaajenu, taa tarajanu Josee shaajequiaaricuaani. 5Naacuatej, saaquiano Israel niquiohuari trigo masenuucua quiojoquiaari tamasaca pueyata, teyano pojoritiucuaja jaarajaaja trigo masenuucua quiojoriquiaacuaani. Jiyacaritij puetunu Canaan jiyajiniajanaa pueyari na miaajaa miiriquiaa.
6Joseeri jiyacari Egipto jiya camarnu quiriquiaacuaja. Naacuatej nojuajanaari tiquiyocua jiyacajinijinio tiuquiijiono pueya masejoquiaari cumaneeca, saniniuujia nojori na niquitiojonura trigo. Jiyacaritij, tama tapueyocuacajaaja jaara Joseecua tiuquinitiasaaquiaari, tapueyocuacaari nocuara jacamatuquiaari. Naa na jacamatusacaritij, nojoriiri na jiniji rupuetecoree jiyocua. 7Tapueyocuaca tiuquitiasacari nocua, Joseeri ritia tapueyocuaca niishiquiaari. Naacuatej, nojuajaari juhua nojori niishiyojua juhuajaniya nojori shootiariquiaa. Joseeri nera rupaa pacunaraca quijia. Naacuatej Egipcio rupaajinia na pocuasacari tapueyocuacaacua, rupaa pacunaari Hebreo rupaajinia tapueyocuacaacua pacujua saniniuujia. Juhua juayanojaari naa nojori nequesotaree:
—¡Niajaniyariuhuaj! ¿Tejenoteja niajaniyani?
Tapueyocuacaari saniniuujia naa na riucuatureecujua:
—Canaa Canaan jiyajinijinioni. Canaa trigo masenuucua niyareejaniuhuaj.
8Joseeri maninia niishiquiaari tapueyocuaca. Saniniuujia, tapueyocuaca cutaraari maja quenaaja na niishitiuniu quiquiaari Josee. 9Jiyacaritij, Joseeri tapueyocuacaacuara na maquiyojosano niishiquii. Na maquiyojosanoori jiyacari nera tohuateeriquiaa. Cunora naa tapueyocuaca sequereeri:
—¡Maja! ¿Casaate cua toyani? Niaa jiyoteeri manujunaa. Niaari naacua niyaree nia manujunurani, nia niquiniuria maninia, niaatucua teje canaa tiuquitiareni canaa nia miaquejonura.
10Tapueyocuacaari naa riucuatuquiaari Joseetej:
—Maja, camarnunaa. Canaa quia seyaniqui. Canaa canaa miaajaara trigo masenuucua niyarucuaacujua. 11Puetunu canaajanaanij, canaari niquiriyatu queecuajinioni. Canaari sesa miyaquijiacani. Majaari canaa niishiniu cunoni, quiaa na sequeya manujununi.
12Joseeri saaja najiquia naa nojori riucuaree:
—Maja. Niaacuaja niya tiuquirii canaa nia manujunura nia tiuquitianura canaa, canaa nia miaquejonura tama canaa jiyajiniajaajani.
13Tapueyocuacaari na riucuaree:
—Canaa quia seyaniqui. Canaari doceni, niquiriyatu queecuajiniotuhuaj. Canaari Canaan jiyajinijinio pueyani. Canaa naatujuaari jatijia jateerucua canaa quiquiojiniaja canaa queta. Niquiriyatu canaajinijinio cutaraari juurequiquiaari.
14Joseeri saaja socua naa pacuterohua sequenu tapueyocuacatej:
—¡Taa tari cua sequeree niajaniyacuajani, niaari manujunaa seetanujuanaa! 15Naacuatej cua tojitiuri. Majaari quenaaja niquiriyatu niajaniyajinijinio quianu quiniutianiuhua niiquiji niaa cuaara cucua tiuquitiri nia sequesano nia naatujuajaatijiaj. Niaa jaara jiyaniri janiyari najuhuana nia piriyojiyani, Faraoonjanaa cuaara cua saniitiooraqui. 16Cunora, niquiriyatu niajaniyajinijinio cuaara tacatehuara nia naatujua riniuucua cua niquishocoriquiano. Tamasaca saniniuujia, nojori cuaara niyaja jiyojeera nujuatejosano. Janiyari naacua niishiniutianiyani, nia sequesanote seetanujuanaaniqui. Naacuatej, nia sequesano jaara seetanujuanaa quiyaquiri, janiyari naacua niishiniutianiyani niaari manujunaa seetanujuanaa. Janiya jaara najuhuana nia piriyojiyani, Faraoonjanaa cuaara cua saniitioraqui.
17Joseeri puetunu tapueyocuajanaa nujuatejoquiaari pasanaataja. 18Jaara tari nojori shocojoquiaari jiuujianaraca juuca nujuatejojuajinia, Joseeri naa sequequiaari tapueyocuacatej:
—Janiyari Pueyaso tojijia pueyanoni. Quiarijia naa nia miiri cua jiyanooniuria niajaniya. 19Niaa jaara seetanujuanaa sesa miyaquijia pueya quiri, naa nia miiri. Niquiriyatu niajaniyajinijinio cuaara niyaja cureera nujuatesano. Tamasaca saniniuujia cuaara necocohua niquitiohuara trigo nojori miishocoriquiano na miaajaara quenaaja. 20Na nuhuaji, niaari niya cucua tiuquitiarohua nia sequesano nia naatujua. Niaa jaara naa miiritij, janiyari naacua niishiniutianiyani niaaqui seetanujuanaa sequecanucuaja. Jaara seetanujuanaa quiyaquiri, janiyari nia puecootenutaniyani.
Secaja pohuatasano
(Geen 43.1–45.28)
[Na nuhuaji Joseeri tapueyocuacara niquitiotequiaari trigo nojori cumaneeca sami. Nojoriiri na que quijia Canaan jiyajinia riujiuuquiaariuhuaj. Na nuhuaji nojori miaajenuucua nojoriiri socua Joseecua tiuquiquiaariuhua. Jiyacari nojori tarajanu Benjamiin tiuquitiatuquiaariiri taa Josee sequequiaari tari nojoricuajaani. Jiyacaritij Joseeri tapueyocuaca saniniujiuquiaari. Naa nojori saniniujiuquiaariiri: Joseeri saquiriojotaquiaari Benjamiinri na ratujua platajiniji shipinishano nohuaseree. Joseeri sequequiaari Benjamiin cuaara jiyojeera na serura. Judaa saniniuujia, nojuajaari shiiniuquiquiaari Benjamiin niti Josee seru na quiniuria. Jiyacaritij Josee seetanujuanaa tapueyocuaca toquiaari nojuajanaari nojori tarajanucuaja. Naa nojori jiyanootioonu nuhuajitij, Joseeri nojori jiyaroquiaari na que nojori riniuucua puetunu nojori necohuatajanaa. Naacuatej, saaquiano Jacob jaara coteequiaari quianu Egipto jiyajiniara, nojuaja, nocuajinio caneno pueyanio, puetunu nojorijianaari quiquiaari sesenta y seis pueya.]
Currently Selected:
Geenesis 42: arl
Highlight
Share
Copy
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.
