San Lucas 4
4
Loúchawagúniwa Jesúsu
(Mt 4.1-11; Mr 1.12-13)
1Ába lígiruni Jesúsu fulásu loúbawagu dúna Jordán, buin láu lubáfu Sífiri Sándu, ába lanǘgüni Sífiri Sándu lídoun fulásu mageírawati. 2Reídeiti Jesúsu bián-wein wéyu ñi láu Máfia oúchaguei ánjein áburuja lídoun wuríbani. Meíginti ni cáta lídan sun bián-wein wéyu ligía, ába lasándirun ában oúnwenbun ilámaü. 3Ábati laríñagun Máfia lun.
—Ánjein Liraǘ bubei Búngiu, salíguagüdabeí dǘbü le feínme.
4Laríñaga Jesúsu lun.
—Taríñajare Lerérun Búngiu. “Mámarügüba táu fein jabágarida gürígia, jabágariduba gíñe láu jagúnfulirun láu sun dimúrei le laríñagubei Búngiu.”
5Lárigiñe, ába lanǘgüni Máfia Jesúsu luágun ában wǘbü íñuti, ába larúfuduni sun fulásu le uboúagubei lun lídan ában. 6Ába laríñagun Máfia lun.
—Níchugubei sun ubáfu lúma sun uweíriguni le bun 7ánjabu ájuduragua nun lun banǘgünina quei bubúngiute, bánibei súngubei, ladǘga ibíja náali sun le, áni gayáraati níchuguni lun le únti nabúseera.
8Ába laríñagun Jesúsu lun.
—Dísebá nueí, Máfia, ladǘga taríñajare Lerérun Búngiu. “Judúguabá lun Búngiu le Babúreme, lúnrügülá besériwida.”
9Lárigiñe, ába lanǘgüni Máfia ubúrugun Jerusalén, ába laweínragüdüni tábulugu témpulu, ába laríñagun lun.
—Ánjein Liraǘ bubei Búngiu, chǘguabá búngua yágiñe lun ǘnabun, 10ladǘga taríñajare Lerérun Búngiu.
Loúnajabaña Búngiu láni ánjeligu lun joúnigiruníbu,
11janǘgübadibu jájaburugu lueí labúleiseirun bugúdi luágu dǘbü.
12Ába laríñagun Jesúsu lun.
—Taríñajare gíñe Lerérun Búngiu. “Moúchaguabeí Búngiu le Babúreme.”
13Dánti le madárijali Máfia cába lan luwúyeri oúchawagúni ladǘga lun Jesúsu, ába lígiruni lúngua luágu átiri dan.
Lagúmeseruni Jesúsu luwádigimari Galiléa
(Mt 4.12-17; Mr 1.14-15)
14Ába lagíribudun Jesúsu Galiléoun buin láu lubáfu Sífiri Sándu, ába buríti ladímurejoún luágu lídan sun fulásu geyégua. 15Arúfudajatija tídan jalígilisin juríu lídan sun fulásu, buíti jadímurejan sun gürígia luágu.
Jesúsu lídan ubúrugu Nazarét
(Mt 13.53-58; Mr 6.1-6)
16Ábati lídin Jesúsu Nazarétün, le fulásu le ñí lubei lagǘriajoúa, ába lebélurun tídoun jalígilisin juríu lídan wéyu le eméraaguagülei quei ligáburi yebu, ába laráramun lun lalíijan tídan Lerérun Búngiu. 17Ába jíchugunun lilíburun proféta Isaías lun, dan le ladárarunun, ába ladáriruni le ñí lubei laríñaga ítara.
18Níjein láni Búngiu Sífiri Sándu nuágu,
ladǘga anúadaja láadina lun níchuguni ugánu buíti joun gudémetiña,
oúnaja láadina lun námalijaniña ja nidíjeribaña tídan janígi,
lun náfuridagüdüniña adaürǘtiña,
lun níchugun aríjini joun maríjintiña,
lun neséfuruniña ja ouserúabaña wuríba,
19lun nadímurejan luágu dan le fuleíseijabu lan Búngiu joun gürígia.
20Ába ladáurunun Jesúsu líburu, ába líchugunun lun ídejati tánina ligílisi, ába lañúurun. Queíti jasígirun sun ja ñíbaña aríaguei, 21ába lagúmeserun adímureja, laríñaga.
—Ugúñe guánarü gúnfulijali cátei le jigíbugiñe.
22Adímurejatiña sun jagía buíti luágu Jesúsu, weírititi janígi luágu lubuídun buri dimúrei le laríñagubei. Jálügüdagua buríti jámagua.
—¿Mámasan le liraǘ José le?
23Ába laríñagun Jesúsu joun.
—Subúsiti nun luágu jaríñagubei lan cátei le nun. “Surúsia, agáraniguabá búngua”, jaríñaguba giñe nun. “Agáambaadiwa luágu buri cátei le adǘga báalibei Capernaúm, adǘgabeí gíñe ya bageíra.”
24Ába lasígirun adímureja, laríñaga.
—Ninárün jáu luágu úa lan ni ában proféta erésibirúati buídu lageíra. 25Choúru numúti luágu añájein lán meja sarágu würíña ja jiláguañábaña jámarigu jádan Israelítagu lídan meja lidáani proféta Elías, dan le májuyun lubeí júya luágu ǘrüwa irúmu dimí, ába ñi lan sarágu ilámaü fulásurugu, 26áni moúnajan lumúti Búngiu Elías túmoun ni ában jádaangiñe würíña jiláguaaña jámarigu jagía ja aganoúbaña Israél, loúnajei túmoun ában to aganoúboun Sarépta, yaráfa lun ubúrugu Sidón. 27Ñíñanu meja gíñe sarágu gawágutiña gumeín luágu jára ñi Israél lídan lidáani proféta Eliséo, úati ni ában jádaangiñe areídawaguagüdüti lueídügüya Naamán le Síriana.
28Dan le jagáambunbalin sun ja ñíbaña ligílisirugu cátei le, ába jagáñidun sarágu. 29Ába jásaarun, ába jaságaruni Jesúsu bougudín lueí fulásu, ába janǘgüni lábulugun wǘbü le gagíbuagubalin fulásu lun jájuchuruni ñígiñe. 30Ába lásügürün Jesúsu jamídaanguágiñe jámagua, ába lídin.
Ában wügǘri gawáguti espíritu wuríbati
(Mr 1.21-28)
31Ábati lídin Jesúsu Capernaúm, ában fulásu le lídaanbei Galiléa, ába larúfudajan joun gürígia ñi lídan wéyu le eméraaguagülei. 32Weírititi janígi láu ligáburi larúfudajan, ladǘga láu ubáfu ladímureja.
33Ñíñeinti ában wügǘri ligílisirugu, gawáguti espíritu wuríbati, ába lagúaragun ítara.
34—Ígira báwa, ¿ca uágu bemétera wámoun, Jesúsu le Nazarétna? ¿Biábiña agǘnrinchaguawa? Subúdi numútibu, áni subúdi numúti luágu amǘrü lan Liraǘ Búngiu le sándubei.
35Ába ladeínjan Jesúsu lun espíritu wuríbati ligía, ába laríñagun lun.
—¡Maníba, furíba lídaangiñe gürígia le!
Ábati lájuchuruni espíritu wuríbati wügǘri ligía múarugun jagíbugiñe súngubei, ába láfuridun lídaangiñe, mabúleiseirunga. 36Ába laweíridun janígi súngubei, ába jaríñagun jámagua.
—¿Cáteisán buri dimúrei le? ¡Adímurejati wügǘri le láu gumádi lúma ubáfu joun espíritugu wuríbatiña, ába jáfuridun!
37Adímurejoúatiti buri luágu Jesúsu lídan sun fulásu geyégua.
Lareídaguágüdünun Jesúsu límenidi Pédro
(Mt 8.14-15; Mr 1.29-31)
38Ábati láfuridun Jesúsu tídaangiñe jalígilisin juríu, ába lídan lúbiñoun Simón. Sándiñounti límenidi Simón, tabíruajaña, ába jayúmuragun lun Jesúsu lun lareídaguagüdünun. 39Ába lélemuchun Jesúsu tuágun, ába ladeínjan lun abíruaü, ába lagídarun abíruaü tueí. Lídan méme óra ligía ába tásaarun, ába tagúmeserun eténira joun.
Lareídaguagüdün Jesúsu sarágu sánditiña
(Mt 8.16-17; Mr 1.32-34)
40Sun ja añájeinbaña sánditiña jábiñe, dan le láfuachun wéyu ába janǘgüniña lun Jesúsu, ába líchuguni lújabu jawágu cáda ában jádaangiñe, ába lareídagun furúmieguarügü sándi le jawáguti. 41Sarágu jaña gíñe ja gawágutiña espíritugu wuríbatiña, ába jagídarúniwa jaweí, ába buri jagúaragun ítara.
—Amǘrü le Liraǘbei Búngiu.
Ába ladeínjan Jesúsu joun espíritugu wuríbatiña, mígirun lumútiña lun jadímurejan, ladǘga subúdi jamúti luágu ligía lan Crístubei.
Lapúrichijan Jesúsu Galiléa
(Mr 1.35-39)
42Dan le larúgadunbei, ába láfuridun Jesúsu bougudín lueí ubúrugu lídoun ában fulásu mageírawati. Ába jáluajani gürígia, ába jachǘlürün le ñíjin lubeí, buséntiña yebe jeréderuni lueí lídin, 43ába laríñagun joun.
—Gásu gíñe níchuguni ugánu le luáguti larúeijan Búngiu joun lílana líbiri fulásu, ladǘga lun líra noúnajoúa.
44Ítara líña lídin apúrichijeina tídan buri jalígilisin juríu, Galiléa.
Currently Selected:
San Lucas 4: cab
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
