Juan 17
17
Jesús y'alhyene Lajcha häp lechufwenkay
1Tä Jesús ileyej tä yäme tähestso, wet iyahin puleye wet yok:
–Ijcha, nech'e näm lewhäy. Wujyen häp äs, wet äs aiwujyenla. 2Tsi pajche lew'enho len'ohyaj yämthilek inu'pe nilhokej wichi, häpkhilek hiw'enho lew'atshancheyaj tä t'un nilhokej lhamel tä lew'enho häp lham. 3Wet n'ow'atshancheyaj tä t'un häpe t'at tä lhamel nitäfwel amej tä ahäpe Dios tä weihalha lhäy'e tä matche, lhäy'e tä nitäfwel n'oyej tä ohäpe achenek Jesucristo.
4“Pajche oaiwujyen tä oihonhatena tä oyäm wak'alh achumet tä lene'tek owoye. 5Wet athana, Ijcha, tä oyäpil ame, wujyen n'oyej owujyaj tä pajche in'amejen tälhe tä kamaj honhat newache.
6“Häp lhamel tä let'ähi tä iyej honhat leles tä lew'en n'oho, pajche otäfwnhatej lhamel Elh tä ahäpe. Alewuk t'at lhamel, wet lew'en n'oho, wet iwoye ämet, 7wet athana ihanej tä nilhokej m'ak tä lew'en n'oho tälh ame. 8Tsi pajche ofwenhomche lhamel häp ämet tä lew'ente n'oho, wet lhamel tachumlä, wet ihanej tä matche tä otälh ame, wet ichaye tä am t'at tä achenekn'o.
9“Oy'alhyen ame lhamelna. Oy'alhyenhit'a ame wichi tä honhat leles, tajlhama lhamel tä lew'en n'oho, tsi alewuk t'at. 10Nilhokej m'ak tä olewuk Alewuk t'at, wet m'ak tä Alewuk olewuk t'at, wet owujyaj lhain'älthi häp lhamelna.
11“Olham oyäpil ame, nemla oihonhatena, mat lhamelna häp tä kamaj ihla honhate. Ijcha tä ais, uye lhamel häp tä isej akhajyhayaj lhäy'e ahumnhayaj tä lew'ente n'oho, häpkhilek weihalhahchä mälhyet iwoye n'amel. 12Tä oiyej lhamel honhatena, ot'uyehen häp tä isej akhajyhayaj lhäy'e ahumnhayaj tä lew'en n'oho. Ot'amajej wet niwohit elh lhamel chik tatäy, tajlhama elh tä n'otäyhyaj lhäs, häp tä tatäy, yämthilek lhayäm matche Dios lhämet tä ihi Lehi.#Sal 41.9; Juan 13.18
13“Athana oyäpil ame, mat oyäme tähestso tä kamaj oi'ayej honhatena, häpkhilek häte okäjyaj tä in'oyej matche tä iyejen lhamel wet nittäya lhip lakäjyaj. 14Pajche ohantejen häp ämet, mat honhat leles n'äyihomche lhamel tsi lew'ethit'a honhat, mälhyej olham tä ow'ethit'a honhat. 15Ot'alhiyejt'a ame yämthilek lesoyej honhat, mat amajejlä ahättaj. 16Tsi lhamel häpkhihent'a honhat leles, mälhyej olham tä ohäpkhit'a honhat lhäs. 17En amajchetesayej m'ak tä matche. Ämet häpe t'at m'ak tä matche. 18Ochen lhamelna yämthilek ifwenho ämtes honhat leles, mälhyej tä lechenn'o wet ofwenho ämtes honhat leles. 19Wet olhayen amajcheta'pe häp lhamel, häpkhilek lhamel häte häpehen amajchetes häp tä isej m'ak tä matche.
20“Ts'ilakhit'a lhamelna tä oy'alhyen ame, mat häte häp iyhäj chik t'ekhahla n'oye chik iläte m'ak chik lhamelna yen silätyaja. 21Ijcha, oy'alhyen ame yämthilek nilhokej lhamel weihalhahchä tä in'amejen, mälhyet iwoye tä am lhe n'oyej wet oi'amej. Is chik w'awulhchä letichunhayaj lhäy'e m'ak tä iwoye, häpkhilek wichi t'ekhaye tä matche am t'at tä achenekn'o. 22Pajche ow'enhomche owujyaj tä lew'en n'oho, häpkhilek weihalhahchä mälhyej iwoye n'amel, 23yämthilek olham oiyej t'at lhamel wet am lhe n'oyej, wet lhamel matche tä weihalhahchä. Chik mälhyejtso, wichi nitäfwenhiyeja tä am achenekn'o, lhäy'e tä wuj tä lehumnhen lhamel tä lew'en n'oho, mälhyej tä lehuminn'o.
24“Ijcha, am t'at tä lew'en n'oho lhamel, wet ot'uhläk lhamel ihla n'oyej chik oihi lhip tä oihihila, yämthilek hiw'en owujyaj tä lew'en n'oho, tsi lehumin'atn'o tälhe tä kamaj niwak'alha honhat.
25“Eh, Ijcha tä ais, häp honhat leles tek nitäfwel amej. Mat olham ontäfwel amej, wet häp lhamel tä lew'en n'oho häte ihanej tä am t'at tä achenekn'o. 26Pajche otäfwnhatej lhamel häp Elh tä ahäpe, wet äp kamaj otujlhahichela t'at tä otäfwnhat amej, yämthilek ahumnhayaj tä leti n'oyej ihi t'at lhamel lehusey wet häte olham oiyej t'at.”
Currently Selected:
Juan 17: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.
