Gn 14
14
Laj Abrán kixkol laj Lot
1Sa'eb' li kutan a'an laj Amrafel, awab'ej re Senahar, laj Aryok, awab'ej re Elasar, laj Kedorlahomer, awab'ej re Elam, ut laj Tidal, awab'ej re Koyim, 2ke'yalok rik'in laj Birsá, awab'ej re Gomoor, rik'in laj Sinab, awab'ej re Admá, rik'in laj Semeber, awab'ej re Seboín, ut rik'in li awab'ej re Belá, Sohar ajwi' nayeemank re li tenamit a'an. 3Chixjunileb' a'in ke'xjunaji rib' sa' xtaq'ahil Sidim, b'arwi' wank li Atz'aminb'il Palaw. 4Chiru kab'laju chihab' wanjenaqeb' chaq rub'el xwankil laj Kedorlahomer, ab'anan sa' li roxlaju chihab' ke'raj raj risinkileb' rib' xjuneseb'. 5Sa' li xkaalaju chihab' kichalk laj Kedorlahomer rochb'eeneb' li awab'ej li neke'okenk chirix, ut ke'xsacheb' laj Refait aran Asterot-Karnáhin. Ke'xsacheb' ajwi' laj Susim aran Ham, eb' laj Emí sa' xtaq'ahil Kiriatáhin 6ut eb' laj Horí sa'eb' li tzuul re Seír toj El-Parán, li wank chi xk'atq li chaqich'och'. 7Chirix chik a'an ke'sutq'iik chaq ut ke'wulak toj En-Mispat, Kadés ajwi' nayeemank re, ut ke'xchap chixjunil li xna'ajeb' laj Amalek, jo'ajwi' li xna'ajeb' laj Amor li wankeb' sa' li tenamit Hasesón-Tamar.
8Toja' naq ke'elk li awab'ej re Sodoom, li awab'ej re Gomoor, li awab'ej re Admá, li awab'ej re Seboín ut li awab'ej re Belá (Sohar ajwi' nayeemank re li tenamit a'an), ut sa' xtaq'ahil Sidim ke'xk'uub' rib' chi yalok 9rik'in laj Kedorlahomer, awab'ej re Elam, rik'in laj Tidal, awab'ej re Koyim, rik'in laj Amrafel, awab'ej re Senahar, ut rik'in laj Aryok, awab'ej re Elasar: kaahib' chi awab'ej ke'ok chi yalok rik'in oob'eb'. 10Li xtaq'ahil Sidim nujenaq chi xjulel li b'etuun; ut naq yookeb' chi elelik li awab'ej re Sodoom ut laj Gomoor, ke't'ane'k aran, ut eb' li rochb'een ke'elelik sa'atqeb' li tzuul.
11Toja' naq eb' li kaahib' chi awab'ej ke'xchap jo'nimal wank reheb' laj Sodoom ut eb' laj Gomoor, jo' ajwi' chixjunil li xtzekemqeb', ut koheb'. 12Naq koheb', ke'xchap ajwi' laj Lot, li rikaq' laj Abrán, ut chixjunil li xjunkab'lal, xb'aan naq Sodoom wank. 13Ab'anan jun reheb' li ke'elelik kulxye resil re laj Abrán, a' laj Hebreo, li wank wan wi' li ji re Mambré aj Amor, ras laj Eskol ut laj Aner: eb' a'in wankeb' chi sum'aatin rik'in laj Abrán.
14Naq kirab'i laj Abrán naq kichape'k li rikaq', kixch'utub'eb' waqxaqlaju xwaqlajuk'aal (318) aj k'anjel chiru, yo'lajenaqeb' sa' rochoch, ut kixtaaqeheb' li ke'chapok re laj Lot toj sa' li tenamit Dan. 15Chiru q'oqyink laj Abrán rochb'eeneb' laj k'anjel chiru kiwulak b'arwi' wankeb' li junch'ol, chi maak'a' sa' xch'ooleb': kixq'ax ruheb' ut kiraanilasiheb' toj sa' li tenamit Jobá li wank junpak'al Damaask, sa' releb'l iq'. 16Kireechani wi' chik chixjunil li xjunkab'lal; kixkol ajwi' laj Lot li rikaq', li xjunkab'lal jo' ajwi' eb' li ixq ut eb' li poyanam.
Laj Melkisedek
17Sa' xsutq'ijik chaq laj Abrán, naq ak xjuk' xwankil laj Kedorlahomer ut eb' li awab'ej li wankeb' rochb'een, ki'elk li awab'ej re Sodoom chi xk'ulb'al sa' xtaq'ahil Sawé (“xTaq'ahil li Awab'ej” ajwi' nayeemank re). 18Toja' naq laj Melkisedek, awab'ej re Salem, kixyeechi'i xwa ut b'iin, xb'aan naq a'an aj tij chiru li Nimajwal Yos. 19Kirosob'tesi laj Abrán ut kixye chi jo'ka'in:
“Osob'tesinb'ilaq taxaq laj Abrán xb'aan li Nimajwal Yos,
aj yoob'tesinel re li choxach'och'.
20Usilaatinanb'ilaq ajwi' li Nimajwal Yos
li xq'axtesi sa' laawuq' eb' li xik' neke'ilok aawe”.
Ut laj Abrán kixk'e re li xlajeetqil chixjunil li k'aru wank re.#14,18-20 Heb 5,6-7,17. 21Toja' naq li awab'ej re Sodoom kixye re laj Abrán: “K'eheb' we li poyanam ut kanaaq cho'q aawe li k'a'aq chik re ru”.
22Ab'anan laj Abrán kixye re li awab'ej re Sodoom: “Xinye li waatin chiru Nimajwal Yos, aj yoob'tesinel re li choxach'och', 23naq maajun li noq', maajun xk'aamal xaab', chi moko k'aru aawe tink'am laa'in, re naq ink'a' naru taaye: «Laa'in xinb'ihomob'resink re laj Abrán». 24Tik maak'a' tink'am; ka'ajwi' li xe'xtzeka eb' laj k'anjel chiwu ut li tento te'tz'aq eb' li xe'ochb'eenink we, a'eb' laj Aner, laj Eskol ut laj Mambré”, chan laj Abrán.
Currently Selected:
Gn 14: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
