Lk 17
17
Li luktesink ch'oolej
(Mt 18,6-7; Mk 9,42)
1Kixye li Jesus reheb' li xtzolom: “Maachan naq ink'a' taachalq li luktesink ch'oolej, ab'anan ra chaalel sa' xb'een li ani taachalq wi' a'an. 2Jwal us raj cho'q re naq te'xk'e chi xkux junaq xpekul li ke'leb' ut te'xkut sa' palaw, chiru naq tixluktesi xch'ool junaq reheb' li kok' a'in. 3Chek'ehaq reetal!
Xkuyb'al qamaak chiqib'il qib'
(Mt 18,15, 21-22)
“Wi laawas aawiitz'in taamaakob'q chawu, chaq'usaq; ut wi tixyot' xch'ool tixjal xk'a'uxl, chakuyaq xmaak. 4Wi taamaakob'q chawu wuqub' sut chiru li jun kutan ut wuqub' sut taasutq'iiq chaq aawik'in chi xyeeb'al: «Nayot'e'k inch'ool», chakuyaq xmaak”.
Nim xwankil li paab'aal
(Mt 17,20; 21,21; Mk 11,23)
5Ke'xye eb' li apóstol re li Qaawa':
—K'e xtz'aqob' li qapaab'aal.
6Ut li Qaawa' kixye:
—Wi ta li xnimal leepaab'aal a'an jo' jun t'orol chi mostaas, teeye raj re li sikomoor#17,6 Li sikomoor a'an jun li che'. a'in: «Mich' aawib' ut xe'eni aawib' sa' palaw», ut a'an texpaab' raj.
K'anjelak chi kub'enaq qawankil
7“Wi junaq eemoos yo chaq chi k'alek malaj chi ilok ketomq, ani eere laa'ex tixye re naq taasutq'iiq chaq sa' k'aleb'aal: «Numen chaq ut hilan sa' meex»? 8Ma ink'a' tab'i' tixye re: «Chak'uub' b'ayaq intzekemq, chajal aawaq' ut k'anjelan chiwu naq yooqin chi wa'ak ut chi uk'ak; toj moqon chik tatwa'aq ut tat-uk'aq laa'at»? 9Ma tento tab'i' tixyoxi re li xmoos rik'in naq xb'aanu li kitaqlaak wi'? 10Jo'kanaqex ajwi' laa'ex: naq akaq xeb'aanu chixjunil li xextaqlaak wi', cheyehaq: «Laa'o yal aj kok' k'anjel. Ka'ajwi' xqab'aanu li tento sa' qab'een xb'aanunkil»”.
Li lajeeb' saqlep rixeb'
11Naq yo chi xik Jerusalén, li Jesus kinume'k sa' xyanq Samaria rik'in Galilea. 12Ut naq kox'okaq sa' jun li tenamit, lajeeb' chi winq saqlep rixeb' ke'elk chaq chi xk'ulb'al; ke'xaqliik chaq chi najt 13ut ke'xye chi kaw xyaab'eb' xkux:
—At Jesus, at aj Tzolonel, chawuxtaana qu!
14Naq li Jesus kirileb', kixye reheb':
—Ayuqex ut k'utomaq eerib' chiruheb' laj tij.
Ut naq yookeb' chi xik, ke'k'irtasiik. 15Jun reheb' a'an kiril naq xk'iraak; jo'kan naq kisutq'iik chaq, yo chi xnimankil ru li Yos chi kaw xyaab' xkux; 16koxhupub' rib' chi roq li Jesus ut ki'ok chi xb'anyoxinkil chiru. Ut a'an jun aj Samaria. 17Toja' naq li Jesus ki'ok chi xyeeb'al:
—Ma ink'a' tab'i' xe'k'iraak sa' lajeeb'al? Ut li b'eleeb' chik, b'ar wankeb'? 18Ma ka'ajwi' a'in li jalan xtenamit xsutq'iik chaq chi xnimankil ru li Yos?
19Ut kixye re:
—Xaqlin ut ayu: laapaab'aal xkolok aawe.
Xk'ulunik li xnimajwal awab'ejihom li Yos
(Mt 24,23-28, 36-41)
20Naq eb' laj Pariseey ke'xpatz' re li Jesus jo'q'e taachalq li xnimajwal awab'ejihom li Yos, kixsumeheb' ut kixye:
—Li xnimajwal awab'ejihom li Yos taachalq chi ink'a' taak'eemanq reetal, 21chi moko te'xye: «Ilomaq arin» malaj: «Wank le'», xb'aan naq li xnimajwal awab'ejihom li Yos wank chik sa' eeyanq.
22Ut kixye reheb' li xtzolom:
—Taawulaq xq'ehil naq teerahi rilb'al yal ta junaq reheb' li xkutankil li K'ajolb'ej,#17,22 Eb' li xkutankil li K'ajolb'ej a'aneb' li kutan te'wanq chirix li xnimal xk'ulunik li Jesus. ab'anan ink'a' teeril. 23Ut te'xye eere: «We' arin» malaj: «Ilomaq chaq le'», ab'anan mexxik chi moko chetaaqeheb'. 24Xb'aan naq jo' li raq'kaaq li narepb'ak, nalemtz'unk chaq sa' xmaril li choxa toj sa' li junpak'al chik, jo'kanaq ajwi' li K'ajolb'ej sa' li xkutankil. 25Ab'anan, xb'enwa tento naq tixk'ul naab'al rahilal ut taatz'eqtaanaaq xb'aaneb' li tenamit a'in.
26“Li k'aru kik'ulmank naq kiwank laj Noé, taak'ulmanq ajwi' sa' xkutankil li K'ajolb'ej. 27Yookeb' chaq chi wa'ak chi uk'ak, yookeb' chi k'amok ut chi k'ame'k toj sa' li kutan ki'ok wi' laj Noé sa' li jukub' kab'l ut kichalk li b'ut'iha', kixsach chixjunileb'.#17,26-27 Gn 6-7. 28Jo'kan ajwi' kik'ulmank sa'eb' li kutan kiwank wi' laj Lot: yookeb' chaq chi wa'ak chi uk'ak, yookeb' chaq chi loq'ok chi k'ayink, chi awk ut chi kab'lak; 29ab'anan sa' li kutan naq ki'elk chaq laj Lot Sodoom, li Yos kixtaqla chaq xam ut asuupr toj sa' choxa ut kixsach chixjunileb'.#17,28-29 Gn 18,20-19,25. 30Jo'kanaq ajwi' sa' li kutan tixk'ut wi' rib' li K'ajolb'ej.
31“Sa' li kutan a'an li wanq chaq sa' xb'een li kab'l mikub'eek chi xxokb'al sa' rochoch li k'aru wank re; jo'kan ajwi' li wanq chaq sa' xk'al misutq'iik chaq. 32Jultikaq eere li rixaqil laj Lot.#17,32 Gn 19,26. 33Ani naraj xkolb'al li xyu'am, taasachq chiru; a'ut li taasachq li xyu'am chiru, a'an taareechani li yu'am.
34“Ninye eere naq sa' li q'oqyink a'an wiib' wanqeb' sa' jun chi ch'aat: jun taaxoke'q ut jun taakanab'aaq. 35Wiib'eb' chi ixq yooqeb' chi ke'ek chi laq'lo: jun taaxoke'q ut jun taakanab'aaq”.#17,35 Li raqal 36: Wiib' wanqeb' chaq sa' k'aleb'aal: jun taaxoke'q ut jun taakanab'aaq, moko tz'aqal xcha'al ta li Evangelio, a'an b'an yal xtiqb'al aj chik li raqal 35 (cf. Mt 24,40).
37Ut eb' a'an ke'xye re:
—B'ar taak'ulmanq a'an, at Qaawa'?
Kixsumeheb':
—B'ar wanq li kamenaq, aran te'xch'utub' rib' eb' li so'sol.
Currently Selected:
Lk 17: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
