San Mateo 22
22
Tembuchakueri uandantskua
(Lc 14.15-24)
1Jesusi ménderu uandantskua ma arhiaspti: 2“Auandarhu anapu irechekua, ireche méni jáxesti enga uájpani tembuchatani jámani k'uínchekua úntapka. 3Ka axaaspti jántspirichani eskaksï nipiringa ióarhijpentani, ka ima engaksï uandajpanhantapka nóksï uékaspti nirani. 4Ménderu máteru játspirichani axaaspti ka arhiaspti: ‘Arhia je eska t'irekua jaiaraskia. Uákasï p'ukurakatechani uandikutarkorheaska, ka iámendu ambe jaiarastia, jungueksïa tembuchakuarhu.’ 5Ka ima engaksï uandajpanhantapka ískuksï kurhajchaaspti, ma tarhekorheni niraspti, ka máteru imeri úkua ambe kámaspti, 6máteruksï jántspirichani jupikaaspti ka uándikuasptiksï. 7Irecha íni ambe mítetini, kánekua ikiaspti, ka axaaspti p'urhejkutichani ka uándikutarkorheaspti atajpitichani ka kurhupakuaspti. 8Ka jántspirichani arhiaspti: ‘Sési jimbo tembuchakuarhu iámendu ambe jaiarastia, ka ima engaksï uandajpanhantaka nóksï nitatarhesti.’ 9Ni je uéramani ísï ka néni engajtsï xáni kúmaaka, p'ímarhe je. 10Ka jántspirichaksï uéraspti ka p'ímarhesïremptiksï imani engaksï kúmempka, ambakiti k'uiripuechani ka ístu no ambarhatichani ka tembuchakuarhu no jantanhenhaxaptia.”
11“Enga irecha inchantapka exeani imani engaksï p'ímarhenhapka, exespti ma enga no ísï xukuparhatini jápka eska tembuchakuarhu na xukuparhanhantajka, 12ka arhispti: ‘Pámpiri, ¿Nénari jimbosï ísï xukuparhatini incha?’ Ka ima pínasku pakaraspti. 13Jiájkani irecha arhiaspti jarhojpirichani: ‘Jónduku je ka jójku je ka pájpakandu peta je; jimeuati uekua ka enga sînichani kirisïmendinhantaaka.’ 14Jimbokaksï uánekua uandajpanhasïnga ka namuntkuksïsï erakunhantajti.”
Jesusinksï ts'éjkukuekasti
(Mc 12.13-17; Lc 20.20-26)
15Fariseuechaksï jima kéndikuspti ka uandontskorhesptiksï néna engaksï úpiringa Jesusini ambe uandarani, ka imani jimboksï k'amanharhirantani. 16Ka máru imecheri jurhengorherichanksï erodiasïcheri jinguni axaaspti, eskaksï Jesusini arhipiringa: “Jurhentpiri, míteskachi eskari kánekua tsitisïnga jurhimbekua ambe, ka eskari sési jimbo Diósïri xanharini jurhentpesïnga eska néka, ka ískuri kurhachpesïnga ambe enga xáni uandanhani jarhajka, jimbokari t'u no k'uiripunisï sési pakarakuni jámka. 17Arhijtsïni, ¿Nári erangusïnki? ¿Sésekua jarhaski o no sésekua jarhaski Sésarini maiamuni?” 18Ka Jesusi mítetini ambe engaksï nósesi ambe eratseni jápka, arhiaspti: “Ískujtsï ísï uandasïnga, ¿Andijtsïnisï ts'éjkuni uéjki? 19Tumina taiakata májtsï exera.”
Imaksï exeraspti ma enga ma jurhiatekua jimbo andanhajka. 20Ka arhiaspti: “¿Nésï ixu jukanharhi, ka néri jakangurhikuasï ixu karanharhikukata jaki?” 21Ka imaksï arhispti eska Sésaririspka. Ka Jesusi arhiaspti: “Sésarini íntsku je ambe enga Sésaririka, ka Diósïni ambe enga Diósïrika.” 22Íni ambeksï kurharini ískuksï pakareraspti ka kéndikukusptiksï.
Jesusi tsíntskueri ambe arhijpesti
(Mc 12.18-27; Lc 20.27-40)
23Imani jurhiatekuaksï Jesusini saduseuecha andarheraspti, engaksï uandajka eskaksï uarhiricha no tsíntasïnga, ka kurhamarhesptiksï: 24“Jurhentpiri, Moisesi uandaspti: ‘Enga acheti ma uarhiska ka nóma uájpani jurajkuni, erachi jémba uarhitini tembuntaati, ka erachi jémba k'érini uájpechani jurajkukuauati.’ 25Jarhasptiksï méni ísï ixu iúmu tsimani erachicha ka enga urhetipka, tembuchaspti ka nóma uájpani kángorhetini uarhispti, ka erachi jémba enga chúxapempka uarhiti jémbani tembuntaspti. 26Ka májkueni úkorhenchaspti ima enga k'érini chúxapempka, ka máteru engaksï chúxapempka, iámenduksï májkueni jámaspti, sapichu jingunksï iúmu tsimani erachichespti. 27Ka uarhitijtu uarhisptia. 28Tsíntskuarhu, ¿Náki íni iúmu tsimani erachicheri tembeua? Nóchkaksï iámenduecha tembuspi andi” 29Ka Jesusi mókukuantaaspti: “Diósïri karakatantsï támu ísï jánhaskatixaka ka Diósïri uinhapekuantsï no kurhangusïnga, 30jimboka jiáni enga tsínhantaaka nóteru tembuchanhaatia, Diósïri ánjelini auandarhu anapueni járhanhantaati. 31Ka uarhiricheri tsíntskua ambe, ¿Andi nójtsï méni arhintaski ambe enga Diósï uandaka? 32‘Jíska Abraniri Diósï, ka Isakiri Diósï, ka Jakobueri’ Ima no uarhiricheri Diósïsti, tsípiticherisï Diósïti.” 33Ísï kurhanhatini, ísku pakareranhasïrempti imeri arhijtsïkperakuechani kurhanhatini.
Sánderu k'éri juramukua
(Mc 12.28-34)
34Fariseuechaksï tángorhentaspti engaksï mítepka eska Jesusi pínamataraaspka saduseuechani. 35Ka ma enga imecha jinguni juramukua jurhentpiripka, Jesusini ts'éjkukuekani ísï kurhamarhespti: 36“Jurhentpiri, ¿Náki arhistatsperakua sánderu k'ériski juramukuarhu?” 37Ka Jesusi arhispti: “Chéti Acha Diósïni mintsita jinguni xénhcha ka iámu chéti tsípekua jinguni. 38I arhistatsperakua urhetisti ka sánderu jukaparhasti. 39Ka enga chúngumajka sáno májkueni jáxesti: ‘Xénhchpeakari ísï eskari t'u na xénhchakorhejka.’ 40Íni tsimani arhistatsperakuecharhuksï Diósïri uandaricha ka Diósïri juramukua p'erandakorhesïndi.”
¿Krístu ne uájpeski?
(Mc 12.35-37; Lc 20.41-44)
41Engaksï fariseuecha útasï tángorhetini jápka, Jesusi kurhamarheaspti: 42“¿Krístuerijtsï ambe sáni eratsesïnki? ¿Ne uájpeski?” Ka arhisptiksï: “Dabi uájpesti.” 43Ka Jesusi arhiantaaspti: “¿Néna jimbosï Dabi Espirituni jimbo Tata arhipki? Jiáni enga uandaka:
44‘Acha Diósï jucheti, Tatani arhisti:
Jurhijkandarini uaxakache,
engakini jamberi chéti ikiatspirichani
jandandukuarhu péracheaska’
45Enga Dabijtu Acha arhijka, ¿Néna uájpeua?” 46Ka nónema úsïrempti mókukuntani: Níjtuteru nema tekaueni jiáni uératini ambe kurhamarheni.
Currently Selected:
San Mateo 22: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
