San Mateo 25
25
Témbeni iurhitskiricheri uandantskua
1“Auandarhu anapu irechekua, tembuchakuarhu méni jánhaskorheati: Témbeni iurhitskirichaksï erajkutakuechanksï p'íkuasti ka uérasptiksï tembuchani erokani. 2Iúmu iurhitskiricha, míakua jukarisptiksï ka máteruksï iúmu no míakua jukaspti. 3Ima engaksï nósani míakua jukapka, engaksï erajkutakuechani p'íkuapka tamakuaksï no pájtaspti; 4ka máteru engaksï míakua jukapka, jatsirakorhesptiksï tamakua ka erajkutakua jingunksï pájtakorhespti. 5Ka k'uírasptiksï jimbokaksï uarhixapka k'uínhchani, jimboka tembucha ióndaxapka niárani. 6Ka terujkani chúri kurhakorhenhaspti uinhachanhani: ¡Uéra je kókuani, tembucha janoxatiia! 7Ka iurhitskirichaksï jauaraspti ka erajkutakuechanksï sési jupiantaani, 8ka no míakua jukarichaksï arhiaspti, míakua jukarichani: Íntskujtsïni sáni tamakua jimbokaksï juchari erajkutakuecha parhukuekaxakaia. 9K'óruksï míakua jukaricha arhiantaaspti: Ni je piákorheni jini enga ataranhantajka, ísïchi nónema kueratancheaka. 10Ka engaksï ima nirani jápka piáni, tembucha niáraspti ka ima engaksï jinguntku jápka erokani, tembuchakuarhuksï, tembucha jinguni inchaspti, ka míkanhaspti. 11Tátsekuaksï niáraspti máteru iurhitskiricha uandaparini: ¡Tata, Tata mítachejtsïni! 12K'óru ima arhiantaaspti: Jíksïni no míteska.
13Jingutku ja je jimbokajtsï no míteska na jatini ka ambe jándusï jungua.”
Jántspiricha engaksï tumina intsïnhaka
(Lc 19.11-27)
14“Auandarhu anapu irechekua acheti méni jáxesti, enga iauani isï nirani jámani, ioarhiapka imeri jántspirichani ka jatsikorhekua patsaraaspti. 15Méchakuani iúmu taiakata íntskuspti ka máteruni tsimani ka máteruni ma, xántku intsaaspti eskaksï xántku sésku ánchetapiringa. 16Ima enga iúmu taiakata intsïnhapka niraspti ka tuminani ánchetaspti ka máteru iúmu taiakata andaspti. 17Ka májkueni úspti ima enga tsimani taiakata intsïnhapka, ka tsimani taiakatajtu andaspti. 18Ka ima enga ma taiakatajku intsïnhapka, jarhaskuspti ka ima achetiri tuminani enga jántspekuempka inchaskuspti.”
19“Ióni jimbo, ima tata enga jántspirichani káauempka k'uanhatsentaspti, ka uandajpantaaspti tumina miiukuantaani. 20Ka andarheraspti ima enga iúmu taiakata p'ípka ka máteru iúmu pérakuspti ka arhispti: ‘Tata, chájtsïni iúmu taiakata íntskuspka, inde máteru iúmu taiakatechani engani andaka.’ 21Ka ima arhispti: ‘Sési jarhasti, sésiri ánchekorhesïnga ka mintsinharhikueskari. Sánderukini kánekua íntskuaka. Incha chéti tateri tsípekorhetarhu.’ 22Imajku andarheraspti enga tsimani taiakatecha p'ípka ka uandaspti: ‘Tata tsimani taiakatarini íntskuska: Ixuksï jarhasti máteru tsimani taiakatecha engani inde tuminani andaraka.’ 23Ka ima arhispti: ‘Sési jarhasti, sésiri ánchekorhesïnga ka mintsinharhikueskari, sánderukini kánekua íntskuaka. Incha chéti tateri tsípekorhetarhu.’ 24Ka andarheraspti imajtu enga ma taiakatajku intsïnhapka ka arhispti: ‘Tata, míteska eskari kánekua uinhamarhetspesïnga, ka eskari jima p'ikuntasïnga nani engari no tsíri jatsijka, ka jimari uarhojpani engari no t'u k'uajpajka; 25indeni jimbosïni chéka, ka ísï jimbosïni chéti taiakatani túskuka; ixu jarhasti, ísï chétiti.’”
26“Ka ima arhispti: ‘Jántspiri, nóri sési ánchekorhesïnga ka xépeskari, ekari míteka eskani no jucheti tsíri jatsikatarhu p'ikuntasïnga; ka eskani jima uarhojpantasïnga nani engani no ji k'uájpajka, 27t'úri tuminani, tumina kuánetkorherichani íntsaapiringa ka jiájkani engani janoguapiringa, ji jucheti tuminani andakua jinguni p'íntapiringa. 28Euantsï je taiakatani ka imani íntsku je enga témbeni taiakatecha káani jaka, 29jimboka ima enga jatsika, sánderu intsïnhaati ka sánderu jatsiati; ka ima enga no jatsika, sáni ambe enga kángorhejka imani jamberi euanhaati. 30Ka jántspiri no marhuarini uérakua pájpakandu peta je; jimasï ueraati ka sînichani kirisïmeantaani.’”
Iretechaksï útamenhaati
31“Jiájkani enga Acheti uájpa t'íntskua jinguni ka imeri pímbinharhati ánjelichani jinguni junguaka, imeri k'éri uaxantskua t'íntskuerikuarhu uaxakaati, 32ka imani japarinksï iámendu iretecha tángorhentaati; ka ima máru jarhangustauati, ísï eska karichi eranguti karichi sïuangua jukarichani na jarhangustajka. 33Ka karichichani jurhijkandani pérakorheauati, ka karichi sïuangua jukarichani uikixkandani péraauati. 34Ka irecha arhiauati imechani engaksï jurhijkandani jaka: ‘Juíni je, Táte juchetiri ujchakurakatecha, p'i je irechakuani engajtsï parhakpeni k'ueraakatarhutki cha míndamenhatini jaka. 35Jimbokajtsïni t'ireraska jiáni engani k'arhimani jápka, ka itsïmatantsïni engani ji k'arhichani jápka; ka sésirini erokaska engani iauani ísï jámani jápka; 36xáskuni jámaxapka ka xukutaskarini; p'urhembeskarini engani p'amenchani jápka; ka niraskarini sáni kataperakuarhu eranhani.’ 37Ka kaxumbitichajtsïni arhiati: ‘Tata, ¿Andi na jatinksïni k'arhimaparini exeski ka t'ireranksïni? Ka ¿Andi jatinispki engaksïni jucha itsï sáni intsïmbeka engari k'arhichani jápka? 38¿Andi na jatiniri uérakua isï jámaxapki ka juchaksïni sáni p'imarheni o xukutanksïni engari xásku jámani jápka? 39¿Andi na jatinksïni p'amenchaparini exespki, óri k'ataperakuarhu jarhani ka niranksïni eranhani?’ 40Ka irecha arhiauati: ‘Sési jimboksïni arhixaka, engajtsï íni ma chári erachi sapichuni ísï káani jaka, jíndentsïnisï ísï kámani jaka.’ 41Ka arhiauati imani engaksï uikixkandani jaka: ‘Kéndikuchejtsïni ikimekatecha, chpírirhu k'uanijpe je enga nómeni pójpejka, enga nóambakiti ka imeri ánjelichaksï úmenhaka, 42jimbokani k'arhimaxapka ka nórini t'ireraska ka k'arhichaxapka ka nórini sáni itsï intsïmpeska; 43iauani isï jámaxapka ka nórini sáni chénio páska, ka xáskuni jámaxapka ka nórini sáni xukutaska; k'ataperakuarhu jarhaspka ka p'amenchaxapka ka nórini sáni niraska eranhani.’ 44Ka imaksï arhintaati: Tata, ¿Andi na jatinksïni k'arhimaparini exeski ka k'arhichaparini ka iauanisïri jámani jarhani ka xásku, óri p'amenchani jarhani óri k'ataperakuarhu jarhani ka nóksïni sáni jarhuatani? 45Ka imaksïni mókuchentaati: ‘Sési jimboksïni arhixaka, jíndenturini no jarhuataska engari íni sapichuni ma no ísï kámaka.’ 46Íchkaksï méntku ísï ikimenhaati, ka kaxumbitichaksï méntku isï anapu tsípekuani p'iuati.”
Currently Selected:
San Mateo 25: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
