San Mateo 27

Jesusi Pilatuni jinguni pánhasti

(Mc 15.1; Lc 23.1-2; Jn 18.28-32)

1Sïuajpentku, iámenduksï k'éri tátecha ka achamasï iretarhu anapuechaksï eratsekuntaspti néna engaksï Jesusini uándikupiringa. 2Jójkutinksï juramuti Pónsio Pilatuni pákuspti.

Júdasï uandikukorhesti

3Ka Júdasï, ima enga Jesusini intsïnharhitpepka, exerini eskaksï uándikupiringa, p'amondakorhespti ísï úrini ka ma ekuatse ka témbeni taiakatechani k'éri tátechani ka achamasïchani íntsantaaspti 4arhiaparini: “K'amanharhintaska ísï uarhikuarhu intsïnharhitpetini imani enga nómbe ma k'amanharhintaka.” Ka imaksï mókukuntaspti: “¡Ka jucha ambeia, chéti jimboestiia!” 5Ka tuminani tiósïo k'uanimutaspti, ka niraspti pirajchakorheni. 6K'éri tátechaksï tuminani k'arhantaspti ka uandasptiksï: “No sésekua jarhasti íni tuminani tiósïo jurajkuni, jimboka uándikperakueri maiampekateska.” 7Ka engaksï kurhamukperapka, imani tumina jimboksï purhechi úrini echeri ma piákuntaspti, jima engaksï uérakua anapuecha jatsinhantapiringa. 8Ka ísï jimbo iásï jamberi jima: “Iurhiri jáakurhakuarhu” arhinhajti. 9Ka úkorhesti ísï eska Diósïri uandari Jeremiasï na uandapka: “Ma ekuatse témbeni taiakatechanksï p'íkuaspti, eskaksï Israeli anapuecha náxani jukaparharaka, 10ka echeri, purhechi úrinksï piákuntasti, eskamendurini Acha na juramucheka.”

Pilatu Jesusini kurhamarhesti

(Mc 15.2-5; Lc 23.3-5; Jn 18.33-38)

11Jesusi juramuti jinguni péranhaspti ka juramuti kurhamarhespti: “¿T'úsï judiuecheri ireche?” Ka Jesusi arhispti: “T'úri ísï uandaska”. 12Ka tátacheri urhejtsïkuricha ka achamasïchaksï, Jesusini ambe arhiparhataxapti, ka Jesusi nómbema mókukorhespti. 13Ka Pilatu arhispti: “¿Nóri kurhaxaki ambe engaksïni xáni arhiparhatani jaka?” 14Ka Jesusi méntku nómbe ma arhintaaspti, enga juramuti jamberi ísku pakarerapka eratsentani.

Jesusinksï uándikutarkorhesti

(Mc 15.6-20; Lc 23.13-25; Jn 18.38—19.16)

15Ka k'uínchekuarhu, juramuti p'indespti k'atakatani ma jurajkutspeni néni engaksï uékapiringa. 16Ka jiájkani ísï Barrabasi k'atakata jarhaspti, ima kánekua kurhakatespti. 17Enga tángorhenhantapka, Pilatu kurhamarhpespti: “¿Néni jurajkua, Barrabasini o Jesusini engaksï Krístu arhijka?” 18(Jimboka Pilatu mítetixapka eskaksï Jesusini epurhexapka, jimboksïsï intsïnharhitapti)

19Ka enga Pilatu útatsperakuarhu uaxakatini jápka, témba uandakua axakuspti: “Ásï ambe ma úku inde kaxumbitini, jimbokani chúri indeni jimbo kánekua nósesi tsánharhiska.”

20Ka k'éri tátecha ka achamasïchaksï andajtsïtperaspti eskaksï Barrabasini jurajkutarkorhepiringa ka eskaksï Jesusini uándikupiringa. 21Ka juramuti mókukuantaaspti: “¿Nénksïni jurajkuchea?” Ka imaksï “¡Barrabasini!” Uandaspti. 22Ka Pilatu kurhamarheaspti: “¿Ka ambe úkua Jesusini engaksï Krístu arhijka?” Ka iámenduechaksï arhispti: “¡Cháparhatanhe!” 23Ka juramuti arhiaspti: “¿Andi ambe nósesi úski?” Ka imaksï sánderu uinhachasïrempti: “¡Cháparhatanhe!”

24Pilatu exerini eskaksï nóteru kurhajchasïrempkia, eska sánderu méntkisï uinhachanhasïrempka, itsï p'itajkorhespti ka k'uiripuni japarini jupajkuntaspti uandaparini: “Ji nómbe ma míteska íni achetiri uarhikuani jimbo, chári jimboestia.” 25Ka iámenduechaksï arhispti: “Inderi uarhikua jucha ka juchari sapichaksï arhiparhatanhe.”

26Ka Barrabasini jurajkukuaspti ka Jesusini atarkorhespti ka cháparhatarkorheni.

27Ka juramutiri p'urhejkutichaksï imecheri k'umanchekuarhu páspti, ka jimaksï uirhipkurhaspti. 28Xukuparhakuaksï p'ikusti ka takusï charhapiti máksï k'uáparhataspti; 29ka kanakua tsurhumueri máksï inchajtsïtaspti, ka pirimu máksï jurhijkandani inchajkurhataspti. Xásïksï tinguixurhikutini teresmarhusïrempti arhiparini: “¡K'éri ambe arhinhe judiuecheri irecha!” 30T'uárhesïremptiksï ka sîmba ma jimboksï uájtsïskani. 31Xáni teresmarhutinksï p'ikuntaspti k'uáparhakuani ka imeri xukuparhakuaksï jatsikuntaspti ka pásptiksï cháparhatani.

Jesusi cháparhatanhasti

(Mc 15.21-32; Lc 23.26-43; Jn 19.17-27)

32Uératintkuksï jima, kúmaspti acheti Sireni anapuni ma enga Simoni arhinhempka; ka Jesusiri krúsinksï uinhapetarhu páraspti.

33Engaksï niárapka jima enga Gólgota arhinhajka (enga uarhiri éjpu arhikuekajka), 34Kauikua jeuetakata uitsakua xúrakua jingunksï íntskuspti, ka Jesusi ts'émutintku no uékaspti arhani. 35Engaksï Jesusini cháparhatapka, p'urhejkutichaksï imeri xukuparhakuani ch'anaparini arhungurhispti. 36Ka jimaksï uaxandentaspti kuáni. 37Ka krúsirhuksï karakata ma chájtsïtaspti enga arhimpka:

“Ísti Jesusi, judiuecheri irecha.”

38Ka ima jinguntuksï tsimani sïpajkurhechani cháparhataaspti, ma jurhijkandani ka máteru uikixkandani. 39Ka ima engaksï xáni jimesï nitamempka manajtsïskorhesïremptiksï arhimarheni 40ka arhisïremptiksï: “T'u engari k'éri tiósïoni xerentapiringa ka tanimu jurhiatekua jimbori úntani, engari sési jimbo Diósï uájpeka kuájpekorhe, ka krúsirhu kétsentsï.”

41Ka k'éri tátecha ka ístu juramukua jurhentpiricha ka achamasïchajtuksï májkueni teresmarhusïrempti ka uandani: 42“Máteruechani p'ímutantaasti ka kóru no úsïndi kuájpekorheni. Eka Israelicheri irecheka, krúsirhu kétsente ka jakajkukuakachi. 43Uandasïndi Diósïni mintsikani ka eskanha Diósï Uájpeska, eka Diósï xénhchajka kuájpentechka.”

44Ka sïpajkurhecha engaksï ima jinguni cháparhatanhapka májkuenksï útakusïrempti.

Jesusi uarhisti

(Mc 15.33-41; Lc 23.44-49; Jn 19.28-30)

45Teruxutini uénani ka téjkamatini jamberi parhakpeni iámu p'ajpakandespti. 46Téjkamatini ísï, Jesusi uinhachaspti:

“Eli, Eli, ¿Lema sabaktani?”

(Enga arhikuekajka:

“Jucheti Diósï, jucheti Diósï

¿Andirinisï jandiojku jurajku?”).

47Ka máru engaksï jima jápka, ísï kurharinksï uandasïrempti: “I Eliasïni uandajpaxati.” 48Ka jimajku ma, uiriaspti xurhata ma p'íkuni ka kauikua xarhiperakatarhu inchamaspti, ka kupamurhu ma jórhukuspti ka íntskuspti. 49Ka máteruechaksï uandasïrempti: “Jurajku, ju je exeni nándika Eliasï juuaka kuájpentani.” 50Ka Jesusi ménderu uinhachaspti ka espirituni íntspentaspti. 51Ka takusï k'uék'uetsasï enga tiósïo arhunhempka karutsanhespti; ka jenchespti ka tsakapuechaksï arhakurhispti. 52Ka jima engaksï uarhiricha pénhantempka, mítakorhespti ka uánekuaksï pímbinhaxeticha tsíntaspti. 53Ka enga Jesusi tsíntapka uarhirichajtuksï tsíntaspti ka Jerusalenksï inchaakuntaspti ka uánekuaksï exeaspti.

54K'éri purhejkuti, enga jima kuáni jápka, jenchekuani p'ikuarheratini ka exerini ambe enga úkorhempka. Xáni chéni uandasïrempti: “¡Sési jimbo, Diósï Uájpespti!”

55Jimaksï jarhaspti uánekua uarhiticha iauani uératini eraani, engaksï Jesusini Galilea uératintki chúxapapka jarhuatapani. 56Ka Maria Magdalena ka Maria Jakobueri ka Joseri amamba ka Sebedeo témba, imani uarhiticha jingunksï jámaxapti.

Jesusi jatsinhantasti

(Mc 15.42-47; Lc 23.50-56; Jn 19.38-42)

57Enga churepkia, acheti jatsikorheri ma, Arimatea anapu ma enga Jose arhinhempka, ka enga Jesusiri jurhengorheripka. 58Pilatuni niraspti jirinhantani ka Jesusini kurhakuntaspti. Pilatu juramuspti eskaksï íntskuntapiringa. 59Ka Jose, Jesusini takusï t'upuki jásï ma irhirhitaspti, 60ka jimbanhe jatsintskuarhu ma péraspti, enga k'erendarhu jarhanharhitarkorhepka, ka k'énhari tsakapu ma jatsimutaspti ka níntaspti.

61Maria Magdalena ka máteru Maria jimaksï jarhaspti uaxakatini.

P'urhejkutichaksï kuáxapti nani enga Jesusi pénhantapka

62Pauandekuarhu sábaduespti, ka tátecheri urhejtsïkuricha ka fariseuechaksï Pilatuni jinguni tángorhentaspti 63ka arhisptiksï: “Tata, míjpaskachi eska ima chkuándira, tsípiti jámani jatini uandaspka: ‘Tanimu jurhiatekua jimbo tsíntaaka.’ 64Axajpe, eska tanimu jurhia kuánhani janhaaka, ásïksï jurhengorheri jémbecha chúrekua pánte ka iretarhuksï arhijpeni: Tsíntasti ka sánderu k'éri ma chkuándirakua úkorheni.” 65Ka Pilatu arhiaspti: “P'urhejkutichaksï jimini jarhasti, ni je ka kuáni je eskajtsï na míteka.” 66Ka imaksï niraspti ka nani enga Jesusi pénhantapka sésiksï kuáxapti, tsakapu ma jingunksï sési mímutaspti ka kuárichanksï péraaspti.

Currently Selected:

San Mateo 27: DKPJ

Highlight

Copy