San Mateo 5

Jesusi juátarhu arhijtsïkpesti

(5.1—7.29)

1Xáni uáni exejpetini, Jesusi juátarhu ma karhamaspti ka jima uaxakaspti, jimajkanksï jurhengorheri jémbecha andarheraspti, 2ka ima uénaspti uandani ka jurhendaasïrempti arhiaparini:

Ambe enga Diósïni jimbo jukaparhakueka

(Lc 6.20-23)

3“Tsípeksï ima engaksï nómbe ma jimbo

k'éramakorhejka,

jimboka auandarhu anapu irechekua imecheriska”

4“Tsípeksï ima engaksï uerani jaka,

jimbokaksï sési arhinhantaaka.”

5“Tsípeksï kaxumbiticha,

jimbokaksï echeri aiakatani ima intsïnhaaka”.

6“Tsípeksï ima engaksï uékani jaka

eska úkorheaka eska Diósï na uéjka,

jimbokaksï úmenhaaka ambe engaksï uékani jaka.”

7“Tsípeksï p'amojpiticha,

jimbokaksï p'amojkunhantaaka.”

8“Tsípeksï ambakiti mintsita jataricha,

jimbokaksï Diósïni exeaka.”

9“Tsípeksï ima engaksï sési pájperakua ambe úni jámka,

jimbokaksï Diósï uájpa arhiauaka.”

10“Tsípeksï ima engaksï sési ambe úrini,

útasï atanhani kánhka,

jimboka auandarhu anapu irechekua imecheriska.”

11“Tsípe je cha engaksïni jíndeni jimbo útacheaka

ka atakuekanksïni ka mámaru ambeksïni

nósesi jásï ambe chkuándiraparini arhiparhatani.”

12Kánekua tsípe je, ka sési p'ikuarhera je,

jimboka auandarhu chári andakua káneska;

nóchkaksï Diósïri uandari tua anapuechani

májkueni ataaspi andi.

Etukua ka ambakiti t'íntskua

(Mc 9.50; Lc 14.34-35)

13“Chájtsï parhakpeni anapu etukueska, ka enga etukua nóteru etumarhaaka, ¿Ambeteru úni marhuasïnki? Nóteru marhuapirindi, xanharuterku k'uanitamanhasïndi ka jima t'auajchakunhasïndi.”

14“Chájtsï íni parhakpeni anapu erajkutakueska; k'éri ireta ma enga juátarhu karhakua jarhajka no úsïndi no xarharani. 15Ka erajkutakua májtu no étskunhasïndi ka purhechirhu ma kápchakuranhani, erajkutakua ch'urhinguarhusï péranhajti eska erajkutauaka iámenduechani engaksï k'umanchekuarhu jarhajka. 16Májkueni t'íntskare chári t'íntskua uánekuechani japarini, eskaksïni chánksïni sési ambe úni exerini, chári Táteni enga auandarhu jaka k'éri ambe arhiaka.”

Juramukueri ambe jurhentperakua

17“Ásï ísï eratse je eskani ji jurhaska Diósïri uandarichani ka Diósïri juramukuechani k'amajkuani, no k'amajkuanisïni juka, marhuataanisï juka. 18Jimbokaksïni sési jimbo arhixaka eskaksï parhakpeni ka auanda nótki k'amakurhini jauaka, ka iámendu ambe kurhadiranhaati eskamendu juramukuarhu na karakata jaka, ka iámu ambe ísï úkorheati. 19Ísï jimbo nákinderku nema enga juramukuechani no kurhajchauaka náuejki sánderu sapichu méni, ka ísï jurhentpeni, auandarhu anapu irechekuarhu kánekua sapichu arhinhaati; k'óru ima enga ísï úaka ka ísï jurhentpeni, auandarhu anapu irechekuarhu k'éri arhinhaati.”

Jesusi jurhentpesti ambe enga Diósï sánderu uéjka

20“Ísï jimboksïnisï arhini jaka, ekajtsï cha no sánderu sési jámaska eskaksï fariseuecha ka eskaksï juramukua jurhentpiricha, eska Diósï na uéjka, nójtsï inchaaka Diósïri irechekuarhu.”

Jesusi uandikperakueri ambe arhijpesti

(Lc 12.57-59)

21“Chájtsï kurhaskia ambe engaksï tua anapuecha arhinhaka: ‘Ásï uándikpe, ka nákinderku nema enga uándikpeska, k'amanharhiranhantaati.’ 22K'óruksïni ji arhixaka: Ima enga erachi jémbani ikiakuaka, indeni jimbo k'amanharhiranhantaati, ka ima enga erachi jémbani útakuaka, k'éri tángorhekuarhu k'amanharhiranhantaati, ka ima enga kánekuamendu nósesi útakuaka erachi jémbani, chpírirhu k'uanijpanhaati.”

23“Ísï jimbo, ekari kéjtsïtani jámani jima míantaska eskajtsï erachi jinguni arhirperatixaka, 24parhandikuani kéjtsïtakuarhu urhepani jurajku, ka ni urheta chéti erachi jinguni sési arhijperantani ka xásïri k'uanhatsentaaka parhandikua kéjtsïtani.”

25“Sóntku teruatperantsï je ne engajtsï jinguni arhirperatini jaka, engakini ima nótki útatsperakuarhu p'itajkorheni jauaka, ásïkini ima útatspirini intsïnharhite, ka útatspirikini ónhpirini, ka ónhpirikini k'ataperakuarhu incharani. 26Sési jimbokini arhixaka eskari no uéraaka ekari no urheta iámu maiampentaska.”

Jesusi ísku jándikueri ambe arhijpesti

27“Chájtsï kurhaska eska uandakata jarhaska: ‘Nóri jámaaka ísku jándini.’ 28Ka jíksïni arhisïnga eska ima enga iurhitskirini ma atamarheaka, eska ima mintsitarhu ísku jándi úkorheskia, imani iurhitskirini jimbo.”

29“Ísï jimbo, ekakini éskua jurhijkandani anapu terungutaraska, p'itanharhi ka k'uaniku, sánderu sésisti eskari ma ambe tsîtaaka ka nóri infiernurhu iámu k'uanijpanhani. 30Ka ekakini jájki jurhijkandani terungutaraska, kachujku ka k'uaniku, sánderuchka sésisti eskari ma ambejku tsîtaaka ka nóri infiernurhu iámu k'uanijpanhani.”

Jesusi jurajperakueri ambe arhijpesti

(Mt 19.9; Mc 10.11-12; Lc 16.18)

31“Ka ístu uandakata jarhasti: ‘Ne enga témbani nóteru xénhchaaka, úati karakata úkuni enga arhiaka eska jurajkuxaka.’ 32Ka jíksïni arhisïnga eska ne enga témbani ikimchaaka, ka no uarhitiri ísku jándikua jimboeni, ísku jándi úxati, ka ima enga uarhiti jurajkukatani tembuntaaka ísku jándixati.”

Diósïni aiakuni

33“Ka kurharixakajtujtsï ambe engaksï tua anapuecha arhinhaka: ‘Ásï jáma ísku uénani uandani ka tátsekuari no ísï úni, sési k'amata úni ambe engari Diósïni aiakuka.’ 34Ka jíksïni arhisïnga: Ásï méni jáma je auandani jimbo ambe ma aiatspeni, jimboka Diósïri uaxantskua jima jarhaska; 35ójtu parhakpeni jimbo, jimboka Diósïri jatandukueska, ójtu Jerusaleni jimbo, jimboka ima ireta k'éri irecheriska. 36Ka ástu jáma chéti éjpu jimbo ambe ts'ïrimerakuekani, jimbokari no jamberi úsïnga ma jauiri t'upujtsïkorheni ori turhiptsïkorheni. 37Ma ambejku uétarhesïndi eskajtsï uandaaka ‘Jo’ o ‘Nómbe’ jimboka nóambakitiriska ekajtsï jukari uandaaka.”

Jesusi atajperantskueri ambe arhijpesti

(Lc 6.29-30)

38“Kurhariskajtsï ambe enga uandanhaka: ‘Engakini nema éskua atacheaka, t'újtu éskua atakuntsï ka engakini nema sînichani etsaaskacheaska, t'újtu etsaaskakuantsï.’ 39Ka jíksïni arhisïnga: Ásï jáma je anhatsekuni imani enga nóambakeka; ekakini nema jurhijkandani páksanharhikuska, máteru akandantukini páksanharhikue. 40Ekakini nema útatsperakuarhu p'itajkorheska ka xukuparhakuakini euakorheni, chereparhakuajtu íntsku. 41Ka ekakini nema ambe sáni párakuekaska, iauani jamberi jarhuata páni. 42Íntskuakari imani engakini ambe kurhacheaka, ka ásï jáma no jiájkutani ne engakini ambe kuáneni uékaaka.”

Xénhchaa imechani engaksïni kurhunhejka

(Lc 6.27-28,32-36)

43“Ístujtsï kurhaaska ambe enga uandanhaka: ‘Chájku xénhchpera je ka kurhunhea je imechani engaksï ikiajchejka.’ 44K'óruksïni ji arhixaka: Xénhchaa imechani engaksïni kurhunhejka ka kómu arhijpekua je imechani engaksïni k'amarhentka útacheni. 45Ísïjtsï chári Táte uájpeuaka enga auandarhu jaka, enga imeri tata jurhiata jimbo no ambarhatichani ka kaxumbitichani t'íntskakuajka ka janirakuani. 46Ekajtsï cha imechantku xénhchaaska engaksïni chánksïni xénhchajka, ¿Ambejtsï andaa? ¿Andi nóksï májkueni jámasïnki tumina tánaticha? 47Ka ekajtsï cha, chári erachichantku uandajpaska, ¿Ambejtsï jukari sési ambe úxaki? ¿Nóksï no jakajkuticha jamberi ísï jámasïnki? 48Cháchka k'amak'amasï sési ambe u je, ísï eska chári Táte enga auandarhu jaka enga k'amak'amasï sési ambe újka.”

Currently Selected:

San Mateo 5: DKPJ

Highlight

Copy