San Mateo 8

Jesusi xúta jukarhekorhetini ma ambakerantasti

(Mc 1.40-45; Lc 5.12-16)

1Enga Jesusi juátarhu uératini kétsentapka, uánekuaksï chúxapaxati. 2Ka jima andarheraspti xúta jukari ma ka tinguixurhikuspti arhiparini:

–Acha, engari uéjka, úakarini ambakerantani.

3Ka Jesusi p'árheparini arhispti:

–¡Uéksïnga, ambakentsïa!

Ka xúta jimajku nónespti ka p'amenchati ambakentapaspti. 4Ka Jesusi arhispti:

–Exe, ásï nemani jáma aianguni, imantkukinisï arhijka eskari táta jinguni niuaka ka pa kéjtsïtakua eska Moisesiri juramukua na arhijka ka ísïksï ima mítetini jauatia.

Jesusi p'urhejkutiri jántspirini ambakerantasti

(Lc 7.1-10; Jn 4.43-54)

5Enga Jesusi Kafarnaumi inchaakupka, p'urhejkuti Róma anapu urhejtsïkuri ma andarheraspti ísï 6kómarhiparini.

–Acha, jucheti jántspiri juchenio apondikusti, ka no úsïndi manakorheni ka kánekua arhiraxati p'amerani.

7Ka Jesusi arhintaspti:

–Ji niuaka ka ambakerantaaka.

8Ka p'urhejkuti urhejtsïkuri arhispti:

–Tata, ji no nitatarheska eskari t'u juchenio inchaaka, májku uanda ka jucheti jántspiri ambakentaati. 9Ka nóchkani jíjtuni jamberi juramumenhasïni andi, ka jíjtuni p'urhejkutichani juramukuasïnga, ekani ima ma ísïni arhiaka: Ni arhini, ima nirasïndi, ka ekani máteruni arhiaka: Ju axu arhini, ima jurhasïndi, ka ekani jucheti jántspirini arhiaka: Arini ambe u, ima úsïndi.

10Jesusi ísï kurharini ísku pakareraspti ka arhiaspti imechani engaksï chúxapani jápka:

–Sési jimboksïni arhixaka, eskani nónani Israeli xéska nemani, xáni mintsikani eska i acheti na mintsikajka. 11Arhixakaksïni eskaksï uánekua juuaka tata jurhiata andarakuarhu uératini ka tata jurhiata inchajtsïkuarhu isï jamberi uératini, ka Abrani, ka Isaaki ka Jakobu jingunksï, auandarhu anapu irechekuarhu márku uaxakaati t'ireni. 12Ka irechekuarhu anapuechaksï uérakua pájpakandu petanhaati; ka jimaksïsï ueraati ka sïnichanksï kirisïmeantaati. 13Ka Jesusi p'urhejkuti urhejtsïkurini arhispti:

–Níntsa ka úkorhe eskari na mintsikaka. Ka p'urhejkutiri jántspiri ambakentapaspti.

Jesusi Pédrueri tarhampirini ambakerantasti

(Mc 1.29-31; Lc 4.38-39)

14Jesusi Pédruo niraspti ka jima xéntaspti Pédrueri tarhampirini apondikuni jarhani xáni tinharani. 15Ka Jesusi jupijkuspti ka ima tinharakuani jupinaspti ka jauaraspti ka sóntku ambe k'éndaaxaptia.

Jesusi uánekua p'amenchatichani ambakerantaasti

(Mc 1.32-34; Lc 4.40-41)

16Tirimarhandu, Jesusinksï uánekua nósesi jásï incharhetichani pákuaspti ka ima májku uandakua jimbo petarheantaaspti, ka iámendu p'amenchatichani ambakerantaaspti, 17ka ísï úkorhenia ima enga Diósïri uandari Isaiasi uandaka;

“Ima p'iuasti juchari p'ikuarherakuechani

ka juchari p'amenchakuechani.”

Máru engaksï Jesusini chúxapanhchempka

(Lc 9.57-62)

18Engaksï Jesusini xáni uánekua uirhipkurhatini jápka, Jesusi juramukuaspti jurhengorheri jémbechani eskaksï japundarhu parhimepiringa. 19Ka juramukua jurhentpiri ma andarheraspti ka arhispti:

–Jurhentpiri, chúxapaakakini nani uéjki engari niuaka.

20Ka Jesusi arhispti:

–Jiuatsïchaksï irekorhekua jatsikorhesti ka kuínichaksï xerekua jatsikorheasti, k'óru Acheti Uájpa no jamberi jatsikorhesti nani mintsikorheni.

21Ka máteru jurhengorheri jémba ma arhispti:

–Acha, sésikuarini íntsku nirani jucheti táteni urheta jatsintani.

22Ka Jesusi arhispti:

–Chúxapurini, uarhirichaksï niue uarhirichani jatsikorheantaani.

Jesusi tarhiatani anhaxustasti

(Mc 4.35-41; Lc 8.22-25)

23Jesusi icharhutarhu jataspti ka jurhengorherichaksï chúngumaspti. 24Ka japundarhu kánekua nósesi tarhiaspti, xáni ísï engaksï jenguerakuecha icharhutani ójchakurani jápkia. Ka Jesusi k'uípaxapti. 25Jimajkanksï jurhengorheri jémbecha tsínharhitaspti ka arhinksï:

–¡Acha, p'ímantsïjtsïni, uarhimexakachia!

26Ka ima arhiaspti:

–¿Andijtsïsï chéjki? ¡Nójtsï mintsikasïnga!

Ísï uandarini, jauaraspti ka xukaspti tarhiatani ka japundani ka iámendu ambe sési niántaspti. 27Imaksï xáni ísï ambe exerini uandasïrempti:

–¿Néxamue i acheti enga tarhiata ka japunda jamberi kurhajchajka?

Gadara anapuecha enga nóambakiti incharheaka

(Mc 5.1-20; Lc 8.26-39)

28Enga Jesusi japundarhu parhimepka, Gadarecheri echeri jimboksï tsimani nóambakiti incharheticha kúmaspti, engaksï uarhiri jántskuarhu uéndikupka. Kánekuaksï ikimenharhispti, xáni ísï enga jamberi no únhempka jimesï isï nitamanhani. 29Ka uinhachaparinksï uandaspti:

–Diósï Uájpa ¿Amberisï úejki juchantsïni jinguni? ¿Urhetkujtsïni jurhaski nósesi kántani?

30No iauani jarhareatini uánekuaksï kúchicha jámaxapti, 31ka nóambakitichaksï Jesusini kómarhispti, arhiparini:

–Ekajtsïni petarhentaska, sésikuajtsïni íntsku amani kúchichani incharheani.

32Ka Jesusi arhiaspti:

–Ni je.

Imaksï uérhpentatini kúchichanksï incharheantaaspti ka kúchichaksï kétsemani isï uiriaspti ka japundarhuksï uékameraspti ka jimaksï uarhimespti.

33Ka kúchi erangutichaksï sïpakorhespti ka iretarhuksï iámu ambe uandantaspti engaksï xáni nóambakiti incharheticha úkorhenchapka. 34Jiájkani iretarhu anapuechaksï niraspti Jesusini kúmani, ka engaksï exepka kómarhisptiksï eska uéakukuantaapiringa.

Currently Selected:

San Mateo 8: DKPJ

Highlight

Copy