ZLI VIRZI 19

Buymisemuŋ mingizla walahay Sodom, amma a laha Loto

1Ng'avi hiikuɗ na, modro ngi Buymisemuŋhoy mucuw tuwa, a ndilam le a Sodomo. Naɓa Lot aro joˀ zleˀe a mizlingre ngi ci ng'ar walahay Sodomo. Naŋ mupura taŋ keɗ na, a slikiɗ nga ji taŋ hirngaŋ, a huruk huruk a ruwuy. 2A ɓa taŋ: «Ambuh kum buy ɗuwoy, inga a ram bal ti hay gawla kumo, hinam wãˀ araŋ, bunaka sar kumoyo, yo timiprik na, kisa zuɓaka jiviɗ kumo.» Amma taŋ a mbiɗakaŋ di: «Ĩˀĩ, mbak ndr'i hinam avra si.» 3Amma Lot a hurdum hirdam kuy kuy, hã a ram, ara pam sar a hay naŋ. A da ka taŋ ɗafa waɗ ɗaf manja ˀis ara, joˀ taŋ a zumakaŋ. 4A ɓam ɓi ngi hin t'aruŋ si na, mizli ngir walahaya, a ndahaka haya gun, gawla ati midigila ngi Sodomoyo gar, mizli fec fec, ko mbur a ndir ta. 5A zilaka Loto, a ɓakaŋ: «Mizli musoko ngi hiikuɗ hana ngi hay ɗik na, taŋ amaka? Bo taŋ ng'avi ndra aka, i hinam taŋ.» 6Lot a bo deŋ avu miviŋ, a guco di zlindim ti dirba, 7a ɓa taŋ: «Ambuh kum sukum ɗuwoy, ki gaka malambaˀ hana ta. 8Y'ada ti ziri diilihey cuw, a sinam ziley ɗaˀ t'aruŋ, y'ani sukum taŋ, kisa gam taŋ gwat kum mawuɗama. Amma anja ki wusaka mizli tayna neˀ ta, asi a soko a hay ɗu.» 9Taŋ a mbiɗakaŋ di: «Kirih nga kẽh!» Joˀ a ɓam ma: «Mbur hana a slikiɗo ti slikiɗ ma na, a wuɗ a biga ndra ɓi kwa? Da kine na, i ra gakaŋ malambaˀ fineˀ ngi mulakay vuna jaka.» A paka haŋ sek da Loto, a kiraham ng'avi miviŋ ɓa a ngilakaŋ. 10Amma mizli mucuwoy tuwa, a tilaka haŋ, a jaka Loto ng'avi taŋ a hay a muŋ, a gicaka miviŋ zlindim. 11A hulufoko mizli migweˀgweˀhey a ciki miviŋ na, zle avi ziri, hã avu mizli madiɗahay, ko a lumaka mizlingre ti ka ta. 12Mizli mucuwoy tuwa, a ɓaka Loto: «Mbur ɗik mekelem adaka aruŋ kwa? Ko jomo ɗik, ziri mizilehey, ziri mongosohoy. Gwat ɗik misi ar walahay gar na, bi taŋ tir walahay hana avra. 13Naŋ kine, i sa zizaka walahaya, asi tuwuy ti gwat ngi gi naŋ na, a gi le haɗi a mbuŋ Bumbulvuŋ. Vurˀe, a slino ndra ɓa i zizakaŋ.» 14Lot a bi, aru ng'avi jomo naŋhay mawuɗ a zuɓaka ziri naŋhaya, a ɓa taŋ: «Slikiɗam, bam tir walahay hana, asi Bumbulvuŋ a wuɗ a ziza walahaya.» Amma jomo naŋhay a puraka kaɓa a ɓi di i ɓi ngi singir. 15Ti li mawun wehweh na, modro ngi Buymisemuŋhoy tuwa, a hurdumom ti Loto, ɓa a wus vu, a ɓakaŋ: «Slikiɗi! Zuɓa ngwas ɗik ati ziri mongoso ɗikey mucuw misi akaka na, cuh vur ka mazizi asi malambaˀ ngi walahay hana.» 16A puraka na, Lot ara zum vu aruŋ, modro mucuwoy tuwa, a ɗiɗaka kaw avu haŋ waɗ ngwas naŋ ati ziri mongoso naŋhay mucuw tuwa, asi Bumbulvuŋ a puraŋ ircece le, a bo di tir walahay ng'avra. 17Ti taŋ mubam di nga duba gala na, pal a wuzla modrohoy tuwa, a ɓa Loto: «Kil ɓa ki laha hutuŋ ɗike. Ki puro hiri murdirba ta, ko ki cici asi ruwuy hana ta. Da ki wuɗ laha hutuŋ ɗike le na, kil nga muwã.» 18Lot a ɓa taŋ: «Ĩˀĩ, Buymisemuŋ, a gi ta! 19Ani, ki puriy ircece le, yo ki giy mezle le haɗa ti ka milihiy hutuŋ na so. Amma ɓa yi kil sesẽŋ a muwã, manja mendere hana a jiy is, i muc a jiviɗe ta na, i kil gu ta. 20Pura walahay ngi diga na, naŋ gweˀ neˀe, yo naŋ meciɗeke, zuwen i ra ɗum araŋ, ɓa ngi laha hutuŋ ɗu na, naŋ preˀ kwa?» 21Modro a mbiɗaŋ di: «Naŋ kuy! I tiɓa le, y'anta sa wusa walahay ka maɓiy di hana ta. 22Wus vu, ara ɗum a diga kutum, asi y'anta sa gi gwat neˀ ta, sey da ka mindil le a diga far.» Vurˀe, a zilaka walahay nah Soˀar. 23Lot mindil a Soˀar na, naɓa pas ara bawa. 24Dar Bumbulvuŋ a po vu ngi barudu matiɓi njilim njilim ng'ar walahay Sodom ati Gomoro kaɓa vuŋ magi. 25Walahay tayna, hirwuy ati mizli ngi raˀahaya waɗ gwat mupusa ngi raˀahay gar na, a mbiɗa taŋ, a wurataŋ cek. 26Ngwas ngi Lot a pur hiri murdirba, a tiri mandaŋ sirlim, kaɓa gwat mindira ti ndir. 27Cẽẽt ngi miprik na, Abraham aru ng'ar li naŋ micici a mbuŋ Bumbulvuŋ tuwa. 28A pur hiri kini nga Sodom, Gomor ati hirwuy ngi ciki taŋhay gar na, a pur cunju tirslik, ara ngis zle a ruwuy nga muŋ ka hay mawur. 29Dambalaka, ti Buymisemuŋ maziza walahay ngir li tayna, misi Lot ara na, ara wulka Abrahama keŋŋe, a ɗiɗo Loto ti wuzla bonoyo ng'avra.

Lot ati ziri naŋ mongosohoy

30Akẽh na, Loto a zluwun ngi cifi a Soˀara. Vurˀe, a pula walahaya, ara cifi a muwã. Ziri naŋ mongosohoy mucuwo, a ram aseˀeŋ. A cifam ati ziri naŋhay ar butum. 31Ngi pas mekeleme, zuŋ madiɗa a ɓa meciɗeke: «Cine ndra a gi gal le, ani mbur zil anta asi ruwuyo, ɓa a so gi ti ndra ngwas ka mizli gar magam na ta. 32Akum! I ra vulaka mbaazla da cine ndra, ɓa a wi, a sa hin ti ndra, i yakaŋ dideˀhey.» 33Ngi duvuɗ nah na, a vulaka mbaazla da cine taŋ, a wi, joˀ zuŋ madiɗa a ci, a hinam ati cine. Taŋ mihinam, yo zuŋ misa slikiɗ gar na, ko cine a si na neˀ ta wãˀ. 34Li naŋ muwun ma na, zuŋ madiɗa tuwa, a ɓa sukum naŋ meceɗeke: «Pura ɗi, i hinam le ati baha. I vulakaŋ mbaazla duvuɗ dana ma, ɓa ki ra hinam cuwa aya. Ɓa i yakaŋ dideˀhey.» 35Ngi duvuɗ nah na, a vulaka mbaazla da cine taŋ ma. Zuŋ meciɗek a ru, ara hinam ati cine, taŋ mihinam, yo zuŋ misa slikiɗ gar na, ko cine a si na neˀ ta. 36Ziri mongosohoy mucuw tuwa, a gam hur le ti cine taŋ Loto. 37Zuŋ madiɗa a yi mangal mizile, a zila Moˀap, naŋ i dideˀ ngi Moˀapay hã danaŋ. 38Zuŋ meciɗeke kwana, a yi mizile vuna ma, a zila Ben-Ami, naŋ i dideˀ ngi Amoŋhoy hã dana.

Currently Selected:

ZLI VIRZI 19: BEGDC

Highlight

Copy