ZLI VIRZI 25

Muc ngi Abraham, ziri naŋ mizilehey naŋ miya taŋ ti Ketura

1Abraham a zuɓ ngwas mekelem, a zilaka Ketura. 2Ketura a yaŋ Zimran, Yokzan, Medan, Madiyan, Iselak waɗ Suwa. 3Yokzaŋ a yi Saba ati Dedaŋ. Ziri mizile ngi Dedaŋhay i Asurihey, Letusihey ati Leyomihey. 4Ziri mizile ngi Madiyanay i ti Efa, Efer, Hanok, Abida waɗ Elda. Hanayna i dideˀ ngi Keturahay cek. 5Abraham a pula zlili naŋ gar da Izak. 6Amma da ziri ngi mangasl naŋhay na, a vula taŋ zlili ti vul si. Ti naŋ mumuc t'aruŋ si na, a ɓula taŋ kileŋ avu mangal naŋ Izaka, kini ngir tisi pas ngi mipriki. 7Abrahama a gi vi skat ti kukur tarnaˀ nga zlum. 8Hutuŋ naŋ a tiki, a muc i midigila muzuy zuy, a gi gal le haɗi fineˀ gidaŋ. Joˀ a jum ng'avi dideˀ naŋ mumucahay. 9Ziri naŋhay, ti Izak ati Ismayel a dikaka angi butum ngi Makpela, misi ar guva ngi Efroŋ, mangal ngi Soˀar mbur Hiti, gweˀ a mbuŋ Mamre, 10angi guva Abraham mihiɗika zleˀe avu dideˀ ngi Hetey. A dikaka Abraham ati ngwas naŋ Sara a diga. 11A dirba Abraham mumuco, Buymisemuŋ a ɗuwula mi le da Izaka. Izak a pa haya gweˀ a vi vigiɗ ngi yam ngi Lahay-Roy.

Dideˀ ngi Ismayeley

12Ismayel, mangal ngi Abrahama, ɓi ngi dideˀ naŋhay ani. Agar, zuŋ Ezipte miyaŋ di. Agar i beke ngi Sara. 13Slimiɗ ngi dideˀ ngi Ismayeley ani, vur mijingaˀ vur mijingaˀ: Nebayot i modogom ngi Ismayel, Kedar, Atbeyel, Mibisam, 14Misema, Duma, Masa, 15Hadat, Tema, Yetur, Nafik waɗ Keɗma. 16Dideˀ ngi Ismayeley mukuruˀ nga cuwo i taŋ, mbur gar i buy ngi sukwi taˀ ngi sukwi taˀ, a zilaka walahay taŋhay ati guɗukoy taŋ mipaka, ti slimiɗ taŋ tayna tehhe a muŋ. 17Ismayel a gi vi skat ti kukur makir nga tarnaˀ, hutuŋ naŋ a tiki, dar a jum ng'avi dideˀ naŋ mumucahay. 18Dideˀ ngi Ismayeley a cifam ar wala ngi ruwuy Havila ati Sur, Suro naŋ gweˀ avu Ezipte, angi jiviɗ nga Asur. Angi joˀ taŋ na, a wuɗam kiɗa vu ar wala taŋ sukumuŋhoy.

Zakop 25—36

Rebeka miya Esaw ati Zakop

19Izak, mangal ngi Abraham, a dirba Abraham miya na, ɓi ngi dideˀ naŋhay ani, 20Izak a gi vi kukur mufaɗa, a zuɓ ngwasa, i Rebeka zuŋ ngi Betuwel, mbur A ram, vay muŋ ngi Mezopotami. I sukum ngi Labaŋ. 21Rebeka i dirlay, Izak a tumbulo Bumbulvuŋ vurˀe. Bumbulvuŋ a puraŋ ircece le, ngwas naŋ Rebeka a gi hur. 22Dambalaka ziri ara dumbuslam vu a kwacay naŋ vuna, dar a ɓi ti gidaŋ: «Mindilo avu ya i gwat mike?» Aru nga cufuɗa Bumbulvuŋ. 23Bumbulvuŋ a mbiɗaŋ di: «I sukwi cuw misi a kwacay ɗike, i sukwi ngi mizli wal wal cuw masa boko tivi ka. Mekeleme a sa funa numuŋ ti gidaŋ, madiɗaŋ a sa gi gawla ngi meciɗeke.» 24Hin naŋ mindila ɓa a yi muduba na, i ziri misahay misi a kwacaya. 25Mubo dumbuŋ, naŋ gagaza, vu naŋ gar i ngwic ka garak ngi ginew, a zilaka Esaw. 26A dirba nah, sukum naŋ a bawa, haŋ naŋ kpak kpak a vi mododok sar ngi Esaw, a zilaka Zakop. Ti taŋ miyaka taŋ na, naɓa Izaka naŋ ti vi kukur merkeɗe. 27Ziri mizilehey tuwa, a gilam. Esaw a tiri gaw mawi haŋ kuy kuy wãˀ, i mbur mawuɗ ɓuh. Amma Zakopo, i mangal misi lesl, a ndir kulaˀ a hay. 28Izak a hĩyã Esawa le, asi a wuɗ useˀ ngi gwat ngi ɓuh haɗa. Rebeka a hiyĩ nga naŋ i Zakop. 29Ngi pas numuŋ ada na, Zakop ara di lar munguɗusla, gagaza. Esaw a so ti ɓuh, a gir le kupuyah, 30a ɓa Zakopo na: «Puliy i sliɓi lar munguɗusla ɗik gagaza na neˀ takwa, asi i gir le kupuyah wãˀ.» Taŋ mizilaka Edom na vurˀe, a mbiɗeˀvra gagaza. 31Zakop a mbiɗaŋ di: «Puliy dana i hiɗika gi modogom ɗik na, ɓa i tiri modogom.» 32Esaw a ɓi: «Ani i wuɗ i mucu, gi modogom vuna, a puliy gir ngi mike?» 33Zakop a ɓaŋ: «Hudum wurenna a mbuŋ ɗu.» Esaw a hudum, a hiɗika gi modogom naŋ le da Zakopo. 34Dar a vula ɗaf waɗ lar munguɗusla gagaza tuwa da Esawa. Esaw a zum, a si, a slikiɗ, a cuh. Esaw a pura gi modogomo hiris le.

Currently Selected:

ZLI VIRZI 25: BEGDC

Highlight

Copy