ZLI VIRZI 28

1Izak a zila Zakopo, a ɗuwulaŋ mi, a ɓaŋ: «Anja ki zuɓ ngwasa i zuŋ Kanaˀan ta. 2Amma slikiɗi, aru nga ruwuy vay muŋ ngi Mezopotami, a hay Betuwel, cine ngi munuku. Ki sa zuɓ ngwas a diga, a wuzla ziri ngi gumseˀ ɗik Labaŋ. 3Anja Buymisemuŋ misi gidaŋ wãˀa, a ɗuwuluw mi, a vuluw ziri haɗi, dideˀ ɗikey a sa jam haɗi, ɓa ki ɗuv walahayay taˀ taˀ mbeˀ mbeˀ. 4Anja a ɗuwuluw mi, da ka ati dideˀ ɗikeye, kaɓa naŋ miga da Abraham na ya, ɓa hirwuy mulak ka misi anga hana, a ndir da ka, i hirwuy Buymisemuŋ muvula da Abraham.» 5Izak a ɓa Zakopo ɓa aru nga Mezopotami vay muŋ ngi hay Labaŋ mangal ngi Betuwel, mbur A ram, sukum ngi Rebeka, mumuŋ ngi Zakop ati Esaw. 6Esaw a cine na, Izak a ɗuwula mi le da Zakopo, yo a slina le ɓa ara zuɓ ngwas a ruwuy Mezopotami vay ngi muŋ, yo ti naŋ maɗuwulaŋ mi na, a ɓaŋ na: «Ki zuɓ ngwas a wuzla ziri ngi Kanaˀanaya ta.» 7Zakop a cine mi da cine ati mumuŋ, aru nga ruwuy Mezopotami so. 8Izak anta hĩyã diili Kanaˀanay na ta na, Esaw a sla wala nah le muduba. 9A wuluk ɓa a zuɓ ngwas mekelem, a ru, ara luuma Ismayel mangal ngi Abrahama, a zuɓa zuŋ naŋ mazilaka Mahalat, sukum ngi Nebayot na.

Musuwun miga Zakop a Betel

10Akẽh na, Zakop a slikiɗ baɗ a Berseba, aru nga Haraŋ 11Pas a diɗ di gurjik ar li numuŋ ada, a zuɓ ɗugur ngi kẽh pal, a tih di hirngaŋ, a hin wãˀ akẽh. 12Musuwun a gaŋ: A pura na, li ɗuva sar gaˀ gaˀ, zle a ruwuy hã sesẽŋ a muŋ, modro ngi Buymisemuŋhoy ara jiɗam, ara poko sar ti nga. 13A pura Bumbulvuŋ deŋ a cikeˀe, a ɓaŋ: «I ya Bumbulvuŋ Buymisemuŋ ngi dunuk Abraham, waɗ ngi Izak. Hirwuy ka mutup anga hana, i sa vuluw di da ka ati dideˀ ɗikey. 14Dideˀ ɗikey a sa tiram haɗi kaɓa murɓuk a ruwuy. Ki sa ndahaka hirwuyo ng'asi pas ngi pastaˀ, ng'asi pas ngi miprik, ngir ti vay muŋ waɗ ngir ti vay ruwuy. I sa ɗuwula mi da sukwi ngi mizli ngisi ruwuyoy gar tisi ka ati dideˀ ɗikeye. 15Pura ɗi! Y'ada ati ka, i sa jiginuw ar li ka masa ru ara gar, i sa mo ti ka nga ruwuy hana, vur y'anta sa puluw fuk ta, hã ɓi ya muɓuw di na, i ga gbaˀ.» 16Zakop mupuɗuk na, a ɓi: «Oy! Bumbulvuŋ naŋ da aka gisiŋ, amma i si na zleˀe ta!» 17A zluwun, a ɓi: «Kay! Li hana, i li ngi zluwuna vu, ingatara ta, i hay ngi Buymisemuŋ gisiŋ, yo i mizlingre ngi muŋ.» 18Zakop a slikiɗ ngi miprik prik, a zuɓa ɗugur naŋ mitih di hirnga tuwa, a nga kaˀ, a paŋ mal, ɓa a ndiri ɗugur mipal. 19A zila li nah Betel, a mbiɗeˀvra hay ngi Buymisemuŋ. Amma zleˀe na, a zilaka Luz. 20Dar Zakop a hudum, a ɓi: «Da Buymisemuŋ naŋ da ati ya, da a jiginiy le ar mulak ɗu ya mazuɓa, da a vuliy gwat ngi zum le, waɗ zana ngi ki, 21yo da yi mo le zuy zuy ngi hay baha na, naɓa Bumbulvuŋ a sa tiri Buymisemuŋ ɗu. 22Ɗugur ya minga kaˀ hana, a sa tiri hay ngi Buymisemuŋ, i sa vulaŋ mukuruˀ ngi gwat naŋ muvuliy di le gar.»

Currently Selected:

ZLI VIRZI 28: BEGDC

Highlight

Copy