ZLI VIRZI 37

Zozef muslufa musuwun naŋ da sukum naŋhay

1Zakop a cifi angi hirwuy Kanaˀan, hirwuy cine mislikiɗ zleˀe ng'araŋ. 2Ɓi ngi ziri ngi Zakopoy ani: Zozef i gawla ngi vi kuruˀ nga tarnaˀa, a jigin tumuŋhoy waɗ ˀaway ati sukum naŋhay. Zozefe, taŋ zlaɓ zlaɓ ati ziri ngi ngwas ngi cine naŋhay, Bila ati Zilpa. Sukum naŋhay madirɗaka taŋ na, a so ga mbaɗa naŋ da cine taŋ. 3Zakop a hĩyã Zozefe haɗi fineˀ ziri naŋ mekelemey gar, asi a ya ti naŋ migi midigila le. A kaŋ zana hirnga, 4yo sukum naŋhay a puraka na, cine taŋ a hĩyã Zozefe fineˀ taŋ gar. A zlaka a gam di mesene, ko a ɓakaŋ ti ˀay mezle ɗaˀ mata wãˀ. 5Akẽh na, Zozef a musuwun, a slufa ɓi nah da sukum naŋhay, amma taŋ a gam di mesene ti gidaŋ jak. 6A ɓa taŋ: «Cinaka ya mumusuwun ɗi 7I roko a wuzla guva, i ra pam alkamari a mizer mujuwahay kaˀ kaˀ, neˀ na mizer ɗu a slikiɗ deŋ, mizer kumoy a so gunoko hirnga naŋ gun, a hurukom a mbuŋ naŋ.» 8Sukum naŋhay a mbiɗakaŋ di: «Ki wuɗ na, ki tiri buy ndra ɓa ki wa ndra sukwa?» A gam di mesene ti vendeke ava ma jak, vur musuwun naŋ ati mingiɓi naŋ miɓa na. 9Zozef a musuwun ma, a kiɗa slir naŋ da sukum naŋhay tuwa ma ni, a ɓa taŋ: «I musuwun le ma: pas, kiya waɗ wurzlaŋhay kuruˀ ngaŋ kaˀa, ara hurukom a mbuŋ ɗu.» 10A slufa da cine kaɓa naŋ muslufa da sukum naŋhay tuwa ma. Cine a bucaŋ, a ɓaŋ: «I musuwun ngi mi hana ka? Ɓa ya ati munuk waɗ sukum ɗikeye, i hurukom a mbuŋ ɗike sukwa?» 11Sukum naŋhay a gam di suloŋ, amma cine a ja ɓi nah le a hirnga.

Sukum ngi Zozefey mihiɗikakaŋ avra nga hirwuy Ezipte

12Sukum ngi Zozefey a ram nga Sikem, ɓa ara jiginaka ginew ngi cine taŋ zakop a diga. 13Cine taŋ a cufuɗa Zozefe na: «Sukum ɗikey a ram le nga jigina ginewey a Sikem takwa? Sawa ɓa yi slinuw ng'avi taŋ.» Zozef a mbiɗaŋ di: «Y'ani.» 14Cine a ɓaŋ: «A ra pura, da sukum ɗikey taŋ kuy kuy kwa, malla da gineweye, taŋ kuy kuy kwa mbrike na, ɓa ki siy ti labara nah. Cine a slinaŋ baɗ ar sozo ngi Hebroŋ, joˀ Zozef aru nga Sikeme.» 15Mbur a lumaŋ naŋ maliˀi lambaˀa ɓuh, joˀ mbur tuwa, a cufuɗaŋ: «Ki ru ti sipi mike?» 16A mbiɗaŋ di: «I sipi sukum ɗuwoy. A jiginam ar li wanaka, inga ɓiy di takwa!» 17Mbur tuwa, a mbiɗaŋ di: «A slikiɗam le baɗ aka, asi yi cin taŋ maɓam na le: Akum nga Dotaŋ.» Zozef a sipa sukum naŋhaya, ara luuma taŋ a Dotaŋ. 18Sukum naŋhay a puraka kileŋ, ɓa a sa ndilo gweˀ avu taŋ tikeˀe na, naɓa a juwam ɓi le vurˀe, ɓa a kiɗaka vagay. 19A ɓam ar wala taŋ: «mbur mamusuwun haɗa tuwa n'ani sawa diga. 20Naŋ kasl so! Akum! Kuɗukum di vagay, hizigukum vagay naŋ ng'ar vigiɗi. I sa ɓam gwat mijivu a humbuɗa le. I sa puraka da musuwun naŋ na, a sa gi mbri ska na.» 21Ruben a cine le, a wuɗ ɓa a lahaŋ tisi haŋ taŋ, a ɓi: «I kiɗaka vagay ta.» 22Ruben a wuɗ ɓa a laha tisi haŋ taŋ, ɓa a mi di da cine, a ɓa taŋ na: «Ki pam pumbus ta, hizigakaŋ ng'ar vigiɗ ngi wuzla ɓuh mikirɗak kirɗak hana, amma ki jaka haŋ ava ta.» 23Zozef mindilo ndil avu sukum naŋhaya si na, a cukokoŋ zana avra, zana ngi slimiɗ miɓaˀ avu vu tuwa. 24A jaka, a kaka ng'ar vigiɗi. Vigiɗ nah naŋ njololoŋ kine, yam anta ara ta. 25A dirba nah, a cifam ɓa a zumam. Keɗ na, Ismayeley hiɗim hiɗim, a ndiloko ti Galaˀat, yo zlogomo taŋhay ara jijiroko tebeɗ ati mukuturɓuy mazilaka ladanum mãzaˀm ndum waɗ urdihey, a ram taŋ nga Ezipte. 26Zuda a ɓa sukum naŋhaya: «Ɓa i kiɗaka sukum ndra vagay, i ɗumoko pumbus naŋ na, i lumam di mike? 27Hiɗikukum di avu Ismayeley na, amma i jaka haŋ ava ta. Asi sukum ndr'i vu ndra.» Sukum naŋhay a cinakaŋ mi. 28Mizli Madiyan migi tererehey macohomo, a boko ti Zozefe tir vigiɗe ng'avra, joˀ Ismayeley a hiɗikakaŋ suloy kukur cuw, taŋ a ram di nga Ezipte. 29Ti Ruben mumo nga mi vigiɗe na, a luuma Zozefe anga mata. A ngira zana naŋhaya, 30dar a mi ng'avu sukum naŋhaya, a ɓa taŋ: «Mangala naŋ anta angi vigiɗe mata! Na yi sa ra ci a ma ska?» 31A zuɓaka zana ngi Zozefe, a slam ˀay ngi bazuway, a juguɓoko zana tuwa jugoɓ ar pumbuso. 32A slinam ti zana ngi slimiɗ tuwa da cine taŋ, a ɓakaŋ na: «I lumaka ti lum. Pura, da i zana ngi mangal ɗik kwa, malla inga naŋ ta kwana.» 33Zakop a si na le, a zla widi, a ɓi: «I zana ngi mangal ɗu! Gwat mijivuhoy a humbuɗaka le, a puwaka Zozefe le!» 34Zakop a ngira zana naŋhaya, a juwa kwacaya wak ti zana ngi vagay, dar a tuwa mangal naŋ hin mbeˀ mbeˀe. 35Ziri naŋ mizilehey ati mongosohoy gar a soko, ɓa a tikinakaŋ ar li tuwuyo, amma a ngum taˀa tuwuyo ta na si, asi a ɓi na: «I sa ra luuma mangal ɗu ar li ngi mizli mumucahaya, ti tuwuy aruŋ na si.» Dar ara tuwa mangala. 36Yo Madiyanay tuwa, ara hiɗikaka Zozef tuwa da Potifar angi hirwuy Ezipte. Potifar i mbur ngisi mevel ngi buy madiɗa ngi Ezipte, yo i madiɗa ngi soje mijigina hay ngi buyoy.

Currently Selected:

ZLI VIRZI 37: BEGDC

Highlight

Copy