ZLI VIRZI 40

1A dirba gwat tayna migam na, gawla ngi buy Eziptehey, madiɗahay cuw, a gam mungra ava. I buy ngi migi slra ngi gwat ngi sihey ati buy ngi migi slra ngi ɗafay. 2Buy madiɗa ngi Ezipte a ji mevel haɗi angi gawla naŋ madiɗa mucuw tayna, buy ngi migi slra ngi gwat ngi sihey ati buy ngi midi ɗafaya. 3Dar a pa taŋ ng'ar dangay, a hay buy ngi soje mijigina hay ngi buyoy, a wazlaray, ar li migicaka Zozef ara tuwa. 4Buy ngi soje mijigina hay ngi buyo, a vula taŋ Zozef ɓa a gi gawla taŋ, yo a zikam le neˀ ar dangaya.

Zozef mimbiɗa pulaˀvra ngi musuwun ngi gawla ngi buy Eziptehey cuw

5Ngi duvuɗ mekelem ada na, madiɗa ngi migi gwat ngi sihey ati madiɗa ngi midi ɗaf ngi buy Eziptehey a musuwunam cuw taŋ ar dangaya. A musuwunam pal pal, ti mbiɗeˀvra taŋhaya pal pal. 6Ngi miprik naŋ na, Zozef a so ng'avi taŋ, a sa luuma taŋ ara ndurɓom hiri. 7Dar Zozef a cufuɗa taŋ asi taŋ bummoˀ ar dangay ar hay ngi buy taŋ, a ɓa taŋ: «Ki ndurɓom hiri mi dana ka?» 8A mbiɗakaŋ di: «I musuwunam le, na mbur mambiɗa ndra mbiɗeˀvra naŋ gu anta. Zozef a ɓa taŋ: Ma mbiɗa mbiɗeˀvra naŋ i Buymisemuŋ takwa? Slufikiy kum mumusuwunam vuna. 9Madiɗa ngi migi gwat ngi sihey a slufa musuwun naŋ da Zozefe, a ɓaŋ: «I musuwun na, widis mubam vu ati gudubun kaˀ a mbuŋ ɗu. 10Mihaŋ ava ɓaˀ ɓaˀ makir, a hil ɗangal, a fuyuk, a dirba nah, yi minaha ava locok locok. 11Ya ti sikiɗ ngi buy madiɗa ngi Ezipte kaw a haŋ, i ngila yi ngi gudubun mulocok tuwa, i ɗuco ng'ar sikiɗ ngi buy madiɗa ngi Ezipte, dar i vulaŋ di a haŋ naŋ.» 12Zozef a ɓaŋ: Mbiɗeˀvra ngi musuwun ɗike n'ani. Mihaŋ miɓaˀ ɓaˀ makir na, i hin makir. 13A ndir hin makir, buy madiɗa ngi Ezipte a sa puluw ɓa ki mumul, a sa cufuw ar li ngi slra ɗik a muŋ, kisa vula gwat ngi si da naŋ buy madiɗa ngi Ezipte, kaɓa ka maga zleˀe ti ka misi i madiɗa ngi migi gwat ngi sihey na. 14Amma da ka misa cifi le kuy kuy na, wuluk ar ya, ɓa ɓi ɗu ti mezle a mbuŋ buy madiɗa ngi Ezipte, yo bi ti ya tir hay misenna. 15Asi mike na, a joko ya baɗ a ruwuy ngi Heberey, yo aka vuna ma na, yi gi gwat ɓa a cikiy ar dangaya ta.» 16Madiɗa ngi midi ɗafaya, a pura na, Zozef a mbiɗa mbiɗeˀvra ngi musuwuno le tir mezleŋ, a ɓaŋ na: «Yi musuwun le ya, gadagaray jirngasl jirngasl makir a hirnga ɗu, ti makala ti sukwi mbeˀ mbeˀ araŋ, 17Angi gadagar vay ngi muŋ na, makala ti sukwi mbeˀ mbeˀ, buy madiɗa ngi Ezipte mawuɗ ada angaŋ. Dar ɗiyuwoy ara ndam gwat misi ar gadagar misi a hirnga ɗu tuwaŋ.» 18Zozef a zla a ɓaŋ: mbiɗeˀvra ngi musuwun ɗike n'ani. Gadagar mimakir na, i hin makir. 19A ndir hin makir, buy madiɗa ngi Ezipte a sa bukuw hirnga. A sa luwuw law ar widis, ɗiyuwoy a sa ndaka useˀ ɗike.» 20Dambalaka, hin mimakir tuwa na, i muguzlum ngi buy madiɗa ngi Ezipte micifi buy madiɗa. Adi ɗaf madiɗa da gawla naŋhay cek, a zilo madiɗa ngi migi gwat ngi sihey ati madiɗa ngi midi ɗafay nga mbuŋ taŋ. 21A mi ti madiɗa ngi migi gwat ngi siheye ng'ar li naŋ a muŋ, ɓa a vulaŋ gwat ngi si a muŋ. 22A luwa madiɗa ngi midi ɗafaya law a muŋ, kaɓa Zozef miɓa tuwa. 23Amma madiɗa ngi migi gwat ngi sihey tuwa, anta ɓa ɓi ngi Zozefe mata, a puyuk di hirnga le.

Currently Selected:

ZLI VIRZI 40: BEGDC

Highlight

Copy