ZLI VIRZI 42

Zakop mislina ziri naŋhay nga Ezipte

1Zakop a cine na, daw ada a Ezipte, a ɓa ziri naŋhaya na: «Ki puram vu avu hiri avu hiri mbrike? 2Yi cine na, daw ada a Ezipte, ara hiɗikoko ndra di a diga, ɓa i ngiram, i micam ta. 3Sukum ngi Zozefey kuruˀ, a ram nga hiɗika daw a Ezipte. 4Amma Benjameŋ mijingaˀ ngi Zozefe, Zakop a slina asi sukum naŋhaya ta, asi a ɓi na: «Anja gwat ngi mendere a gi ava ta. 5Israyeley a ram le nga hiɗika daw a Ezipte kaɓa mizli gar, asi may a tisla hirwuy Kanaˀana le.

Zozef migi ti sukum naŋhay, kaɓa a si na taŋ ta

6Miwa hirwuy i Zozef, yo ara hiɗika dawa da mizli ngi ruwuy naŋhaya. Sukum ngi Zozefey a ndiloko, a hurukom a mbuŋ naŋ. 7Zozef mupura sukum naŋhay keɗ na, a si na taŋ le. Amma naŋ a njika taŋ vu ta, a buca taŋ ti buc ti buc. A ɓa taŋ: «Ki soko ti damaka?» A mbiɗakaŋ di: «Ti ruwuy Kanaˀan, nga hiɗika gwat ngi zum.» 8Zozef a si na sukum naŋhaya le, amma taŋ a sinakaŋ ta ɓula. 9Akẽh na, Zozef a wulka musuwun naŋhay ti sukum naŋhay tuwa, dar a ɓa taŋ: «Kum mupura lihey, ki soko na, ɓa ngi pura hĩhĩy ngi hirwuy ndra.» 10Taŋ a mbiɗakaŋ di: «Kanah ta buy, ndra gawla ɗikey, i soko ɓa ngi hiɗika gwat ngi zum. 11Ndr'i ziri ngi mbur purlahay gar, ndra jeŋŋe, ndra gawla ɗikey i mupura lihey ta.» 12A ɓa taŋ: «Ndiɗaˀ! Ki soko ngi pura hĩhĩy ngi hirwuy ndra.» 13A mbiɗakaŋ di: «Ndra gawla ɗikey vuna, ndra zle kuruˀ nga cuw, ndr'i ziri ngi mbur purlahay angi hirwuy Kanaˀan. Tuboˀo aro avu cine ndra, yo pala naŋ anta mata.» 14Zozef a zuɓa ˀay a muŋ, a ɓa taŋ: «Kay i ɓukum le, kum i mupura lihey ma na. 15Gwat ya masa juɗukum ava ani: Hadam ti slimiɗ ngi buy madiɗa ngi Ezipte misi ti siifa, kum anta sa bam ti ka ta, sey da tuboˀ kum na, a so le far. 16Slinam mbur pal asi kum, ɓa ara zuɓo sukum kumo. Kumo, ndiram ar dangay, ɓa i jiɗa ɓi kum na: da ki ɓam i ɓi mikaslsla kwana? Da kine ta na, hadam ti slimiɗ ngi buy madiɗa ngi Ezipte misi ti siifa, kum i mupura lihey!» 17Zozef a pa taŋ arleˀeŋ, hã hin makir ar dangaya. 18Angi hin mimakir naŋ na, Zozef a ɓa taŋ: «Puraka gwat kum masa gaka ngi laha hutuŋ kum ani. Yi mbur mazluwun ti Buymisemuŋ. 19Da kum i mizli mijeŋŋehey gisiŋ na, anja sukum kum purla a ndir ar dangay mugucukum anga na, kum mekelemeye, a ram ti dawa da mizli ngi hay kumoy muroko ti maya. 20A dirba nah, sikiy ti tuboˀ kum na. Naɓa mingiɓi kum a tiri le kaslsla gwat naŋ, yo kum anta sa micam mata.» Mizli sukumuhoy tuwa, a tiɓaka le kanah. 21Dar a ɓam ar wala taŋ na: «Eyˀehe! Ndra mupuraka sukum ndra masi bonoy, naŋ macufuɗa ndra ɓa i purakaŋ ircece, ndra micinakaŋ di ta na, i zluɓam ɓi le avu sukum ndra. Vurˀe, bonoy nah na, a mbuɗo le nga hirnga ndra.» 22Ruben a ɓa taŋ na: «Na yi ɓukum le takwa, ki gaka malambaˀ da mangal hana neˀ ta kini! Na, ki cinikiy mi ta. Wurenna cuwal naŋ a mbuɗo le nga hirnga ndra.» 23Taŋ a sinaka ɓa Zozefe ara cin na, a sinaka ta, asi mbur mimbiɗi mi ada deŋ ar wala taŋ. 24Dar Zozef a buˀ baˀ avu taŋ, a tuwuy.

Ziri ngi Zakopoy mimam nga hirwuy Kanaˀan a muŋ

A dirba nah, a mo ng'avi taŋ, a ɓa taŋ ɓi. A zuɓa Simeyoŋ, a juwa a mihiri taŋ. 25Zozef a ɓi ɓa a nahaka taŋ kayawahaya ndus ndus ti daw, ɓa a maka taŋ ti dala taŋhaya, a caka ngi mburo gar ng'ar kayawa naŋ ng'ar kayawa naŋ, yo ɓa a vulaka taŋ gwat nga zum a jiviɗe ma. A gi ti taŋ kahana so. 26A zuɓaka daw taŋhaya nga duba zungu taŋhaya, a cohom. 27Ngi duvuɗ, ar li taŋ mipam sar ɓa a hinama, mbur pal asi taŋ, a wuna kayawa, ɓa a vula gwat ngi zum da zungu naŋ, wun na, a pura dala naŋ tuwa ɓaˀ a hirnga dawa. 28A ɓa sukum naŋhaya: «A mikiy ti dala ɗu le a muŋ. N'ani ar kayawa ngi daw ɗu!» A muɗa taŋ didak le, a jijikam, dar a ɓam ar wala taŋ: «Buymisemuŋ a ga ndra di hana i gwat mike.» 29A ndiloko avu cine taŋ Zakop angi hirwuy Kanaˀana, a slufaka ɓi ngi gwat migi avu taŋ na gar. 30A ɓakaŋ: «mbur, buy ngi ruwuy vuna, a buca ndra ti buc ti buc. A gi ti ndra kaɓa i ram nga pura li ti pur. 31Ndr'i mbiɗakaŋ di: Ndr'i mizli mijeŋŋehey, ndr'i mupura lihey ta. 32Ndra sukumuhoyo zleˀe kuruˀ nga cuw, cine ndra purla, pal asi ndra, naŋ anta mata, yo tuboˀ ndra, aro dana avu cine ndra angi hirwuy Kanaˀan. 33Mbur nah, buy ngi ruwuy tuwa, a ɓa ndra so na: «I juɗukum ani ɓa yi sa si na kum i mizli mijeŋŋeheye: pulam sukum kum pal avu ya aka, hilaka gwat ngi zum da mizli ngi hay kumoy muroko ti maya, cohom. 34A dirba nah, sikiy ti tuboˀ kum na so. Naɓa i sa si na kum i mupura lihey ta, amma kum i mizli mijeŋŋehey. I sa mukum ti sukum kum numuŋ, joˀ ki laˀam, ki gam gwat kumoy zuy asi ruwuyo.» 35Dar a zlaka zuko kayawa taŋhaya. Angi kayawa ngi mbur gar na, dala ngi mburo ɓaˀ ti birtete naŋ, ɓaˀ ti birtete naŋ. Taŋ ati cine taŋ mupuraka birtetehey ti dala taŋhay na, a ga taŋ zluwun. 36Cine taŋ Zakop a ɓa taŋ: «Ki wuɗam ɓa yi ndir ɗoɗok manja zuŋ! Zozefe naŋ anta, yo Simeyoŋ kwana naŋ anta, ani ki ra zuɓaka Benjameŋ avu ya ma! Hana gar nga hirnga ɗu.» 37Akẽh na, Ruben a ɓa cine so na: «Da yi muw ti Benjameŋ ta na, kiɗa ziri ɗuwoy na cuw taŋ vagay vagay. Pula zayɓi naŋ ar ya, ya, i sa muw di.» 38Zakop a ɓi: «mangal ɗu anta sa ru asi kumo ta ndiɗaˀ. Sukum naŋ a muc le, a ndir pal naŋ. Da ani gwat ngi mendere a lumaŋ le a jiviɗ kum marama na, ya mbur midigila hana, malambaˀ kum a sa giy bonoy, hã a ciy hirnga a ruwuy.»

Currently Selected:

ZLI VIRZI 42: BEGDC

Highlight

Copy