ZLI VIRZI 44

Zozef mici a kwacay sukum naŋhay

1Zozef a ɓa mbur miji kaw naŋ na: «Nahaka kayawa ngi mizli tayna ti daw, weˀe avu taŋ maram di gu, ka dala ngi mburo gar ɓaˀ a hirnga daw a hur kayawa. 2Ki sa ka sikiɗ ɗu ngi ɓiri bara waɗ dala ngi dawa ɓaˀ a hur gabal ngi tuboˀ taŋ, a hirnga dawa.» Mbur miji kaw naŋ tuwa, a ga kaɓa Zozef miɓaŋ di. 3Li muwun wehhe si na, a pulaka ziri ngi Zakopoy, a cohom ati zungu taŋhaya. 4A pulaka walahaya le, taŋ kileŋ wãˀ t'aruŋ, Zozef a ɓa mbur miji kaw naŋ: «Slikiɗi! Kil asi mizli tayna, ja taŋ is, ɓa taŋ: Ki maka mezle ti malambaˀ vur mike? 5Sikiɗ ngi si gwat ati ngi pura njol ngi buy ɗu anta avu kum aka takwa? ki gam hana i haŋ naŋ ta.» 6Mbur miji kaw, a ja taŋ is, a ɓa taŋ mingiɓi hana. 7Taŋ a mbiɗakaŋ di: «Buy ɗu, ki ɓa ɓi misi kahana mbri mbrike? Da ndra gawla ɗikey i gaka gwat misi kahana le na, naɓa i gam di i malambaˀ muwãˀ naŋ! 8Dala ndra mulumaka taŋ a hirnga daw a hur kayawa ndrahay na, i mukuw taŋ ti ruwuy Kanaˀana takwa? I huloko dala malla ɓiri tapasl tapasl a hay buy ɗike mbri mbrike? 9Gawla ɗik, mulumaka gwat nah le ava na, a kiɗaka vagay! Ndra vuna i tiram beke ngi buy ɗu.» 10Mbur tuwa, a ɓi: «Naŋ kuy, anja a gi ka kum miɓaka vuna si. Mbur ndra mulumaka sikiɗe le ava na, a sa tiri beke ɗu, yo kumo ki bam le ar ɓi nah.» 11Mbur gar a pi sar ti kayawa ngi daw naŋ kutum, mbur gar a puska nga naŋ nga naŋ. 12Mbur miji kaw a tutuma kayawahaya cek, a zla avu ngi madiɗa, a sa kiɗa mi naŋ a vi kayawa ngi mecedek taŋ, a lumaka sikiɗ ar kayawa ngi Benjameŋ. 13A sinaka a gam kini ta, a ngiraka zana taŋhaya, mbur gar a zuɓa kayawa nga duba zungu naŋ, a mam ng'ar walahay a muŋ.

Zuda micik vu ar Benjameŋ

14Zuda ati sukum naŋhay a ndilam a hay Zozefe, naɓa Zozefe naŋ da a hay aruŋ, a hurukom a mbuŋ naŋ. 15Zozef a ɓa taŋ na: «Ki gam hana i gwat mike? Mbur misi ka ya, naŋ ti kileŋ a hirnga na, ki sinaka takwa?» 16Zuda a mbiɗaŋ di: «I mbuɗokuw di gu makwa buy? I ɓam mbrike? Ɓa i ɓam na: i gam gwat ta kini kwa? I Buymisemuŋ minjika malambaˀ ngi gawla ɗikeye. Ndra wurenna i beke ɗikey, ndra vuna ati mbur mulumaka sikiɗ ava na gar.» 17Zozef a ɓi: «Ndiɗaˀ, a tiɓaŋ ɓa yi ga kanah ta. Mbur mulumaka sikiɗ ava na, masa tiri beke ɗu i naŋ, amma kumo, mam zuy zuy ng'avi cine kumo.» 18Zuda a kirih ng'avu Zozefe, a ɓaŋ: «Ambuh takwa buy ɗu! Puliy ya gawla ɗik i ɓuw ɓi purla, ki cine manja ki ji mevel araŋ! Asi kum purla ati buy madiɗa ngi Ezipte. 19Dumbuŋ zleˀe na, ki cufuɗa ndra gawla ɗikeye: Cine kum ada kwa? Sukum kum mekelem ada kwa? 20Ndr'i mbuɗokuw di: Midigila cine ndra ada, waɗ mangal mitaŋŋa naŋ miya ar midigila naŋ. Sukum naŋ a muc le, a ndir pal naŋ a haŋ mumuŋ, yo cine a wuɗaŋ haɗi. 21Dar ki ɓa ndra gawla ɗikeye: Sikiy ti mangal nah ɓa yi pura ti hiri ɗu. 22I mbuɗow di na, buy: Mangal nah anta a pula cine gu ta, da a pulaŋ le na, cine a sa mucu. 23Dar ki ɓa gawla ɗikeye: Da sukum kum meciɗek na, a sawa asi kum ta na, ko y'anta sa tuɓukum a mbuŋ ɗu aka mata ndiɗaˀ wãˀ. 24Ndr'i mam ng'avi gawla ɗik cine ndra, i ɓakaŋ ɓi ɗike so buy. 25Cine ndra a ɓi na: Mam, ara hiɗikoko ndra gwat ngi zum. 26I mbiɗakaŋ di: I mam gu ta, sey da tuboˀ ndra na, naŋ da asi ndra far, naɓa i mam, da sukum ndra tuboˀo naŋ anta asi ndra ta na, anta sa tiɓam ndra a mbuŋ mbur nah mata.» 27Dar cine ndra gawla ɗike, a ɓa ndra so na: Ki sinaka le, ngwas ɗu Rasel a yiy ziri mizilehey cuw tewle. 28Pala naŋ anta, yi ɓi: ko mbri gwat ngi ɓuhoy a puwaka le, yi pura hiri nah ɗaˀ mata. 29Ani ki wuɗam na, ɓa ki purtaka hana ma kwa? Da gwat ngi mendere a lumaŋ le na, malambaˀ kum a sa giy bonoy, hã a ziziy hutuŋ da ya mbur midigila. 30Buy ɗu, da ya gawla ɗike, i ndil le wurenna a hay baha, manja mangal hana asi ndra na, pumbus taŋ a zliram le ati naŋ haɗa wãˀa. 31Naŋ mupura le, naŋ anta si na, a sa mucu. Naɓa malambaˀ ngi ndra gawla ɗikey, a ziza hutuŋ ngi midigila cine ndra gawla ɗike le. 32Yo ma na, si na sin le, yi zuɓa zayɓi ngi mangal hana le a mbuŋ baha nga hirnga ɗu, yi ɓaŋ: Da yi mo di ta na, yi sa ndir ti malambaˀ caˀa a mbuŋ ɗike? 33Ambuh! Puliy ya gawla ɗik i ndir yi beke ar li ngi mangala buy! Anja a mam ati sukum naŋhaya! 34I sa ru mbri ng'avi baha manja mangal hana, aru asi ya ka? Bonoy baha masa sa na, anja yi pura ta.»

Currently Selected:

ZLI VIRZI 44: BEGDC

Highlight

Copy