ZLI VIRZI 9

Buymisemuŋ mujumˀay ati Nowe

1Buymisemuŋ a ɗuwula mi da Nowe ati ziri naŋ mizileheye: «Yam ziri, sikam, nahaka hirwuyo. 2Zle dana, gwat misi titiri ngisi ruwuy gar ati ɗiyuwoy gar na, a sa zluwunam ti kum. Gwat miwenewene ngi ruwuyoy gar, ati kilifey gar na, zle wurenna i pula taŋ asi haŋ kum. 3Gwat miwenewene misi titirihey gar, i gwat ngi zum kum, i vulukum taŋ gar kaɓa ya muvulukum gwat mutukuzohoy zleˀe na, i vulukum taŋ le gar. 4Amma gwat purla ani, ki zumaka ˀuse misi pumbus naŋ kine aruŋ ta, asi siifa naŋ ar pumbusu. 5Naŋ kine ya, pumbus kum i siifa kum, i sa cufuɗa zayɓi nah avu gwat misãmi, i sa cufuɗa zayɓi nah avu mburu. Ko wa gar mikiɗ mbur le vagay na, i sa cufuɗa siifa naŋ avu mbur mikiɗ naŋ vuna. 6Ko wa mipi pumbus ngi mbur le na, i mbur masa paŋ pumbus naŋ ya, asi ya Buymisemuŋ i ga mburo ɓaˀ i ya. 7Kumo so na, yam ziri, sikam haɗi, pam suɓulak asi ruwuyo, nahakaŋ.» 8Dar Buymisemuŋ a ɓa Nowe ati ziri naŋhaya na: 9«Ani i sa jumˀay ati kum waɗ ati dideˀ kumoy a dirba kumo, 10yo waɗ ati gwat misi titirihey misi ati kum gar, mbiɗeˀvra: ɗiyuwoy, ginewey ati gwat misãmi ngi ɓuhoy gar misi ati kum, gwatay gar muboko ati kum ti hur palalama. 11I sa jumˀay ati kum ani: gwat misi titiri masa zizi ti mekepel madiɗa anta mata wãˀ, mekepel madiɗa anta sa gi ngi ngizla gwat ngisi ruwuyo mata.» 12Joˀ Buymisemuŋ a ɓi ma: «Kum ati gwat misi titirihey gar waɗ mizli gar masa ya ka taŋ nga mbuŋ na, gwat mabiga jumoˀay ɗu ati kum ani: 13I ɗuva lek ɗu le ar birngiŋ, i kwalay mogodonok hana masa biga jumoˀay ɗu ati hirwuyo. 14Ya misa ga gazlavay le lip lip a muŋ gar, yo da kwalay mogodonok mubo le gar na, 15i ro keŋŋe ti jumoˀay ɗu ati kum waɗ ati gwat misi titiri ko wanaka gar, naɓa yam anta sa zuɓ mekepel ngi ngizla gwat misi titiriheye mata wãˀ. 16I sa pura kwalay mogodonok masa bawa ar birngiŋ a muŋ, i sa wulka jumoˀay ɗu hã ngi set ati sukwi ngi gwat misi titirihey gar misi asi ruwuyo.» 17Joˀ Buymisemuŋ a mahiri naŋ da Nowe, a ɓaŋ: «Kwalay mogodonok i gwat masa biga jumoˀay ɗu ati gwat misi titiri gar misi asi ruwuyo.»

Ziri mizile ngi Nowehey mimakir: Sem kam waɗ Zafet

18Sem, Kam ati Zafet, i ziri ngi Nowehey muboko tir palalam. Kama, i cine ngi Kanaˀan. 19Mizli mihaɗi asi ruwuy na, a boko tivi ziri ngi Nowe mimakir hanayna. 20Nowe i mbur mizla huf cikiɗeffe, a gi guva ngi gudubun. 21A si mbaazla ngi gudubun nah tuwa, a wi, a cuko zana, a ndir gulndiŋ kine, asi guɗuk naŋ. 22Kam, cine ngi Kanaˀan, mupura cine mugulndiŋ kine tuwa na, ara ɓa da sukum naŋhay mucuw misi avra na. 23Sem ati Zafete, a zuɓaka godo ngi Nowe vuna, a njiraka njar ar gagalaˀay taŋ cuw taŋ, a ram di murdirba murdirba, ara sirtaka da cine taŋ mugulndiŋ kine tuwa. Taŋ hiri taˀtaˀ ngir tumbuŋ taŋ, vur taŋ mapuraka cine taŋ mugulndiŋ kine na. 24Ti Nowe mupuɗuk, mbaazla a wuyuh le muduba na, a cine ɓi ngi gwat mangal naŋ mijingaˀ ngi madiɗa migaŋ di tuwa le. 25A zla a ɓi: «Kanaˀan, anja Buymisemuŋ a nisaŋ! Anja a tiri avu sukum naŋhaya, i beke ngi dirba wãˀ ngi sukum naŋhay!» 26Joˀ a ɓi ma: «Sise da Bumbulvuŋ, Buymisemuŋ ngi Sem! Kanaˀan, anja ki tiri gawla ngi Sem! 27Anja Buymisemuŋ a ga Zafete zloh, anja a cifi a hay Sem, Kanaˀan a gi gawla taŋ!» 28A dirba mekepel madiɗa muzuɓ na, Nowe a gi vi skat skat makir ti kukur zlum ma. 29Nowe a muc, naɓa naŋ ti vi skat skat ngoltir ti kukur zlum.

Currently Selected:

ZLI VIRZI 9: BEGDC

Highlight

Copy