Zaŋ 9
9
Yesu muwuna hiri ngi mbur miyaka cak i dangar
1Ti Yesu macuh na, a pur mbur miyaka cak i dangar. 2Mizli ngi seˀehey a cufuɗakaŋ: «Kumani, migi mungra ɓa a sa yakaŋ cak i dangar na, i naŋ kwa malla i miyi naŋhay kwa?» 3Yesu a mbiɗa: «I naŋ ta, yo i miyi naŋhay ta ma. Amma a gi kanah na, ɓa slra ngi Buymisemuŋ a njik avu naŋ. 4Ani, i papas aruŋ ɗagay, anja i gam slra ngi mbur mislino ya. Duvuɗ ara ndilawa, mbur magi slra ti duvuɗo gu, anta. 5Ti ya misi ar duniya aruŋ na, yi li minjahha ngi duniya.»
6A dirba naŋ miɓi kahana na, Yesu a tuf tazlay a ruwuy, a huluɓ di murɓuk, a kuro avu hiri ngi mbur dangara. 7Dar a ɓaŋ: «Aru, ara buna hiri ar futuŋ mazilaka Silowe.» A mbiɗeˀvra: Mislin. Dangar aru ng'ara, a buna hiri. Ti naŋ mamo na, ara pur kweŋ kweŋ muduba. 8Midigwi naŋhay ati mizli mapurakaŋ zleˀe hõyyõ ar li suko gwat aciki jiviɗ na, a ɓam: «Hana i mbur masuk gwat a ciki jiviɗ tuwa takwa?»
9Mizli mekelemey a ɓam: «I naŋ gisiŋ.»
Numuŋhoyo: «Ĩˀĩ, i naŋ ta. I mbur mubam vu ti bi si.» Dar naŋ a ɓi: «I ya vuna si.»
10Mizli a ɓakaŋ: «Na, hiri ɗik vuna a wun mbri mbri ska?»
11A mbiɗa taŋ di: «Mbur mazilaka Yesu na, a huluɓ murɓuk, a kuriy di avu hiri, a ɓiy: ‹Ara buna hiri a Silowe.› Dar yi ru, i bun, a dirba nah, hiri ɗu a wun.»
12A ɓakaŋ: «Mbur nah vuna naŋ amaka?» A mbiɗa: «Yi si na ta.»
Farisahay mucufuɗaka mbur dangar miɗiyi
13A ram ti mbur dangar zleˀe tuwa ng'avi Farisahay. 14Dambalaka Yesu muhulɓa murɓuk, muwunaŋ hiri na, tapas sabat. 15Farisahaya kwana, a cufuɗakaŋ: «A gi mbri mbri wurenna, ka mapur naka?»
A mbiɗa taŋ di: «A kuriy hohoy avu hiri, yi bunaŋ, a dirba nah, joˀ yi pur muduba.»
16Farisa mekelemey a ɓam: «Mbur miga gwat hana a so ti vu Buymisemuŋ ta, asi naŋ anta ja ɓi ngi sabata ta.» Amma mekelemey a ɓam: «Mbur magi mungra, a ga cekene misi ka tayna gu mbri mbrike?» A wunkam ˀay ar wala taŋ. 17Dar a ɓaka dangar tuwa ma: «Na, ka ki ɓi mbri a hirnga mbur muwunuw hiri vunaka?» A ɓa taŋ: «I mijiviɗi.»
18Ɓa Yudehey a tiɓaka mbur nah i dangar zleˀe, ara pur muduba na, a ngumam ta, sey a ziloko miyi naŋhay daɗ le ɗagay. 19Dar a cufuɗaka miyi naŋhaya: «Hana i mangal kum gisiŋ, kum maɓam a ya ka cak i dangar na kwa? A gi mbri mbri ɓa naŋ mapur wurenna na ka?»
20Miyi naŋhay a mbiɗaka taŋ di: «I sinaka le, i mangal ndra gisiŋ, yo cak naŋ i dangar. 21Amma naŋ mapur wurenna, a gi mbri mbrike na, i si na ka ta I sinaka mbur muwunaŋ hiri vuna ta ma. Cufuɗakaŋ, naŋ vuna i zuŋ mata ma na, anja a mbiɗa ɓi ngi hirnga naŋ ti haŋ naŋ!»
22Miyi naŋhay a ɓam kahana, vur a zluwunam ti Yudeheye. Asi Yudehey a jumom ˀay le ar wala taŋ, a ɓam: «Ko wa gar miɓi le: ‹Yesu i Mesi› na, a ɓulaka tir hay ngi dira dibiɗ avra.»
23Miyi naŋhay miɓam: «I zuŋ mata, cufuɗakaŋ» na, vurˀeŋ.
24Farisahay a ziloko mbur dangar tuwa sar mucuw naŋ ma, a ɓakaŋ: «Ɓi njah a mbuŋ Buymisemuŋ! Ndr'i sinaka le, mbur nah i mbur migi mungra.»
25A mbiɗa taŋ di: «Da i mbur magi mungra, yi si na ta. Gwat purla ya misina na: yi dangar zleˀe ɓula, amma wurenna, i ra pur muduba.»
26A ɓakaŋ: «A guw di i gwat mike? A wunuw hiri vuna mbri mbrike?»
27A mbiɗa taŋ di: «Yi slufukum di le zleˀe si mayse, amma ko ki cinam ta. Ki wuɗam ɓa ki cinam sar pal ava ma vur mike? Malla kum vuna, may kum ada ngi tiri mizli ngi seˀehey aya kwa mbrike?»
28Joˀ Farisahay a zlaka, a zakaŋ, a ɓakaŋ: «Ka ki mbur ngi seˀeŋ. Ndr'i mizli ngi si Moyisey. 29Ndr'i sinaka le, Buymisemuŋ a ɓi ɓi le da Moyise, amma mbur nah a so ti damaka na, i si na ka ta»
30Mbur tuwa a mbiɗa taŋ di: «hẽˀe, da a so ti damaka na, ki sinaka ta? Gwat ngi zuma hirnga vuna i nah so. Na, a winiy hiri ɗu le ta ya kwa? 31I sinaka le, Buymisemuŋ anta tiɓa mi ngi mizli migi mungraˀahaya ta, amma a tiɓa mi ngi mbur mazluwun di, yo magi gwat naŋ mawuɗo. 32Mbur a wun hiri ngi mbur miyaka cak i dangar na, i cinam ɓi nah ɗaˀ ta. 33Da mbur hana a so ti vu Buymisemuŋ ta na, anja a gi gwat ko neˀ le gu ta.»
34A mbiɗakaŋ di: «Ka guzluv ar mungra zle ti taŋ muyukuw caka, ɓa ki so dubuna ndra gwat mbri mbrike?» Dar a ɓulaka tir hay ngi dira dibiɗe ng'avra. 35Yesu a cine na, a ɓulaka mbur tuwa le. Dar ara lumaŋ, a ɓaŋ: «Ki tiɓa Mangal ngi mburo le kwa?»
36Mbur a mbiɗaŋ di: «I wa ska Buy? Ɓa yi tiɓaŋ na.»
37Yesu a ɓaŋ: «Yawwa, ki ra pura ta kwa? Mbur maɓuw hana i naŋ vuna.»
38Mbur tuwa a ɓaŋ: «Yi tuɓuw le Buy.» Dar a girdiˀ a mbuŋ naŋ. 39Joˀ Yesu a ɓi: «Yi so ar duniya misenna ɓa ngi sli kiita, ɓa mizli mapuram tahay a puram, yo mapuramay kwana, a hulufom.» 40Farisahay misi ati naŋ micinaka mingiɓi nah na, a ɓakaŋ: «Gwat asinta, ndra kwana, ndr'i muhulufohoyo ya kwa mbrike?»
41Yesu a mbiɗa taŋ di: «Da kum i dangaray zleˀe na, anja ani, mungra anta avu kumo ta. Amma wurenna ki ɓam: ‹I ra puram.› Mungra kumo naŋ da ndrehhe na, vurˀe.»
Currently Selected:
Zaŋ 9: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.
