Luk 4

Satan mitikina Yesu

(Yo pura Mat 4.1-11; Mark 1.12-13)

1Yesu a nih le ti ˀUf Mipal, a mo ti mizaw Zurdeŋ, dar ˀUf Mipal a ngi di hirnga nga wuzlaɓuh. 2Satan ara tikinaŋ a diga hin kukur mufaɗa. Angi hin tayna gar na, anta zum gwat ta. A dirba nah so na, may ara jaŋ. 3Joˀ Satan a ɓaŋ: «Da ki Mangal ngi Buymisemuŋ na, ɓa ɗugur misenna ɓa a tiri ɗaf sini.» 4Yesu a mbiɗaŋ di: «A tohoko na:

‹Mbur a ndir ti siifa, sey ti ɗaf pal naŋ ta.›»

5Satan a jiɗ di nga muwã, a bigaŋ Zumabuy ngisi ruwuyoy gar wiliɗ, 6a ɓaŋ: «Gidaŋ ati dudok ngi Zumabuy hana gar, yi sa vuluw di. Asi a vulikiy di le da ya, yo i vula ko da waka gar, ya muwuɗ le. 7Ka so na, da ki huruk huruk le a mbuŋ ɗu na, a sa ndir da ka keɗeɗe gar.» 8Yesu a mbiɗaŋ di: «A tohoko na:

‹Dilik a mbuŋ Bumbulvuŋ, Buymisemuŋ ɗik,

yo putukul a mbuŋ naŋ pal naŋ tewle.›»

9Dar Satan aru di nga Zeruzalem, a cicaŋ a mitimɗek ngi hay ngi Bumbulvuŋ, a ɓaŋ: «Da ki Mangal ngi Buymisemuŋ na, hil sar baɗ aka nga ruwuy. 10Asi a tohoko na:

‹Buymisemuŋ a sa ɓa modro naŋhaya ɗaˀ vur ka sina,

ɓa a jiginukuw.›

11Yo ma na,

‹a sa puˀukuw paˀ paˀ a haŋ taŋhay,

vur ka masa dunuko sar avu ɗugur.›»

12Yesu a mbiɗaŋ di: «Ɓi mutoho a ɓi na: ‹Ki tikina Bumbulvuŋ, Buymisemuŋ ɗike ta.›»

13A dirba Satan mikiɗa mi ngi tikina Yesu ti wer pal pal gar na, a kirih kileŋ ava, hã tapas mekelem Buymisemuŋ misla.

Yesu mizla gi slra naŋ a Galile

(Yo pura Mat 4.12-17; Mark 1.14-15)

14Dar Yesu a mi nga Galile, naŋ gboŋgboŋ ti ˀUf Mipal Slimiɗ naŋ ara zil nga mbuŋ nga mbuŋ angi li vay nah gar. 15A dubuna gwat da mizli ar hay ngi dira dibiɗ taŋhay, yo mizli gar ara ngilam di wuy.

Nazaretey mitiɓaka Yesu ta

(Yo pura Mat 13.53-58; Mark 6.1-6)

16Yesu a so a Nazaret, walahay, naŋ migil angaŋ. Ngi hin ngi sabat na, a ci ar hay ngi dira dibiɗ, ka naŋ maga hõyyõ. A slikiɗ ɓa a sluf ɗerewol. 17A vulakaŋ ɗerewol ngi mijiviɗ Ezayi. Naŋ mupuska na, a lum di i ɓi ani mutohoko anga:

18«ˀUf ngi Bumbulvuŋ

naŋ da angi ya.

Asi a winiy le ngi tila mi

ti Ɓimezle da misi murgahay.

A slino ya ɓa ngi tila mi

ti ɓi ngi laha dangayay,

ngi tila mi ti ɓi ngi wuna hiri ngi dangaray,

ɓa ngi pula mizli masam bonoyo,

ɓa a lumam hirnga taŋ,

19ɓa ngi tila mi ti ɓi ngi vi,

Bumbulvuŋ masa tiɓa mizli ngi hay naŋ.»

20Yesu a fuɗa ɗerewol tuwa a muŋ, a vula da gawla ngir hay ngi dira dibiɗe, dar a cifi joˀ. Mizli ngir hay ngi dira dibiɗe gar a roko hiri puyõˀ ng'ar naŋ. 21Dar a ɓa taŋ: «Ɓi mutohoko hana, a gi le dana vur kum micin naŋhay wurenna na.» 22Mizli gar a hĩyãka ɓi naŋ le, ɓi mezle mabo ti balam naŋ na, a zuma taŋ hirnga le, a ɓam: «Hana i mangal ngi Zozef tuwa takwa?» 23Dar a ɓa taŋ: «Mizli ndrahay maɓam: ‹Doftor, mbulo hirnga ɗike ti haŋ ɗike› na, ko mbri, kisa ɓikiy di zleˀe si. Yo ma na, kisa ɓikiy: ‹Gwatay, ka miga taŋ a Kapernahum gar na, i cinaka ɓi taŋ le. Inga ga taŋ aka, angi walahay muyukuw anga na y'ayɗi.›» 24Joˀ a ɓi ma: «Gisiŋ, yi ɓukum na: mijiviɗe, ko anta tiɓakaŋ angi hirwuy miyakaŋ anga ta. 25Yi ɓukum njah wãˀ: Ti hin ngi Eli na, ngwas wudigahay ada haɗi angi hirwuy Israyele ngbaŋ. Vuŋ migi ta vi makir ti kiya merkeɗ na, may a gi le haɗi angi hirwuy gar. 26Amma Buymisemuŋ a slina Eli ng'avi ngwas wudiga ko pal asi taŋ ta, sey ng'avi ngwas wudiga misi ar walahay Sarepta, hirwuy Sidoŋ. 27Angi hin ngi Elize ma na, misi kukulahay ada haɗi angi hirwuy Israyele, ko mbur pal a wuzla taŋ miɗiyi anta, sey Naˀaman, mbur Siri.» 28Mizli ngir hay ngi dira dibiɗe gar micinaka mingiɓi hana na, a slikiɗam himaˀ. 29A slikiɗam, a bam di nga duba gala, a ram di sesẽŋ a hirnga muwã, taŋ mupaka walahay taŋ anga, ɓa a pakaŋ haŋ nga ruwuy. 30Amma naŋ, a bi kwaŋ tir wala taŋ, a cuh gwaɗ naŋ.

Mbur misi setene a hirnga

(Yo pura Mark 1.21-28)

31Akẽh na, Yesu aru nga Kapernahum, walahay ngi hirwuy Galile. Ngi hin ngi sabat na, a dubuna gwat da mizli. 32Gwat naŋ madubuna taŋ di na, a zuma taŋ hirnga le, asi a ɓa taŋ ti gidaŋ ngi miwi mizli. 33Ar hay ngi dira dibiɗe, mbur ada na, setene a hirnga. A widi ti gidaŋ: 34«Yooho! Ki wuɗ mi avu ndra ka, Yesu mbur Nazarete? Ki so ɓa ngi ziza ndra kwa? Yi sunuw le, ki mbur mipal ngi Buymisemuŋ!» 35Yesu a mbura himaˀ da setene tuwa, a ɓaŋ: «Taˀa mi, bi ti vu mbur hana.» Setene a hizigiɗa mbur tuwa pararah a wuzla taŋ, a bi, ko a gaŋ gwat neˀ ta. 36Taŋ gar, a zluwunam le haɗa, a ɓam ar wala taŋ: «I ɓi wana hana ma ka? A ɓa seteneheye ɗaˀ ti gidaŋ sina, a bam!»

37Joˀ slimiɗ naŋ a zil nga mbuŋ nga mbuŋ angi li vay nah gar.

Yesu mumbul misi jijihey haɗa

(Yo pura Mat 8.14-17; Mark 1.29-34)

38Yesu mibi tir hay ngi dira dibiɗe na, aru ngi hay Simoŋ. Mular ngi Simoŋ, naŋ gu ta, vu culok ava. Joˀ a tumbuloko Yesu ɓa a gi gwat vurˀeŋ. 39Yesu a guɓ ng'ar naŋ guɓ, a mbura himaˀ da jiji tuwa. Jiji a pulaŋ. A haŋhaŋ si na, ngwas a slikiɗ, a ga taŋ gwat ngi zum.

40Pas midiɗ na, mizli a soko ti misi jijihey ti sukwi wal wal ti hay taŋhaya gar ng'avu Yesu. Joˀ naŋ, a buca haŋ ar taŋ pal pal gar, a mbulo taŋ. 41Setenehey a bam ti vu misi jijihey haɗi, a wudam, a ɓam: «Ki Mangal ngi Buymisemuŋ!» Dar a buca taŋ, a tika taŋ ɓa a ɓam ta, asi taŋ a sinakaŋ le, naŋ i Mesi.

Yesu mitil mi ti Ɓimezle angi hay dira dibiɗey

(Yo pura Mark 1.35-39)

42Li muwun na, Yesu a bi, aru silaŋ nga ɓuh. Zigiduw haɗi a ram ti sipi naŋ. Ti taŋ mulumakaŋ na, a wuɗam tik naŋ, ɓa aru kileŋ avu taŋ ta. 43Amma Yesu a ɓa taŋ: «Ɓimezle ngi Zumabuy ngi Buymisemuŋ na, sey yi til di mi angi walahay mekelemey aya, asi a slinoko ya vurˀe.» 44Dar a til mi ti Ɓimezle ngi Buymisemuŋ ar hay ngi dira dibiɗey wal wal angi hirwuy Yude.

Currently Selected:

Luk 4: BEGDC

Highlight

Copy