Luk 15
15
Yezu ta ndaw ma ŋgəsa na hay.
1Ndaw me tsekeley dzaŋgal hay, ta ndaw ma ŋgəsa na hay, ma guram tabiya ha ka tsakay ŋga, ma da pafa sləmay. 2Fariziyeŋ hay, ta ndaw me sesəkey Mewey hay ma gwaŋguɗam mey, ma ləvam: «Ndaw a neney na, a ŋgəlata ndaw ma ŋgəsa na hay haya haya ha, a zəmam tek dzaya.»
Bəzay ma guma ma təɓaŋ me zəɗey, ma ndzafama na
(Mt 18.12-14)
3Arka ŋga ma təkəradatara bəzay ma guma neney ma mala ha ta meley ana: 4«Ndaw ana andza da walaŋ a kwar, təɓaŋ aŋga hay temere, naŋgar asləta da walaŋ ana ka zəɗafa ba na, a mbəkadata neney kokurow tsəfaɗ kava tsəfaɗ ana hay a palah, a daw a da səpərawa na hana na asləta na ma zəɗaha na, ha aza ka ndzafərawa kakay na way? 5Kendzey andza, ka ndzafərawa tsoy na, a dar 'ar bəza kakay, a zəgərawa təŋga ka ɗay. 6Andza ma mawa ŋga a mbaw na, ŋga ma kusata dzam aŋga ta maslawagay ŋga hay, ma ləvatar: ‹Kakwama wuiya dzaya zləna, hərway təɓaŋ a ɗaw aŋga na me zəɗey ana na, i ka ndzafərawa ba!› 7I ɓadakwar, a da kam wuiya da 'ərlam na andza ha, ka ndaw ma ŋgəsa ha asləta, ma mbəɗada mendzey ŋga na na, afəna ma ndaw a neney kokurow tsəfaɗ kava tsəfaɗ dzerey ahiya, me mbəɗey mendzey ta dasakay ana.
Bəzay ma guma ma sulay me zəɗey ma ndzafama na
8Ŋgwas waray, kendzey sulay ŋga kurow, kendzey sulay asləta da huɗa ka zəɗafa ba na, a ley waw, ka lalam a fatsa 'ay ana, a səpa haya haya, ha aza ŋga ka ndzafa kakay na ŋgwas waray? 9Kendzey andza ŋga ka ndzafa ba na, a kusata dzam aŋga hay ta maslawagay ŋga hay, a ləvatar: ‹Kakwama wuiya dzaya zləna, hərway sulay ɗaw ana me zəɗey ana na, i ka ndzafa ba!› 10Andza neney tok na, i ɓadakwar, madurlam ma Bay ma Bəla hay taya da wuiya mavəday ma ndaw ma ŋgəsa ha asləta ma mbəɗada mendzey ŋga na.»
Bəzay ma guma ma bəzey me zəɗey ma mawa a mbaw ana
11Ŋga me ləvey sa: «Ndaw ana daha, bəzey ŋga hay tsew. 12Na vaw bəza na ma ləvar a baba ŋga: ‹Baba ɗaw, vəladaya zleley ɗek na i ma da zəmey a dəba ɗek ana ba.› Arka baba na, ma wanəkadatara zleley ŋga tok. 13Meney nekəɗey a dəba na, bəzey ana vaw bəza na, ma haɗəkadata tek ana hana hay tabiyaha; me həley vaw, ma daway a wuraw dəreŋ, ma gwasəfada zleley ŋga na hana ba da mendzey salamba ha. 14Andza ma gwasəfada zleley ŋga na hana ba tabiyaha na, may me key kambəlaɓa da dala na, arka na mbarga ma zlar. 15Ŋga me ndzefey mber da 'ay ndaw ana daha bəzey ma dala na, ŋga ma slərada a ley ŋga hay me tsukurey gaduru hay. 16A wuɗey akwa na, ma rəhada hwaɗ ta dəba 'ay ma mbay na gaduru ma pəɗam ana, amana, ndaw ma vəlar dakay. 17Ŋga me dzeley 'ar ka 'ar vaw ŋga na, me ləvey: ‹Ndaw me key mber da 'ay baba ɗaw hay na nday, a zəmam tek na sana a zawa, ama yah ekəɗey tok na, i mətsey ta may ka sləna!› 18I da mey 'ay baba ɗaw, i da ləvar: ‹Baba ɗaw, i ka ŋgəsar ba a 'ərlam, i ka ŋgəsaka ba. 19I da ləvar na, yah ɗa ma kah ka zəlaya bəzey ɗek aha dzay sakay. Padaya na, ma kəla andza gawla ma mber eɗek aha›. 20Ŋga ma mey 'ar 'ay baba ŋga. Andza a lawa dəreŋ mba na, baba ŋga ma nəkada, a sawa ha na, a kar da vaw, ŋga ma hway, ma zəga, ma surma. 21Wawa na ma ləvar: ‹Baba ɗaw, i ka ŋgəsar ba a 'ərlam, i ka ŋgəsaka ba, i ɗa ma kah ka zəlaya bəzey ɗek aha dzay sakay…› 22Ama baba ŋga ma ləvatar a gawla ma 'ay ŋga hay: ‹Zəgəmawa zana mambay ana, kəlamar ka vaw tsam tsam, pamar tek ma bəzey har a har, tahərak a sek. 23Zəgəmawa bəzey sla ma gəla na, təzama, pəɗakwa, kakwa magurlam. 24Hərway wawa ɗaw eɗey, andza ka mətsey ba, amana, ka mbəlawa ba. Ka zəɗey ba, amana, ma ndzafa ha ba›. Arka taya ma təɗafama me key magurlam tok. 25Bəzey ŋga ɗuhwa na na, a lawa da ley. Andza ma mawa ŋga ba da ley, a husey aha a mbaw na, ŋga ma tsənada walay ta me gərvey aha. 26Ŋga ma zəlawa gawla ma 'ay asləta, ŋga ma tsəhafa, ɗagay me key na mey? 27Gawla a hana ma ləvar: ‹Malam eɗek ka husawa ba, andza baba ɗek ma nəkada ka mawa ba da zoy na, ŋga me zəgey bəzey sla ma gəla na, ma təza.› 28Wawa na hana me key mevel, a wuɗey me fuləkwey a 'ay sakay. Baba ŋga ma bawa ma da bədəraɓa. 29Ama, ŋga ma ləvar a baba ŋga: ‹Ekəɗey, ka key mevey haɗadzidzay, i kaka ha mber, i tsənaka ha sləmay; ɗaɗa dəvaɗ asləta, i ka rəsa guma ɗek na, dakay. Ama a yah na, kwa bəzey ɗaw tekeɗe na, kah ka vəlaya ma i ka kada magurlam andza dzam a ɗaw hay tikay. 30Ama bəzey a ɗey ma husawa na, ŋga dzadzak ma zəmərawa zleley ɗek ta dem hay, kah ma slar bəzey sla ma gəla na na!› 31Arka, baba ŋga ma ləvar: ‹Dem a ɗaw, la ma na ka pas ka pas la ma tsetsuwe, tek a ɗaw i me ndzefey ana hay tabiyaha na, ma vəla ha na ŋgeɗek. 32Ama a dafa na me key magurlam, me key wuiya tizləne, kavəday malam eɗek a neney na, ka mətsey ba, amana ŋga ta dey, ka zəɗey ba, amana ma ndzafa ha ba.›»
Currently Selected:
Luk 15: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun
