Luk 22

Bay hay a ŋgəlafama mawa ka Yezu.

(Mt 26.1-5, 14-16; Mk 14.1-2, 10-11)

1Magurlam ma peŋ mandzar is ana a gurawa ha, na ma zəlamar magurlam ma Pak ana. 2Baba ɗuhwa na me key kuley ana hay, ta ndaw me sesəkey mewey hay, a səpam wewer ma zəɗada ba, amana, a wasam ta səkway. 3Sataŋ ma fuləkwar a vaw ma Zudas na, ma zəlamar Iskariyot ana, ŋga na ndaw asləta da walaŋ ma gawla ma Yezu kurow kava tsew ana hay. 4Ŋga na ma daw, ma da ŋgəlam mawa andza baba ɗuhwa na ma key kuley ana hay, ta bay ma sidzew hay ka wewer ana ma da haɗəkadatara na. 5Taya na tsoy, a datar 'ar, arka ma tsama na, a da vələmar sumko ba a ŋga na.» 6Ŋga ma təɓa guma na, arka na ŋga me səpey wewer, ma da haɗəkadatara gədzah ba ta ndaw ma kusa na hay.

A ləmadama tek me zəmey ma magurlam ma Pak

(Mt 26.17-19; Mk 14.12-16)

7Da meney ma peŋ mandzar is ana hay na, pas me sley bəzey təɓaŋ ma Pak. 8Yezu ma sləradata andza Piyer ta Zaŋ, ta me ləvey aha kava: «Dawam da tadəmandakwar tek me zəmey ma magurlam ma Pak, ma aza i ka da zəmakwa.» 9Taya ma tsəhafama: «A saka, la ka da tama na, ka waray?» 10Ŋga ma mbəɗatar kava: «Ka me fuləkwey kwar a wuraw na, ka da zlam 'ar ta ndaw a sawa ha da yam ta zaw aha ka 'ar; səpama a 'ay ana ŋga ma da fuləkwey ana, 11arka, ləvamar a bay ma 'ay ana: ‹Miter a ləkawa na, 'ay ɗaw ma da zəmey tek ma magurlam ma Pak, andza gawla ɗaw ana hay na, ka waray?› 12A da ɓafakwar ka 'ay ana daha, ma kaha ka 'ar ma 'ay, ɗuhwa ha, tek ana hay ma ləmaya ba ka vaw; ka da tadəmandakwar na da huɗa tok.» 13Taya ma dawam, ma ndzafama tek ana hay tabiyaha, andza ma ŋga ma ləvatar ana; ma tama tek ma Pak ana hay da huɗa tok.

Kuley ma Yezu

(Mt 26.26-29; Mk 14.22-25; 1Kor 11.23-26)

14Andza har ana ma slawa ba na, ŋga me ndzey ka slam me zəmey tek andza gawla ŋga hay. 15Arka ŋga ma ləvatar: «Tek ana i me wuɗey da mevel a ɗaw kambəlaɓa na na, i ka zəma Pak a neney ta kuray, mba tsetseh a ɗaw ka husawa na. 16Hərway i ɓadakwar, ɗaɗa i da zəmey aha sakay, ha aza ka ndesley ba da Slala ma Bay'ərlam ɗagay.» 17Ŋga me təɓey vəley ma zom, a dəba ma ma mada sise ba na, ŋga me ləvey: «Təɓama na, wanəkadama ka 'ar vaw kwar ana. 18Hərway i ɓadakwar: ɗaɗa i da sey aha zom ma bəzey ma viŋe sakay, ha kasl ka Slala ma Bay'ərlam ma husawa.» 19Arka na, ŋga me zəgey peŋ, a dəba ma ma mada sise ba na, ma tsada, ma vəladatara, ta me ləvey aha: «Neney na vaw ɗaw, ma vəla ha ma kwar. Kama andza ha na, kuray ka sərafəmaya.» 20Ta vəley ma zom satsa na, ŋga ma kada andza ha satsa a dəba ma tek me zəmey na, ta me ləvey aha: «Vəley ma zom a neney na, ma Me dzəmey Vaw Wayna ma mambaz a ɗaw, ma da mbəɗawa hərway kwar.

Ma ɓada ma ma da haɗəkadama ŋga

(Mt 26.20-25; Mk 14.17-21)

21Ama nəkafama: har ma ndaw ma da haɗəkadaya na, ŋga kəɗey, la ma dzəma har ahiya da gandaf asləta ka slam me zəmey tek a neney. 22Hərway Bəzey ma Ndaw a da daway na, andza na ma dzala ha na. Ama, ndaw ma da haɗəkada na na, ka tuway vaw ŋga!» 23Arka taya ma tsəham ka 'ar vaw ta na hay: «Ɗagay ma da key tek ana da walaŋ ata na na, way?.»

Ɗagay ɗuhwa ha na way?

(Mt 18.1; 20.25-28; Mk 9.34; 10.42-45)

24Arka taya ma təram vaw ka 'ar vaw ta na, waya: da walaŋ ata na, andza ɗuhwa ha, way? 25Yezu ma ləvatar: «Bay ma dala hay hay a wumata ndaw ana hay na, ma bay bay; arka ndaw ma kərəmata na hay na, a wuɗam ka zələmata na, ndaw me key tek hayna hay. 26Ma kwar na, andza ha tikay, ama ndaw ɗuhwa ha da walaŋ a kwar na, ka ndzey a veɗ ma ndaw bəza na. Ndaw me wey ndaw na, ka ndzey a veɗ ma gawla ma 'ay. 27Ɗuhwa ha na, ndaw me zəmey tek tsukuɗu, ndaw ma həlawa da 'ay ɗaw? Andza a kafaya na ndaw me zəmey tek ana seŋgey! Ana yah tok na, yah da walaŋ a kwar na, da veɗ ma gawla ma 'ay.

28Kuray na, ndaw ma səma vaw ahiya da tek a ɗaw ma kəmiyawa na hay. 29I vəladakwar Slala na na, andza ma Baba ɗaw ma vəladiyawa na. 30Kəɗey tok na, ka da zəmam tek, ka da sam tek, ka slam a ɗaw me zəmey tek, da Slala ɗaw. Ka da ndzam ka koriwal ma bay hay, ma da key sariya, ma səkway ma Bəzey ma Israyel kurow kava tsew ana hay.»

Yezu a ɓada waya: Piyer a da mbəɗey mey

31Bay’ərlam Yezu me ləvey: «Simoŋ, Simoŋ, Sataŋ ka tsəha ba, ma da tambalakwar, andza ma tambalam daw da vəley. 32Ama i ka ɗuley mey ba hərway ɗek, ma 'ar eɗek me pey ka da devesey zlay. Kah na, kah ka da mawa ba na, səmadata malam eɗek hay.»

33Piyer ma ləvar: «Bay’ərlam a ɗaw, i ma həla vaw aha, kwa a daŋgay, kwa a memətsey na, i nama.» 34Yezu me ləvey: «I ɓadaka Piyer, teseɗey ekəɗey na, maga dzagulok a da zlehey na, kah ka mbəɗey mey tsoy, dey makar, ka səradaya kakay.»

Bertete, gabal ta sleɗ ma tsakay

35Arka ŋga ma ləvatar: «Da har i ma sləradakwar mandzara bertete, kwa gabal, kwa tahərak na, tek ka hətsəkurawa ba, daha ɗaw?» Taya ma mbəɗam kava: «Kwa dakay.» 36Ŋga ma ləvatar: «Ama ekəɗey, a dafa dzadzak tok na, ndaw ana bertete ŋga daha na, ka zəga; ndaw ana gabal aŋga daha na, ka key andza ha satsa. Ndaw ana sleɗ ma tsakay ŋga dakay na, ka zəga zana ma memeɗ aŋga, ka haɗəkada na, ka heɗəkey asləta. 37Hərway i ɓadakwar: hayna ka ndesley ka yah, guma neney ma Mewindey Kokwoɗ ana ma ləvawa na: a da mbəslama a dey ma katsala hay. Ana tok na, tek a neney ma nəkafaya dey ana na, a da ndesley.» 38Taya ma ləvam: «Bay’ərlam Yezu, sleɗ ma tsakay ana hay daha, ekəɗey tsew.» Ŋga ma mbəɗatar kava: «Ɗa.»

Yezu a ɗuley mey da mamba ma Tetəɗez

(Mt 26.36-41; Mk 14.32-38)

39Ŋga ma bawa ma daw ŋga a mamba ma Tetəɗez, andza ma ŋga kete na. Gawla ŋga hay ma səpamar bəzay. 40Ŋga me husey ka slam ana na, ma ləvatar: «Ɗulam mey, ma ha da təɗam a har ma ndaw me zləgey ndaw zlay.» 41Ŋga na na, me gurey ba ta taya a key har daf, ŋga me gərdey, me ɗuley mey; me ləvey andza neney: 42«Baba ɗaw, kendzey ka wuɗey na, gurada vəliyem ma tsetseh a neney ba… Amana, ka key andza na ŋgeɗek me wuɗey ana zləna, andza na ŋga ɗaw i me wuɗey ana kakay.» 43Arka madurlam ma ɓərawa vaw da 'ərlam, ma vəlar gədaŋ. 44Tsoy andza 'ərev ma həɓar ba na, me ɗuley mey a fəna sa. Merɓey a ŋgəzey ka vaw ŋga ka dala, andza mambaz ma girgasla ha. 45A dəba ma me ɗuley ŋga na, ŋga me lətsey, ma daway ka slam ma gawla ŋga hay, ama, a da ndzafata na, ma nara hiya ta mevel. 46Ŋga ma ləvatar: «Teŋgey! ka naram na! Lətsam, ɗulam mey, ma ha da təɗam a har ma ndaw me zləgey ndaw zlay.»

Me zəgey ma Yezu

(Mt 26.47-55; Mk 14.43-49)

47Andza a tsey aha guma mba na, dekeslef, ndaw hay ndzal kəɗey, ma husəmawa. Ndaw asləta da walaŋ ma gawla ŋga kurow kava tsew ana hay, ndaw ana ŋga na ma zəlamar Zudas ana, ma kəlatəraɓa ka mey; ŋga ma gurey ka tsakay ma Yezu, ma surma. 48Yezu ma ləvar: «Zudas, ka da haɗəkada Bəzey ma Ndaw na, ta me surmey aha ɗaw?» 49Andza ma nəkadama tek ana me key na, ndaw ma ɗawalama na hay ma ləvamar: «Bay’ərlam Yezu, la ka tsuwam ta sleɗ ma tsakay ɗaw?» 50Arka ndaw asləta da walaŋ ata, ma tsuwara sləmay ma har zəmay, ma gawla ma 'ay ma Baba ɗuhwa na me key kuley ana. 51Amana, Yezu me ləvey: «Kwa andza neney tekeɗe na, mbəkadəmata.» Ŋga ma ləmar a sləmay ana na, ŋga ma ndalada. 52Arka, Yezu ma ləvatar a ndaw ma zəgama na hay, baba ɗuhwa na me key kuley ana hay, bay ma sidzew ma 'Ay me key Kuley ana hay, ta ndaw ma səka na hay: «Ka səmawa ma da zəgaya, ta sleɗ ma tsakay ahiya, ta tapay ahiya, andza yah na, katsala na, ka mey? 53Andza ka pas ka pas i da 'Ay me key Kuley andza kuray na, amana, kuray ka zəgəmaya kakay. Ama ekəɗey na, har a kwar, gədaŋ ma ləvaŋ.»

Piyer a ləvey na: «I sərada Yezu kakay»

(Mt 26.57-58; Mk 14.53-54)

54Taya ma zəgama, ma dadama, ma fuləkwadama a 'ay Baba ɗuhwa na me key kuley ana. Piyer na, ma səpa da dəba, mabaŋ daha ta taya. 55Andza taya ma həram waw ba ŋgeh da wuzlah ma huɗa ma ’ay na, taya ndzaya ka masləta ha na, Piyer me ndzey da walaŋ ata. 56Dem me key mber da 'ay ana, ma nəkada ma ndza ha ka dey waw na, ma zazura, ma ləvar: «Ŋga neney na, ŋga ta ŋga tiyatsa.» 57Ama, Piyer na, me mbəɗey mey: «Ŋgwas eɗey, i sərada, kakay.» 58Mendzey nekəɗey a dəba na na, ndaw mekelehe ma ləvey sa: «Kah a neney na, ndaw ata seŋgey.» Ama Piyer me mbəɗey kava: «Yah na ndaw ata tikay.» 59Mendzey a key ndzemdey pal a dəba na na, ndaw mekelehe ma hərafa waw ka guma na: «Dey ta kava, ndaw eɗey na taya kete tsetsuwe, zləna, ŋga ndaw Galiley seŋgey.» 60Piyer na, ma mbəɗar kava: «Yah na, i sərada guma ɗek a neney kah me wuɗey me tsey ana, tikay.» Arka tsa na andza a tsey aha guma mba na, dzagulok me zlehey. 61Bay’ərlam Yezu na me mbəɗey dey, ma zazura Piyer, arka Piyer na, ma sərafa ka guma ma Bay’ərlam Yezu ana ŋga na na, ma tsar ana: «Maga dzagulok a da zlehey teseɗey na, kah ka mbəɗey mey tsoy dey makar, ka səradaya kakay.» 62Piyer na ma bawa a bəla, ma tuway ta yam dey me zəgey vagay.

A saŋgərafama ka Yezu

(Mt 26.67-68; Mk 14.65)

63Ndaw ma dzaɗama na hay ma saŋgərafama, ma kəɗama. 64Ma mbəzadəmara dey ba, ma tsəhafama: «Key ndaw sek, ɗagay ma kəɗaka na way?.» 65Taya na tsəkam, ma tsamar guma na hayakakay ana hay; ta me tseɗey hay haɗadzidzay.

Yezu ka 'ərdey ma Sanedreŋ

(Mt 26.59, 63-65; Mk 14.55, 61-64)

66Ma dey me tseɗey na, ma ndaw ma səka na hay ma səkway, baba ɗuhwa na me key kuley ana hay, ta ndaw me sesəkey mewey hay ma tsəham 'ar, ma dadama a Sanedreŋ ata. 67Ma ləvamar: «Kendzey kah na Ndaw ma vaha 'ar ana, ɓadandar.» Ŋga ma mbəɗatar kava: «Kwa i ka ɓadakwar na, ka da pəmaya ha 'ar kakay. 68Haɗaw i ka tsəhafakwar na, ka da mbəɗafəmiyawa ha kava kakay. 69Ama zla ekəɗey na, Bəzey ma Ndaw a da ndzey ta har zəmay ma Bay ma Bəla ma Slafa na.» 70Taya ma ləvamar tobiya ta hiya: «Azlakwa kah na Bəzey ma Bay ma Bəla tok zlənemey!» Ŋga ma mbəɗatar kava: «Kuray ana ta ’ar a kwar ana, ka ləvam yah na ŋga ha.» 71Taya ma ləvam tok: «Ekəɗey na re, i tsəhakwama ndaw seydewe sa təŋga ɗaw, hərway ma mey na, lakwa ta ’ar a lakwa na, lakwa ka tsənadakwa ba da huɗa mey ŋga, seŋgey.»

Currently Selected:

Luk 22: MOF

Highlight

Copy