Matiyew 20
20
Bəzay ma guma ma bay me həley ndaw hay a ley
1«Akwa ma malada ma Slala ma 'ərlam na, andza ma bay ana daha, ma bawa da 'ay ŋga ma pərek, ma da həley ndaw hay 'ay dzerne ŋga. 2Taya ma dazlama ta ndaw ma mber ana hay na, ka sulay gabal kasl ka pas me təɗey; ma sləradata 'ay dzerne ana tok. 3Ma ndzemdey tsəfaɗ ma pərek na, bay a hana ma bawa da 'ay, ma nəkadata ndaw hay ma ndza hiya ka slam ana daha, mber a rafata dakay. 4Arka ŋga ma ləvatar: ‹Dawam da kam mber da 'ay dzerne ɗaw ana tiyatsa kwa, aza i vəlakwar sumkwo na kava kassla.› 5Arka taya na ma dawam. Bay ana hana ma bawa da 'ay sa ma rəpas, arka ma ndzemdey makar ma hakwaɗ na, me həley ndaw a hay satsa. 6Ma bawa ma ndzemdey zlam ma hakwaɗ satsa na, me ndzefey ndaw hay mandza hiya, ma ləvatar: ‹Ka ndzam tedehe hwoy pas aha na, ka mey?› 7Taya ma mbəɗamar kava: ‹Hərway ndaw ka zəlandar ka mber dakay›. Arka ŋga ma ləvatar: ‹Dawam 'ay dzerne ɗaw ana tiyatsa kwa›. 8Arka ma dey me zəgey na, bay ma ley ana ma ləvar a gawla ma 'ay ŋga: ‹Zəlatərawa ndaw ma mber hay, vəladatara sulay ta, zlar ka mey na ta ndaw madakwaydok ana hay, ma da ndakada ta ndaw tsəfəmey ana hay.› 9Arka ndaw ma ndzemdey zlam ana hay ma dawam, ma təɓam gabal gabal. 10Arka ka husey ka ndaw tsəfəmey ana hay tok na, ka taya na a dzalam waya, ‹la da ndzafam na a fəna ma ta.› Ama tok na, ma ndzafam na ka ndaw na gabal gabal ana, tiyatsa. 11Andza a təɓama ha na, ma gwaŋguɗam mey ka bay ma 'ay ana. 12Taya ma ləvam: ‹Ka maladandar ta ndaw a neney dok ana hay na, taya na ma kam mber na ma ndzemdey asləta dada seŋgey. La na, la ma kam mber hwoy pas, ha pas ma təlandar tok na.› 13Ama ŋga ma mbəɗafara kava a ndaw asləta da walaŋ ata ana: ‹Dzam a ɗaw, malay ɗaw dakay zləna, i tsama hana na ma pərek na, ka sulay gabal ana seŋgey. 14Ekəɗey təɓa tek ma merɓey ɗek na, daway tek eɗek. I wuɗey ma vəlar a ndaw a neney madakwaydok ana na, andza na ŋgeɗek. 15I slafa ma kada ta zleley ɗaw andza na ŋga ɗaw me wuɗey kakay ɗaw? Tsukuɗu ka naya dey na, ma vəday yah kokwoɗ aha ɗaw?› 16Andza neney tok na, ndaw madakwaydok ana hay na, a da təram ndaw tsəfəmey ahiya. Yaw ndaw tsəfəmey ana hay tey na, a da təram ndaw madakwaydok ahiya.»
Yezu a ɓada me mətsey ta ma mbəlawa ŋga dey ma makar ana
(Mk 10.32-34; Lk 18.31-34)
17Andza Yezu a tsəley aha a Zeruzalem na, ŋga me ŋgəley ka bəzay na, gawla ŋga kurow kava tsew ana hay dada. Paɗ tsakay tsəveɗ na, ma ləvatar: 18«Ekəɗey la tsəlakwama ha a Zeruzalem, a da gərafama har ka Bəzey ma Ndaw a har ma baba ɗuhwa na me key kuley ana hay, ta ndaw me sesəkey Mewey hay. A da dzuwama na a mətsey. 19A da mbəkafama har a har ma ndaw Zuif ahiya kakay ana hay, ma ka saŋgərafama, ma ka kəɗama ta lagwada, ma ka darama ka 'ar ma tuwaw ma gəzləla ha. Ama da meney ma makar ana na, a da mbəlawa.»
Maya mandza Zaŋ ta Zak a tsəhatar slam hayna a wawa ŋga hay
(Mk 10.35-45; Lk 22.25-27)
20Arka maya ma bəzey ma Zebedey hay, ma gurafa ka Yezu ta wawa ŋga hay, ma gərdey, ma tsəhafa tek. 21Yezu ma ləvar: «Ka wuɗey mey?» Ŋgwas aha na ma ləvar: «Vəley slam har ma wawa ɗaw neney hay tsew ana, ka da ndzam da Slala ɗek, naŋgar ta har zəmay ɗek, naŋgar ta har gula ɗek tey.» 22Yezu me mbəɗey kava: «Ka səradama tek a kwar ana ma tsəham kakay. Ka slafama ma da sey vəliyem ma tsetseh ana, i ma da sey ana ɗaw?» Ma ləvamar: «La slafama.» 23Yezu na ma mbəɗafatara kava tok: «Ayaw, ka slafama ma da sey vəliyem a ɗaw, ama, ka ma da ndzey ta har zəmay ɗaw, ta har gula ɗaw na, slam har a ɗaw ma da vəlada dakay, a da vəladəmatara, a ndaw na Baba ɗaw ma ləmadatara aha ka vaw ana hay.» 24Andza sa ma gawla ŋga kurow ana hay ma tsənadama ŋgey, ma tərəmatar a ndaw a hay tsew ta malam aŋga na. 25Ama Yezu ma zəlata, arka ma ləvatar: «Ka səradama ha bay ma dala hay na, a wumata ndaw hay na ta mazlaɓ ata, arka ndaw ɗuhwa na hay tey na a kərəmata. 26Ama ma kwar na andza ha tikay; ta meterŋgəleŋ, haɗaw ndaw ana a wuɗey me tərey ɗuhwa ha da walaŋ a kwar na, ka tərey gawla ma 'ay kwar aha. 27Ndaw ana a wuɗey me tərey ndaw tsəfəmey ana da walaŋ a kwar na, ka tərada vaw ŋga beke kwar aha. 28Kwa Bəzey ma Ndaw ana tekeɗe a sawa na, ma ndaw hay ka da kamar meslərey ka har kakay, amana, me key meslərey, ma da vəlada mendzey ŋga ma da mbəɗadatərawa ndaw hay haɗadzidzay.»
Yezu a ndeley wulaf hay tsew
(Mk 10.46-52; Lk 18.35-43)
29Andza ma bawa ta ba da Zeriko na, ndaw ma kusa hiya haɗadzidzay ma səpəmərawa. 30Arka wulaf ana hay daha tsew, ma ndza hiya ka tsakay tsəveɗ, ma tsənadama ma sawa na Yezu na, ma zlamar me wudey: «Bay’ərlam bəzey ma David, la ka kəmaka da vaw tey!» 31Ndaw ma kusa hiya na hay ma kəmatar say, ma taya ka ndzam tete. Ama taya ma səkadama me wudey adiya ta gədaŋ: «Bay’ərlam bəzey ma David, la ka kəmaka da vaw tey!» 32Arka Yezu me lətsey aha, ma zəlata, ma ləvatar: «A sakwar ekəɗey na, i ka kakwar na, mey?» 33Taya ma mbəɗamar kava: «Bay’ərlam, a sandar na, dey la hay ka wuram!» 34A kamar da vaw a Yezu, ma ləmatar a dey ta na hay. Arka tsana, dey ta hay ma wuram wunet, ma səpamar bəzay.
Currently Selected:
Matiyew 20: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun
