Matiyew 23

Yezu ma katar ka 'ar ɗaf a ndaw hay hərway ma Fariziyeŋ hay

(Mk 12.38-40; Lk 20.45-47; 11.39-52)

1Arka Yezu ma ləvatar a ndaw ma kusa hiya na hay, ta gawla ŋga hay: 2«Ndaw me sesəkey Mewey hay, ta Pharisen hay, ma ndza hiya na da veɗ ma Moyiz: 3kam andza ma ta ma ləvəmakwar ana. Pəmatar sləmay. Amana tek ata na ma kam ana na, ka da kam andza ha tizlay. Hərway a tsam na ta huɗa mey dada zləna, a kam andza ma ta ma tsam ana kakay. 4A dzuwam tek me ləhey ana hay, a padəmatara ka 'ar ma ndaw hay. Ama taya na ta ’ar ata na na, a wuɗam kwa ma ləmamar ta bəzey har kakay. 5Tek ata ma kam ana hay na, a wuɗam na aza ndaw hay ka nəkafəmata. A səkadama ɗeriwel ma mey ma Bay'ərlam ata ŋga na taya ma tapam ka 'ərdey ana. A tsama mey ma zana ta ba, ta sasay aha. 6A wuɗam me ndzey ka slam tsəfəmey ana hay da magurlam hay. Da 'ay me ɗuley mey na, a ndzam na ka slam tsəfəmey ana hay ka mey. 7a satar ka tsəmatar guma na ka slam me kusey hay, a wuɗam ka tsənam ndaw hay ka zələmata na: ‹Miter.› 8Ma kwar na, ka da səpam ka da zələmakwar: Miter, tizlay. Hərway miter a kwar na, ŋga asləta. Kuray tabiyaha na, malam ahiya. 9Ɗaɗa ka da zəlam ndaw ka dala: Baba kwar zlay, hərway Baba kwar na, ŋga asləta, Baba na da 'ərlam ana. 10Ka da səpam, ka da zələmakwar ndaw me sesəkey Mewey zlay, ndaw me sesəkey Mewey kwar na, ŋga asləta: Kriste. 11Ndaw andza ɗuhwa ha da walaŋ a kwar na, a da tərey gawla ma 'ay kwar aha. 12Kwa way way ma tsəlada vaw ŋga ka mey na, a da madama ta dəba. Kwa way way ma mada vaw ŋga ta dəba na, a da tsəladama ka mey.

Yezu a katar say a Fariziyeŋ hay

13Tuwam vaw kwar kuray ndaw me sesəkey Mewey hay ta Fariziyeŋ a neney ta ’erneh da mey tsew ana hay, kuray a neney ma təkadəmatara mambaw ma Slala ma 'ərlam ba a ndaw hay ana. Kuray ana sa tok na ka fuləkwam a huɗa sakay. Ndaw ma wuɗam ma fuləkwam a huɗa na hay na, ka vələmatar tsəveɗ kakay. [14#23.14 Lamba neney bəzana hay na da sa ma me windey ana gur ma na hay na dakay ] 15Tuwam vaw kwar kuray ndaw me sesəkey Mewey hay ta Fariziyeŋ a neney ta ’erneh da mey tsew ana hay, kuray ka halama bəlay hay da dala tabiyaha ma da ndzafawa ndaw asləta a səkway kwar. Andza ŋga ka tərey tsoy na, ka təradama kassla tek me kəley a waw ma laɓa na, dey tsew a fəna kuray ana sa! 16Tuwam vaw kwar, kuray eɗey ndaw me kəley ka mey wulaf ahiya na, ka ləvam: «Kendzey ndaw a mbəɗey ta 'Ay me key Kuley na, a mbəslama kakay, ama kendzey ndaw a mbəɗey ta gura na ma paha da slam me key kuley ana na, a mbəslama.» 17Mandzar 'ar eɗey hay, wulaf eɗey hay! Ɗagay ɗuhwa ha na na waray? Gura tsukuɗu, 'Ay me key Kuley ana ma tərada gura na hana tek ma kuley aha na ɗaw? 18Ka ləvam satsa: «Haɗaw a mbəɗam ta ŋgwa ma kuley na, a mbəslama kakay, ama a mbəɗam ta tek ma kuley na ma paha kava na na, a mbəslama.» 19Kuray a neney wulaf ana hay, ɗuhwa ha na na waray, tek ana ma paha kava na tsukuɗu, ŋgwa ma kuley ana ma tərada tek ana ma paha kava na, tek ma kuley aha na ɗaw? 20Andza ha satsa na, ndaw me mbəɗey ta ŋgwa ma kuley na, a mbəɗey na ta ŋgwa ma kuley ana ta tek ana ma pa ahiya kava na dzay. 21Ndaw me mbəɗey ta 'Ay me key Kuley na, a mbəɗey na ta ’Ay me key Kuley ana, ta ndaw ana ma ndza ha da huɗa na dzay. 22Ndaw me mbəɗey ta həzlay ma 'ərlam na, a mbəɗey na ta koriwal ma Bay ma Bəla, ta Ndaw ma ndzaha kava na dzay 23Tuwam vaw kwar, kuray ndaw me sesəkey Mewey hay ta Fariziyeŋ a neney ’erneh da mey tsew ana hay, ka vəladama zaka ma zəɓak, ma meləɓey, ma ndzewelek. Amana, ka kəmatar masəfaya a tek ana ɗuhwa na hay da Mewey: andza mey ma dzerey, me key da vaw, ta me tsəney sləmay: hana kuray ka kam na tek a neney hay tok, mandzara ma katar masəfaya a sa na hay. 24Kuray ndaw me kəley ka mey a neney wulaf ahiya na, dzuway na ka ŋgəzama ba ta kata, ama na ka ndam na zlegweme tok! 25Tuwam vaw kwar, kuray ndaw me sesəkey Mewey hay ta Fariziyeŋ a neney ’erneh da mey tsew ana hay, ka kwaslam na dəba ma gandaf ta vəliyem dada, ama hwoɗ ana hay na, ma dadəfa hiya ta tek ma mahal, ta tek ma sakwar haɗa na. 26Fariziyeŋ a neney wulaf ana! Kwasley ka mey na hwoɗ ma vəliyem, azambay dəba na na, a da wuɗey tiyatsa. 27Tuwam vaw kwar, kuray ndaw me sesəkey Mewey hay ta Fariziyeŋ a neney ’erneh da mey tsew ana hay, ka nəkam na kal kal andza ɗay tsəvay ma fəɗa slaliya ha: ta bəla na a nəkam mambay aha, ama da huɗa na, ma rəha ha ta ndasl ma vagay hay, ta tek ma zləɓa na hay tabiyaha gəle gəle. 28Kuray na andza ha atsa: ka slam dey ma ndaw hay na, ka kadama vaw kwar na, dzerey ahiya, ama da mevel a kwar hay na, ma rəha hiya ta mbaɗa, ta tek haya kakay ana. 29Tuwam vaw kwar, kuray ndaw me sesəkey Mewey hay ta Fariziyeŋ a neney ’erneh da mey tsew ana hay, ka zladəmatara ɗay tsəvay ma ndaw sek hay mambay mambay aha, ka mbatsadəmatara ɗay tsəvay ma ndaw dzerey ana hay, ta tek ma wuiya hay, 30arka ka ləvam tok: ‹Hana da har ma baba tete la hay, la daha tey na, la da tələkam aha a dey ta, ma da ŋgəzadərawa mambaz ma ndaw sek a neney hay tikay.› 31Haɗaw ka ləvam andza neney na, ka dzuwam vaw kwar ana a ɗewer tizləne, kuray na bəzey ma hwoɗ ma ndaw ana ŋga na hay, ma kəɗəmatərawa ndaw sek ana hay seŋgey! 32Ana təɗe, ndəvadama mber ma baba tete kwar hay, ma zləmərawa na! 33Kuray govaŋ a neney hay, gwalay ma kutsesl a neney hay ŋgey. Ka da ləhəmawa da mey ma waw ma laɓa na na ta waray? 34Nəkafama, hərway ma mey na, i sləraɓa ndaw sek a ɗaw hay, ndaw ma səra 'ar ana hay, ta ndaw me sesəkey mewey hay. Ka da kəɗəmata ba vagaya hiya, ka da daradəmata ka 'ar ma tuwaw ma gazləlaha, ka da kəɗəmata ta lagwada da 'ay me ɗuley mey kwar hay; arka ka da səpəmata ba me herey, ka wuraw ka wuraw. 35Hərway aza mambaz ma ndaw dzerey ana hay tabiyaha, ma pa mey aha ka dala na na, a da makwar ka 'ar a kwar ana, zla ka mambaz ma Abel ndaw dzerey ana, kasl ka na ma Zakari bəzey ma Barasi, na kuray ma kəɗama vagay aha da walaŋ ma 'ay ma kuley, ta ŋgwa ma kuley ana. 36I ɓadakwar dərka na, tabiyaha tek ana ŋga na hay na, a da mawa na ka 'ar ma ndaw ma bəla neney hay.

Yezu a tuwa Zeruzalem

(Lk 13.34-35)

37Zeruzalem, Zeruzalem, kah a neney ma kəɗata ndaw sek hay ba vagay ahiya na, ma kwaytsata ndaw ma slərəməkawa na hay ba vagay ahiya na. Zla varay, i ka wuɗey ba ma tsəhadatara 'ar ta bəzey ɗek hay andza ma gogwar ma hwarkwata bəzey ŋga hay a gurɓasla ŋga na hay. Ama kuray na ka wuɗam kakay! 38Ana təɗe, 'Ay me key Kuley kwar a neney ana, a da ndzey baŋgway aha. 39Hərway i ɓadakwar, kwa ka da nəkadəmaya ha sakay, ha kasl ka pas a kwar ma da ləvam: Ndaw ma sawa na na, ma pəsa mey aha ba da mezəley ma Bay’ərlam»

Currently Selected:

Matiyew 23: MOF

Highlight

Copy