Matiyew 25

Dem hay daha kurow

1Arka a da kam da Slala ma 'ərlam na, andza ma dem ana hay daha kurow, ma həlam peterle ta hay, ma bəmawa ma da zley 'ar ta zel ma kokwa. 2Na zlam da walaŋ ata ana hay na: dəla hiya, neney zlam ana hay tey na: wewer ahiya. 3Andza taya ma həlam peterle ta hay na, dem ana dəla na hay na ka zəgam mal a har kakay. 4Dem ana wewer ana hay na, ma dawam ta peterle ta hiya na ta mal ata hiya da kwalaba. 5Andza zel ma kokwa na a rawa ha ləma mba na, me nerey ma katar tabiya ha na, ma naram. 6A key wuzla dəvaɗ na, me wudey me tsəney: «Zel ma kokwa na ŋga kəɗey, bəmawa da zlam 'ar tok.» 7Arka dem ana hana hay ma parkam tobiya ta ha, ma həram waw ka peterle ta hay. 8Na hana dəla na hay ma ləvəmatar a na wewer ana hay: ‹Vələmandar mal a kwar ana tey, hərway peterle la hay na, a mətsam aha tek ata.› 9Na hana wewer ana hay ma mbəɗəmatar kava: ‹A key vaw kakay zləna, neney na, a da sladandakwar aha kakay! Dawam dzadzak a 'ay ndaw filaw da haɗəkəmawa a kuray ana.› 10Andza a dam aha ma da haɗəkawa zlənemey na, zel ma kokwa ma husawa; na hana hay ma həla vaw ana hay na, ma fuləkwam andza zel ma kokwa a 'ay me key magurlam, ma wuɗadama mambaw ba. 11A dəba na na, dem a hana hay ma husəmaɓa tey, ma zəlam: ‹Bay’ərlam, Bay’ərlam, wurandar mambaw!› 12Ama ŋga ma mbəɗawa kava: ‹I ɓadakwar dərka na, kuray ŋga na hay ɗaw, i səradakwar kakay.› 13Ndzam tsekerkerre tok zləna, hərway ka səradama kwa pas ana, kwa har ana kakay seŋgey!»

Bəzay ma guma ma gawla ma 'ay hay daha makar

(Lk 19.12-27)

14Akwa na a da key na, andza ma ndaw ana daha ma daw a dzaŋgal, ŋga ma zəlatərawa gawla ma 'ay ŋga hay, ma vəladatara zleley ŋga a har ata. 15Ma vəlar milioŋ zlam a gawla naŋgar. A gawla naŋgar ma vəlar milioŋ tsew. A ndaw ma makar ana ma vəlar milioŋ asləta, kwa way way na, ma vəlar diday ma gədaŋ aŋga. A dəba na na ma daway təŋga. 16Arka tsana ndaw a hana me təɓey milioŋ zlam ana, ma daw ma mbəɗada har, ma ndzafada zlam adiya. 17Andza ha satsa na ndaw me təɓey milioŋ tsew ana, ma ndzafadərawa tsew adiya tey. 18Ama ndaw me təɓey milioŋ asləta na na, ma daw zlal zlalarada sumkwo ma bay ŋga na hana, a tsəvay. 19Mendzey haɗadzidzay a dəba na na, bay ma gawla ma 'ay ana hana na hay ma husawa, ma mbəslama zleley ŋga na. 20Ndaw me təɓey milioŋ zlam ana, ma gurafa ma ɓadara 'ar ana, ma ləvar: «Bay, kah ma vəlaya na milioŋ zlam kakay ɗaw? Ekəɗey zlam i ma ndzafadərawa adiya sa.» 21Bay ŋga na ma ləvar: «Yawa! gawla ɗey hayna ma tsənaya sləmay ana, tek ketekuɗey na kah ka wafa vaw ba, i da vəlaka haɗadzidzay mba, sawa da key wuiya ta bay ɗek.» 22Ndaw a hana me təɓey milioŋ tsew ana ma gurafa tey, ma ləvar: «Bay, kah ma vəlaya na milioŋ tsew kakay ɗaw? Ekəɗey tsew i ma ndzafadərawa adiya sa.» 23Bay ŋga na ma ləvar: «Yawa! gawla ɗey hayna ma tsənaya sləmay ana, tek ketekuɗey na kah ka wafa vaw ba, i da vəlaka haɗadzidzay mba, sawa da key wuiya ta bay ɗek.» 24Ndaw a hana me təɓey milioŋ asləta na, ma gurafa tey ma ləvar: «Bay, i sərada ha dey ta kava, kah na tek me key wasa kakay, kah ka sləkey tek ka slam ana kakay, tsana ka tsuwey tek kava tsa. Kah ka kəley tek ka slam ana kakay tsana, ka tsetsəmey tek kava tsa tok na, 25yah na i wesey, i ma dada zlal zlalarada sumkwo ɗek ana a tsəvay, ŋga kəɗey, təɓa tek eɗek.» 26Ama bay ŋga na hana ma mbəɗafara kava: «Kah gawla ɗey haya kakay ana, mayaɗ ana, azlakwa ka sərada ha i ka sləkey ka slam ana kakay na, i tsuwey tsa, i ka kəley tek ka slam ana kakay tsana, i tsetsəmey sana, 27azlakwa na, kah ka padaya sumkwo ɗaw ana a banke kwa; akwatay i sawa andza neney na, i da təɓa sumkwo ana ɗaw ta riba ha kava. 28Təɓəmərawa sumkwo ŋga na, vəladəmara a ndaw ta milioŋ kurow ana. 29Hərway tek ma ndaw ana daha na, a da vəlamar adiya arka a da kafa na dəraɗ dəraɗ. Ama ma ndaw ana dakay tey na, kwa ma ŋga ketekuɗey daha na, a da təɓadəmara ba. 30Gawla neney me nefey kakay ana na, vahama, kəladama a ləvaŋ, a bəla, da huɗa tok na ma tuway, me pəɗey sler.»

Yezu a tsey ka sariya madakwaydok ana

31«Andza aza Bəzey ma Ndaw a da sawa da maram aŋga na, madurlam aŋga hay a da kəsadəmərawa. Arka a da ndzey tsaŋ ka koriwal ma bay ŋga me wezley dey ana. 32Mendzey ma ndaw ma dala hay tabiya ha, a da kusəmawa ka slam dey ŋga. A da wanəkadəmata ndaw hay ba ka vaw gəle gəle, andza ndaw me tsukurey ma wanəkadata təɓaŋ hay ba ka vaw ta ɗaw hay. 33A da padata təɓaŋ hay a har zəmay ŋga, ɗaw hay tey na a har gula ŋga. 34Arka Bay ɗuhwa na a da ləvatar a ndaw ma har zəmay ŋga hay na: ‹Kuray eɗey Baba ɗaw ma pəsafakwar mey ana hay na, səmawa, ndzafama Slala neney ma ləmadəmakwar ka vaw, zla da mezley ma bəla na. 35Hərway may ma tsafaya na, kuray ka vələmaya tek me zəmey ba. Yam ma harətaya na, kuray ka vələmaya yam me sey ba. I mbəlak aha na, kuray ka ŋgələmaya ba. 36I tetez aha na, kuray ka kələmaya zana ba ka vaw; i dzedzey aha na, kuray ka nəkamayawa ba; i da daŋgay na, kuray ka dəmaɓa ba ka tsakay ɗaw.› 37Arka ndaw dzerey ana hay a da mbəɗafəmara kava: ‹Bay’ərlam, la da nəkadəməkawa may a tsafakaha, la ma vələmaka tek me zəmey ana na, varay? Yam a hartaka ha, la ma vələmaka me sey ana na varay? 38La da nəkadəməkawa kah mbəlak aha, la ma ŋgələmaka na na varay, kah tetez aha, la ma kələmaka zana ka vaw ana na varay? 39La da nəkadəkawa kah dzedzey aha dakay da daŋgay, la ma da nəkəməkawa na na, varay?› 40Arka Bay ɗuhwa na a da mbəɗafatara kava: ‹Dərka na i ɓadakwar ekəɗey, ka pas a kwar ma kəmatar hahaya a malam a ɗaw bəza ketekwəɗey ana hay na, ka kadəmaya na, a yah ana!› 41Arka Bay ana a da ləvatar a ndaw ma har gula ŋga hay tey: ‹Kuray eɗey ma kəla 'ar ana hay na, dam ba dəreŋ ka slam dey ɗaw, a waw ma ndəvey kakay ana, ma ləmaha na ma Sataŋ ta madurlam aŋga hay. 42Hərway may ma tsafaya na, kuray ka vələmaya tek me zəmey kakay; yam ma harətaya na, kuray ka vələmaya yam me sey kakay; 43i mbəlak aha na, kuray ka ŋgələmaya 'ay kwar kakay; i tetez aha na, kuray ka kələmaya zana ka vaw kakay; i dzedzey aha, i da daŋgay na, ɗaɗa kuray ka dəmaɓa ma da nəkiyawa kakay.› 44Arka ndaw a hana hay a da mbəɗafəmara kava tey: ‹Bay’ərlam, la da nəkadəməkawa may a tsafaka ha, yam a harəta ha, kah mbəlak aha, kah tetez aha, kah dzedzey aha, dakay kah da daŋgay, ma dəmaɓa ma nəkəməkaɓa dey tikay ana na, varay?› 45Arka a da mbəɗafatara kava: ‹Dərka na i ɓadakwar ekəɗey, ka pas ana ŋga na na, kuray ma kadəmatara tek a neney hay a bəzey bəza hiya ketekwəɗey ana hay kakay ana na, kwa a yah ana na, kuray ka kadəmaya kakay tiyatsa›. 46Arka a da wunam 'ar na, ndaw eɗey hay a slam ma banay me ndəvey kakay ana; arka ndaw dzerey ana hay na, a mendzey me ndəvey kakay ana.»

Currently Selected:

Matiyew 25: MOF

Highlight

Copy