Matalikilo 22
22
Lesa mbwaakaambila Abulaamu kubenga Isaki
1Mukuya kwanshiku Lesa wakeelesha lushomo lwakwe Abulaamu. Wakamwiita ayi, “Abulaamu!” Alakwe wakakumbula ayi, “Nkambo!”
2Lesa wakaamba ayi, “Bwesa mwanaako musankwa, mwaana eenkabo ngoocite, uyo ngoosuni abuumbi, uye kucishi ca Moliya. Uko ntookutondesha kalundu mpweshi umubengele ayi ngumulambu kuli ndime.”#2 Maka 3:1
3Macuunsacuunsa bushiku bwakaboolaawo wakatimbula nkuni shakutentesha mulambu, watantika pambongolo yakwe akunyamuna Isaki pantu pomwi abasebenshi bobilo. Bakanyamuka akuya kumusena Lesa ngwaakamulwiita. 4Pabushiku bwatatu, Abulaamu wakaubona musena uyo palaale. 5Mpeeke wakaambila basebenshi bakwe ayi, “Amucaale pano ambongolo. Nebo amwanaangu tutooyookulya mukulambila, tutooboola alimwi.”
6Abulaamu wakaambila Isaki ayi anyamune nkuni shakutentesha mulambu, lakwe mwiine wakanyamuna cibeshi amulilo wa makalangasha. Ndyebakalinga kuya ceenda pantu pomwi, 7Isaki wakaamba ayi, “Ta,” Alakwe wakakumbula ayi, “Mbuyani omwanaangu?” Isaki wakaamba ayi, “Mulilo ankuuni shalo mwanyamuna, ono mwanaambelele wakubenga uli kuli?” 8Abulaamu wakakumbula ayi, “Lesa mwiine ulatupa.” Mpeeke kabayabo.
9Ndibakashika apo Lesa mpaakamulwiita, Abulaamu wakayaka cipaililo akubambaawo nkuni. Wakaanga mwanaakwe akumubika pacipaililo, peculu lya nkuni.#Jemu 2:21 10Mpomunyaawo wakabwesa cibeshi ayi amucaaye. 11Sombi munjelo wa Mwaami Lesa wakamwiita kuswa kwiculu ayi, “Abulaamu, Abulaamu!” Alakwe wakakumbula ayi, “Nkambo.”
12Munjelo wakaamba ayi, “Utaciisi nabi kucita cili coonse kumwanike uyo. Ono ndeshiiba kwaamba ayi ulalemeka akunyumfwila Lesa ceebo tookwe kumamatisha mwanaako eenkabo kwaamba ayi utamubengi kuli nguwe.”
13Abulaamu ndyaakacebooka wakabona mbelele isankwa keecatitwe meeca mutusamu. Wakaya waibwesa akwiibenga mbuli mulambu wakutenta kuleka mwanaakwe.#Ebulu 11:17-19 14Musena uyo Abulaamu wakautumba ayi, “Lesa ulapa.” Abobulya bantu balaamba ayi, “PaKalundu ka Mwaami Lesa upa.”
15Munjelo wa Mwaami Lesa wakeeta kuswa kwiculu alimwi akwaamba ayi, 16“Mwaami Lesa waamba ayi, ‘Ndashomesha akulumbila ayi paliina lyangu ndaakukupa shoolwe shiinji abuumbi mukwiinga wacita ceeci alimwi kumamatisha mwaana eenkabo kwaamba ayi utamubengi kuli ndime. 17Ndashomesha ayi ndaakukupa bamulunyungu lwako baanji anga ninyenyeenshi mwiculu nabi museese wa muloombe lwa lweenge. Bamulunyungu lwako balaakukoma beshinkondonyinaabo.#Ebulu 6:13-14#Ebulu 11:12 18Ndaakupa coolwe mishobo yoonse ya pacishi ca panshi kwiinda mubamulunyungu lwako mukwiinga wakanyumfwila nsheeŋamba.’ ”#Mili 3:25
19Abulaamu wakaboolela kwakalinga basebenshi bakwe, lyalo bakaya boonse kuBiyasheba uko nkwaakaya mukwikala.
Bamulunyungu lwakwe Nawoli
20Bumwi bushiku kunembo Abulaamu wakesa weshiba ayi Milika mulamu wakwe wakashala baana bali bosanwe abotatwe kuli Nawoli. 21Usi nguwakalinga mwaana wakwiiya, mwanike wakwe wakalinga Buse. Kwakalinga aKemuwelo ishi Alamu, 22Kesedi, Aso, Piludashi, Jidilafu aBetiwelo. 23Betiwelo ngowakalinga ishi Labeka. Milika ngowakashala baana aba bali bosanwe abotatwe kuli Nawoli mukwabo Abulaamu. 24Leuma, kasuwa wakwe Nawoli, wakashala Teba, Gaamu, Taashi alimwi aMaaka.
Currently Selected:
Matalikilo 22: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
