Matalikilo 32
32
Jakobo mbwaakalibambila kukumana aEsau
1Jakobo ndyaakalinga kuya mulweendo lwakwe wakakumana abaanjelo. 2Ndyaakababona wakaamba ayi, “Iyi njimisumba yakwe Lesa.” Paceebo ceeco musena uyu wakautumba ayi Maanaimu. 3Jakobo wakatanjisha bantu kuli Esau mukwabo mumusena wa Siya mucishi ca Edomu ayi batole nkombe. 4Wakabalwiita ayi baambile Esau ayi, “NeJakobo musebenshi wanu unyumfwila, ntooluula kuli Esau mwaami wangu ayi ndakalinga kwikala abaLabani alimwi ayi ndakacelwa kupiluka kushika sunu. 5Ndicite ŋombe, mbongolo, mbelele, mpongo alimwi abasha basankwa abanakashi. Ono nkambo, ndatuma maswi mukulangila kwaamba ayi inga ndacana kulekelelwa.”
6Mbwaakatuma ndibakaboola kuli Jakobo, bakaamba ayi, “Twashika kubakwabanu baEsau alimwi bulya bali kale munshila kwaamba ayi bamukumanye. Banyamuka abasankwa bali myaanda yone.” 7Jakobo wakaloonda akulisukama. Bantu mbwaakalingaabo wakabapansaanya mumakoto obilo pantu pomwi ambelele, mpongo, ŋombe alimwi angamela shakwe. 8Wakayeeya kwaamba ayi, “Na Esau ese alwane likoto litaanshi likoto limwi licice akuloboka.”
9Mpomunyaawo Jakobo wakapaila ayi, “Lesa wa bakaapa baAbulaamu alimwi abaIsaki bata, amunkutike! Nkambo, mwakandwiita ayi mpiluke kucishi cine misheesu alimwi kuli beshikamukowa bangu. Mwakaamba ayi mulaakunyenshela kabotu shintu shoonse. 10Nebo nsheeleteewo ankuumbu shoonse nshimwakabaasho akushomeka nkomwantondesha nemusebenshi wanu. Ndakasubuka mulonga wa Joodani kaantaciteewo kantu nakaceyi sombibo nkoli, ono ndapiluka amakoto obilo aya. 11Ndapaila ayi mumpulushe kuswa kumukwesu Esau. Ndaloonda kwaamba ayi utoosa mukundwana akutunyonyoola soonse pantu pomwi abanakashi alimwi abaana. 12Amwiibaluke kwaamba ayi mwakandasha ayi mulaakunyenshela shintu shoonse kabotu akumpa bamulunyungu abo muntu mbaatakoonshi kubelenga, nkokwaamba ayi baanji anga ngumuseese wa muloombe lwa lweenge.”#Mata 22:17
13Jakobo wakoona apo. Lyalo bushiku bwakaboolaawo wakabambila Esau mukwabo cipo. Wakapatula 14mpongo shanakashi myaanda yobilo, bapeepe makumi obilo, mbelele shanakashi shili myaanda yobilo, shisankwa makumi obilo, 15ngamela shicite twaana shili makumi otatwe, mpwishi makumi one, bacende likumi, mbongolo shanakashi shili makumi obilo alimwi ashisankwa likumi. 16Mpeeke wakashipansaanya mumatangamatanga akupa litanga lyomwi alyomwi kumusebenshi womwi awomwi. Wakabaambila ayi, “Amutanjile kamuya alimwi mweende cakushiya musena pakati ka litanga lyomwi alimwi litookonkela pesule.” 17Mpomunyaawo wakalwiita musebenshi wakatanjila ayi, “Na Esau mukwesu akukumanye akukwiipusha ayi, ‘Mwaami wako ngani? Utooya kuli? Ngani mwine shifubwa ishi shoonse shili kunembo lyako?’ 18ulyeelete kukumbula ayi, ‘Nsha musebenshi wanu Jakobo. Watumina Esau mwaami wakwe ayi ncipo. Jakobo mwiine utoosa mwisule lyesu.’ ” 19Wakapa mulasho womwi weenka uyo kuwabili, watatu akubamwi boonse bakalinga bapekwa litanga litanga kwaamba ayi balame. Wakaamba ayi, “Noonse mulyeelete kwaamba bweenka ubo na mumukumanye Esau. 20Kutalubaako kwaamba ayi, ‘Jakobo musebenshi wanu utoosa alakwe pesule.’ ” Jakobo wakalinga kuyeeya ayi, “Ntoomukalika moyo kwiinda mushipo ishi alimwi na tukumane mpashi utoondekelela.” 21Wakatanjisha shipo mpeeke lakwe mashiku ayo wakoona pamusumba.
Jakobo mbwaakatintana amunjelo wakwe Lesa
22Mashiku eenka ayo Jakobo wakabuka, wabwesa bamakaakwe bobilo, bakasuwa bobilo, abaana bakwe bali likumi awomwi, akusubuka Mulonga wa Jaboku. 23Ndyaakamana kubasubusha, wakasubusha ashoonse nshaakalinga kucite. 24Sombi lakwe wakacaala eenka.
Lyalo musankwa wakesa akutintanaakwe kushikila lisuba kaliyanda kuswa. 25Musankwa uyo ndyaakabona ayi taatookoma, wakooma Jakobo kukasolo, mpeeke kakashukumukaamo mulinungi. 26Lyalo musankwa uyo wakaamba ayi, “Ndeke nooya, kutooya cituba.” Jakobo wakakumbula ayi, “Teshi nkuleeke, sombibo na umpe coolwe.”#Osi 12:3-4
27Musankwa uyo wakeepusha ayi, “Anu ndiwaani webo?” Wakakumbula ayi, “Ndime Jakobo.” 28Mpomunyaawo musankwa uyo wakaamba ayi, “Liina ilyo sunu lyamana. Walwishanya aLesa alimwi abantu sombi wakooma. Paceebo ceeco liina lyako ono litooba Isilaeli.”#Mata 35:10
29Mpeeke wakaamba ayi, “Anebo ndwiite liina lyako.” Sombi wakakumbula ayi, “Ino ceebonshi ulisuni kwishiba liina lyangu?” Lyalo wakapa coolwe Jakobo.#Boombo 13:17-18
30Jakobo wakaamba ayi, “Ndabonana aLesa meenso ameenso alimwi ncili muumi.” Paceebo ceeco musena uyo wakautumba ayi Penyelo. 31Lisuba lyakalinga kuya buswa Jakobo ndyaakalinga kuswa paPenyelo, sombi wakalinga kuya cisunkuta ceebo ca kasolo. 32Asunu asunu bamulunyungu lwakwe Isilaeli tabali mushisa wamulinungi lya kasolo mukwiinga mpowaawo Jakobo mpwaakoomwa.
Currently Selected:
Matalikilo 32: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
