Luka 14
14
Yesu laba nɛ kʋdɔndʋ nɔɔyʋ yɔɔ cɛ kɩyakʋ kɩhɛzʋʋ wiye
1Kɩyakʋ kɩhɛzʋʋ nakʋyʋ wiye Farɩsɩ ñɩma sɔsɔ nɔɔyʋ ya Yesu ɛ-tɛ se ewolo ɛtɔɔ tɔɔnaɣ nɛ mbá paawɛ peeɖe yɔ, pɛwɛɛ pefeŋiɣ-i. 2Abalʋ nɔɔyʋ kɛwɛ peeɖe. Pʋwʋaɣ-ɩ nɛ ehuu ɛ-tɩŋa. 3Peeɖe Yesu pɔzɩ paɣtʋ wɩlɩyaa nɛ Farɩsɩ ñɩma se: «Pɩha nʋmɔʋ se pala nɛ kʋdɔndʋ nɔɔyʋ yɔɔ cɛ kɩyakʋ kɩhɛzʋʋ wiye yaa pataala?» 4Ɛlɛ́, potocosi-i natʋyʋ. Peeɖe Yesu hɔm kʋdɔndʋ ɛnʋ nɛ ɛla nɛ ɛ-yɔɔ cɛ nɛ eheyi-i se: «Wolo ŋɖɛɛ.» 5Pʋwayɩ lɛ, ɛpɔzɩ-wɛ se: «Yee mɩ-taa nɔɔyʋ pɩɣa yaa ɛ-nɔ ɛtɔlɩ lɔkɔ taa kɩyakʋ kɩhɛzʋʋ wiye, pʋdʋ yeki-i lɩzʋʋ kpaagbaa se pɩkɛ kɩyakʋ kɩhɛzʋʋ naa we?» 6Ɛlɛ́, patapɩzɩ pocosi-i natʋyʋ.
Yesu heyi ɛyáa se palɩzɩ kɛtɛzaɣ ɖɩjaɣyɛ
7Yesu kana ɛzɩma mbʋ́ mbá paya tɔɔnaɣ ɖɩtɔɔyɛ yɔ, palɩzɩɣ ɖɩjaɣyɛ kɩbanɖɛ yɔ. Pʋ-yɔɔ etuu-wɛ eduuye se: 8«Yee nɔɔyʋ ɛya-ŋ kazandʋ ɖeɖe nɛ ŋwolo yɔ, taahuyi se ŋlɩzɩɣ ɖɩjaɣyɛ kɩbanɖɛ. Mbʋ́ pʋyɔɔ yɔ, pʋtɔmaɣ yɔ paya nɔɔyʋ nɛ ɛ́lɛ́ kɩlɩ-ŋ. 9Taayele nɛ weyi ɛya-mɩ yɔ, ɛkɔɔ eheyi-ŋ se: ‹Kʋyɩ ŋkazɩ sɔsɔ ɖɩjaɣyɛ.› Pʋbʋ, ŋkʋyʋʋnɩ fɛyɛ nɛ ŋwolo ŋcaɣnɩ ɖooo wayɩ. 10Ɛlɛ́, yee paya-ŋ kazandʋ ɖeɖe nɛ ŋwolo yɔ, caɣnɩ wayɩ nɛ weyi ɛya-ŋ yɔ, ɛkɔma lɛ, eeheyi-ŋ se: ‹Man-taabalʋ! Kɔɔ ŋcaɣ ɖɩjaɣyɛ kɩbanɖɛ taa.› Pʋbʋ, paɖʋ-ŋ hɩɖɛ ña nɛ mbá patɩŋa ɩcaɣaɣ yɔ pɛ-ɛsɩndaa. 11Mbʋ́ pʋyɔɔ yɔ, weyi ɛkpazɩɣ ɛ-tɩ yɔ, petisiɣ-i nɛ weyi ɛ́lɛ́ tisiɣ ɛ-tɩ yɔ, pakpazɩ-ɩ.»
Yesu heyi ɛyáa se payaa kʋñɔndɩnaa pɛ-tɛ
12Pʋwayɩ lɛ, Yesu heyi Farɩsɩ tʋ weyi ɛɛya-ɩ ɛ-tɛ yɔ se: «Yee ŋlabɩ kazandʋ yɔ, taayaa ñɛ-ɛgbaɣdɩnaa yaa ña-ñɩma yaa ña-taabalaa ñɩm tɩnaa. Mbʋ́ pʋyɔɔ yɔ, papɩzɩɣ paya-ŋ ɖɔɖɔ nɛ pɩla se pɛhɛyɩ-ŋ ña-kʋjɔʋ. 13Ɛlɛ́, yee ŋlabɩ kazandʋ yɔ, yaa kʋñɔndɩnaa nɛ mbá pe-nesi camaa yɔ nɛ kalɩkalasɩ nɛ yʋlʋmaa. 14Yee ŋlabɩ ḿbʋ́ yɔ, ŋhiɣ ña-tɩ! Mbʋ́ pʋyɔɔ yɔ, paapɩzɩɣ pɛhɛyɩ-ŋ. Ɛlɛ́, Ɛsɔ kaɣnɩ-ŋ hɛyʋʋ kɩyakʋ ŋgʋ́ efeziɣ ɛyáa kʋtʋʋzaa sɩm taa yɔ.»
Halɩkpaɣyɛ kazandʋ eduuye
(Mat 22.1-10)
15Yesu yɔɔdɩ ḿbʋ́ lɛ, mbá paawɛ peeɖe yɔ, pa-taa lɛlʋ heyi-i se: «Weyi ɛkaɣ tɔɔʋ tɔɔnaɣ Ɛsɔ Kewiyaɣ taa yɔ, ehiɣ ɛ-tɩ!» 16Peeɖe Yesu tuu-i eduuye se: «Abalʋ nɔɔyʋ labɩnɩ kazandʋ nɛ ɛ́yáa ɛyáa sakɩyɛ. 17Tɔɔnaɣ pɩwa lɛ, etiyi ɛ-tʋmlaɖʋ se ewolo eheyi mbá ɛɛya-wɛ yɔ se pɔkɔɔ se alɩwaatʋ talaa. 18Peeɖe patɩŋa papazɩ tenduu kʋɖʋm kʋɖʋm se paanaɣ alɩwaatʋ. Kajalaɣ tʋ heyi tiyiyu ɛnʋ se: ‹Mayabɩ hayɩm nabʋyʋ nɛ mancaɣ se mowolo mana-pʋ. Pʋ-yɔɔ lɛ, mentendiɣ-ŋ se maapɩzɩɣ mɔnkɔɔ.› 19Lɛlʋ heyi-i se: ‹Mayabɩ naŋ kɩhayɩŋ hiu, mancaɣ se mamaɣzɩ-ɩ nɛ mana. Pʋ-yɔɔ lɛ, mentendiɣ-ŋ se maapɩzɩɣ mɔnkɔɔ.› 20Tozo tʋ ñeheyi-i ɖɔɖɔ se: ‹Lɛɛlɛɛyɔ mankpaɣ halʋ, maapɩzɩɣ mɛnɖɛɛ meyebi-i.› 21Tʋmlaɖʋ ɛnʋ, ɛpɩsɩ ɛ-caa cɔlɔ nɛ ɛkɛdɩ-ɩ mbʋ́ pɩlɩwa yɔ. Peeɖe pɩwɩzɩ ɛ́lɛ́ pɩŋŋ nɛ ɛɖaɣnɩ-ɩ tiyuu se: ‹Wolo lɔŋ kɩyakɩŋ nɛ tɛtʋ pa-taa nɛ habɛɛ nɔsɩ nɛ ŋyaa kʋñɔndɩnaa nɛ mbá pe-nesi camaa yɔ nɛ yʋlʋmaa nɛ kalɩkalasɩ nɛ pɔkɔɔ.› 22Ɛlabɩ ḿbʋ́ lɛ, ɛpɩsɩ eheyi-i se: ‹Caa! Malabɩ mbʋ́ ŋheyi-m yɔ nɛ ɖɩjaɣyɛ kazɩ yem.› 23Peeɖe ɛ́lɛ́ tasɩ-ɩ heyuu se: ‹Lɩɩ ŋwolo tɛyɛ nʋmɔŋ taa nɛ ɖenɖe sʋlʋmɩyaa cakɩ pasʋlʋmʋʋ yɔ nɛ ŋna mbá lɛ, ŋcɛyɩ-wɛ nɛ pɔkɔɔ pasʋʋ man-ɖɩɣa taa nɛ kosu. 24Meheyiɣ-mɩ se ɛyáa mbá maaɖʋnɩ ñʋʋ yɔ, pa-taa nɔɔyʋ ɛɛkaɣ naʋ man-kazandʋ ńdʋ́ tɩ-yɔɔ kaʋ.› »
Pʋcɔ ɛyʋ kɛ Yesu tiyiyu lɛ, pʋwɛɛ se eyele pɩtɩŋa
(Mat 10.37-38)
25Nakʋyʋ wiye ɛyáa samaɣ nɛ Yesu pɔɖɔŋaɣ. Pɩkɛdaa lɛ, ɛkɛzɩ ɛ-tɩ nɛ pɔ-yɔɔ nɛ eheyi-wɛ se: 26«Weyi ɛcaɣ se ɛtɩŋ-m yɔ, pʋwɛɛ se ɛsɔɔlɩ-m nɛ pɩkɩlɩ ɛ-caa nɛ e-ɖoo nɛ ɛ-halʋ nɛ e-piya nɛ ɛ-ɖalaa nɛ ɛ-kɔɔnaa nɛ ɛ-maɣmaɣ ɛ-tɩ. Pɩtɛkɛ ḿbʋ́, ɛɛpɩzɩɣ ɛkɛ mɔn-tɔmkpɛlɩkɩyʋ. 27Weyi ɛtatɩŋ ma-wayɩ nɛ ɛtɔɔ kʋñɔŋ siŋŋ#14.27 Ɛtɔɔ kʋñɔŋ siŋŋ: ɩcɔnɩ Mat 10.38. yɔ, ɛɛpɩzɩɣ ɛkɛ mɔn-tɔmkpɛlɩkɩyʋ. 28Toovenim lɛ, mɩ-taa weyi ɛmaɣ kuduyuu sɔsɔʋ nɛ ɛtacaɣ se ɛmaɣzɩ nɛ ɛna se e-liidiye talɩɣ-ɩ yaa ɖɩɩtalɩɣ-ɩ nɛ pʋcɔ? 29Yee ɛtala ḿbʋ́ nɛ ɛkʋyɩ yem ɛpazɩ kiɖe sɩʋ nɛ ɛtapɩzɩ ɛma-kʋ nɛ kɩtɛ yɔ, ɛyáa kɔŋ powoŋ-i 30nɛ pɔtɔ se: ‹Ɛnɛ ɛma kuduyuu nɛ ɛtapɩzɩ ɛtɛm-kʋ.› 31Ḿbʋ́ ɖɔɖɔ pʋwɛɛ. Yee wiyaʋ sɔsɔ nɔɔyʋ ewoki se ɛ nɛ wiyaʋ sɔsɔ lɛlʋ poyoo yɔ, ɛcakɩ ɛmaɣzɩ ɖeu nɛ ɛna se yoyaa sakɩyɛ mbá ɛwɛna yɔ, papɩzɩɣ nɛ pa nɛ e-koyindu weyi ɛ́lɛ́ ñɩma kɩlɩ-ɩ tam naalɛ taa yɔ, poyoo yaa paapɩzɩɣ. 32Yee ɛnawa se ɛɛpɩzɩɣ yɔ, ɛkʋsʋʋ ɛyáa nɛ etiyi-wɛ ɛ́lɛ́ cɔlɔ poliŋ taa se pɔpɔzɩ-ɩ se ɛbɛ pʋwɛɛ se ɛla nɛ ɛ nɛ ɛ́lɛ́ peceɣ.» 33Peeɖe Yesu heyi-wɛ se: «Ḿbʋ́ ɖɔɖɔ mɩ-taa nɔɔyʋ ɛɛpɩzɩɣ ɛkɛ mɔn-tɔmkpɛlɩkɩyʋ nɛ eteyele mbʋ́ pɩtɩŋa payɩ ɛwɛna yɔ.»
34«Đɔm kɛ pʋyʋ kɩbanʋ. Ɛlɛ́, yee pilesi pi-leleŋ lɛ, ɛzɩma palakɩ-pʋ nɛ pɩɖaɣnɩ leleŋ kpaʋ yɔ? 35Halɩ pɩɩwazɩɣ hayɩm taa yaa huɖe taa maɣmaɣ. Pɔlɔʋ-pʋ awayɩ. Meheyiɣ-mɩ se weyi ɛwɛnɩ nɩŋgbaaŋ lɛ, ɛnɩɩ.»
Currently Selected:
Luka 14: KABI
Highlight
Share
Copy
Want to have your highlights saved across all your devices? Sign up or sign in
