Luka 4
4
Satanɩ takɩ Yesu lakʋ taa
(Mat 4.1-11; Mrk 1.12-13)
1Fezuu Kiɖeɖeu tibi Yesu yɔɔ lɛ, ɛlɩɩnɩ Yɔɔrdaŋ pɔɔ nɔɔ nɛ ɛpɩsɩɣ. Peeɖe kitolisi-i nɛ kiwoni-i lakʋ taa 2nɛ ɛcaɣ peeɖe kɩyakɩŋ nɩɩnaza nɛ Satanɩ wɛɛ ɛtakɩɣ-ɩ. Ɛtaatɔɔ nabʋyʋ kɩyakɩŋ ɩnʋ ɩ-taa. Ɩ-wayɩ lɛ, ñɔɔsɩ kpa-ɩ 3nɛ Satanɩ ɛnʋ eheyi-i se: «Yee ŋkɛ Ɛsɔ Pɩyalʋ yɔ, heyi pɩyɛ ɖɩnɛ nɛ ɖɩpɩsɩ tindine nɛ ŋtɔɔ.» 4Yesu cosi-i se: «Pama Ɛsɔtɔm Takayaɣ taa se pɩtɛkɛ tɔɔnaɣ ɖeke ɛyʋ cakɩnɩ wezuu.»
5Pʋwayɩ lɛ, Satanɩ kpaɣ-ɩ nɛ ɛkpazɩ-ɩ ɖenɖe pɩkɩlɩ kʋyʋʋ yɔ nɛ ɛtɩwɩlɩ-ɩ kedeŋa kpeekpe yɔɔ ajɛya 6nɛ eheyi-i se: «Mahaɣ-ŋ kedeŋa kanɛ kɔ-yɔɔ ɖoŋ nɛ ka-ñɩm tɩŋa payɩ. Mbʋ́ pʋyɔɔ yɔ, me-nesi taa paɖʋzɩ pɩtɩŋa nɛ weyi mɔnsɔɔlaa yɔ, ɛnʋ mahaɣ. 7Pʋ-yɔɔ lɛ, yee ŋluŋ mɛn-tɛɛ yɔ, mankpakɩɣ pɩtɩŋa payɩ nɛ manɖʋzɩ ñe-nesi taa.» 8Yesu cosi-i se: «Pama Ɛsɔtɔm Takayaɣ taa se: ‹Ña-Kɩpaɣlʋ Ɛsɔ ɖeke koŋ tɛɛ pʋwɛɛ se ŋluŋ nɛ ŋla ɛ-tʋmɩyɛ.› »
9Satanɩ woni Yesu ɖɔɖɔ Yeruusalɛm nɛ ɛkpazɩ-ɩ Ɛsɔ kuduyuu sɔsɔʋ ñʋʋ taa nɛ eheyi-i se: «Yee ŋkɛ Ɛsɔ Pɩyalʋ yɔ, kʋyɩ ŋmaa tataa. 10Mbʋ́ pʋyɔɔ yɔ, pama Ɛsɔtɔm Takayaɣ taa se
Ɛsɔ heyiɣ e-tiyiyaa nɛ pohuuzi ñɔ-yɔɔ nɛ nabʋyʋ ɛtaalabɩ-ŋ.
11Pamawa ɖɔɖɔ se pétéɣ-ŋ nɛ pɔ́ɖɔ́kɩ-ŋ camɩyɛ se
ŋtaatɔlɩ pɩyɛ naɖɩyɛ yɔɔ nɛ pʋkʋ ña-naŋgbaŋaɣ.»
12Yesu cosi-i se: «Pama ka-taa ɖɔɖɔ se
taatakɩ ña-Kɩpaɣlʋ Ɛsɔ se ŋna ɛ-wayɩ.»
13Satanɩ tɛm-ɩ takʋʋ pɩtɩŋa pɩ-taa ḿbʋ́ lɛ, eyebi-i nɛ ɛcaŋ ɛɖɛɛ se pɩlaba wiɖiyi.
Yesu pɩsaa ɛkɔɔ Galilee egeetiye taa
(Mat 4.12-17; Mrk 1.14-15)
14Pʋwayɩ lɛ, Yesu pɩsɩ Galilee egeetiye taa nɛ Fezuu Kiɖeɖeu ɖoŋ nɛ ɛ-hɩɖɛ sɛɛ egeetiye ńɖɩ́ ɖɩtɩŋa ɖɩ-taa. 15Ɛwɩlaɣ Ɛsɔtɔm Ɛsɔ ɖɩsɛyɛ ndɩ ndɩ taa nɛ ɛyáa tɩŋa payɩ yɩɣyɩɣ-ɩ.
Yesu heyiɣ ɛyáa Ɛsɔtɔm
(Mat 13.53-58; Mrk 6.1-6)
16Pʋwayɩ lɛ, Yesu wolo Nazarɛɛtɩ ɖenɖe pɔɖɔkɩ-ɩ nɛ ɛpaɣlɩ yɔ nɛ ɛsʋʋ Ɛsɔ ɖɩsɛyɛ taa kɩyakʋ kɩhɛzʋʋ wiye ɛzɩ ɛtɩɩlakʋʋ yɔ. Peeɖe ɛkʋyaa ɛsɩŋ se ɛkalɩɣ Ɛsɔtɔm 17nɛ pɛcɛlɩ-ɩ náyʋ Ezaayii takayaɣ nɛ ekuli ɖoli nɔɔyʋ nɛ ɛkalɩ. Pama peeɖe se:
18«Kɩpaɣlʋ lɩzɩ-m nɛ ɛha-m e-Fezuu Kiɖeɖeu.
Toovenim, ɛlɩzɩ-m nɛ
etiyi-m se monsusi kʋñɔndɩnaa Laŋhɛzɩyɛ Tɔm.
Etiyi-m se
meheyi salaka tɩnaa se pɛwɛ pa-tɩ yɔɔ!
Meheyi ɖɔɖɔ yʋlʋmaa se pɔkɔŋ pɛ-ɛsɛ kuluu!
Etiyi-m se
moholi ajamaa mbá panazɩɣ-wɛ yɔ.
19Etiyi-m ɖɔɖɔ se
meheyi ɛyáa tɩŋa pɩnaɣ ŋgá Ɛsɔ naɣ pa-pʋtɔdɩyɛ yɔ kɔ-tɔm.»
20Yesu tɛm kalʋʋ lɛ, esuli-kɛ nɛ ɛcɛlɩ tʋmɩyɛ sɩnɩyʋ nɛ pɩsɛɣ ɛcaɣ se ɛpazɩ-wɛ wɩlʋʋ. Ɛlɛ́, ɛyáa mbá pɛwɛ Ɛsɔ ɖɩsɛyɛ taa peeɖe yɔ, patɩŋa pɛkpɛzɩ ɛsɛ nɛ pɔcɔŋnɩ-ɩ. 21Peeɖe Yesu pazɩ-wɛ heyuu se: «Tɔm ndʋ́ mankalɩ lɛɛlɛɛyɔ yɔ, tɩlabɩ alɩwaatʋ ndʋ́ ɩnɩɣaɣ-tʋ yɔ.»
22Ɛyɔɔdɩ ḿbʋ́ lɛ, patɩŋa payɩɣyɩ-ɩ nɛ pɩlabɩ-wɛ piti nɛ lootiye tɔm ndʋ́ eheyi-wɛ yɔ nɛ pɔtɔŋ se: «Pɩtɛkɛ Yozɛɛfʋ pɩyalʋ yɔ?» 23Ɛlɛ́, Yesu heyi-wɛ se: «Toovenim lɛ, ɩkaɣ-m tuuu eduuye se: ‹Fɛɖʋ, fɛ ña-tɩ ña-maɣmaɣ.› Halɩ ɩkaɣ-m tɔm ɖɔɖɔ se: ‹Đɩnɩ mbʋ́ pɩtɩŋa ŋlabɩ Kapɛrnayum yɔ, la ḿbʋ́ ña-tɩ tɩŋa ñɛ-tɛ cɩnɛ.› » 24Peeɖe ɛtasɩ-wɛ heyuu se: «Toovenim lɛ, mankaɖɩɣ-mɩ se patakpaɣ náyʋ se ɛkɛ pʋyʋ ɛ-maɣmaɣ ɛ-tɛ. 25Toovenim tɔm meheyiɣ-mɩ se Elii alɩwaatʋ taa lɛ, lelaa sakɩyɛ kɛwɛ Izrɛɛlɩ ɛjaɖɛ taa. Alɩwaatʋ ńdʋ́ lɛ, tɛʋ tanɩɩ pɩnzɩ naadozo nɛ fenasɩ loɖo nɛ ñɔɔsɩ sɔsɔsɩ nasɩyɩ lɩɩ ɛjaɖɛ tɩŋa. 26Ŋgʋ́, Ɛsɔ taatiyi Elii lelaa ḿbá pa-taa nɔɔyʋ cɔlɔ. Ɛlɛ́, lelu nɔɔyʋ cɔlɔ etiyi-i. Ɛ́lɛ́ tɛkɛ Yuda tʋ, ɛɛwɛ Sarɛptaa, Sidɔɔ egeetiye taa. 27Canasɩ sakɩyɛ kɛwɛ ɖɔɖɔ Izrɛɛlɩ ɛjaɖɛ taa náyʋ Eliizee alɩwaatʋ taa. Ŋgʋ́, sɩ-taa nakɛyɛ yɔɔ taacɛ, ɛlɛ́, Siirii ɛjaɖɛ taa tʋ Naamaɣ yɔɔ ɖeke kɛcɛbɩna.»
28Mbá patɩŋa paawɛ Ɛsɔ ɖɩsɛyɛ taa peeɖe yɔ, panɩ ḿbʋ́ lɛ, pɩwɩzɩ-wɛ pɩŋŋ. 29Peeɖe pakʋyaa pakpa Yesu nɛ palɩzɩ-ɩ nɛ pɛ-tɛtʋ wayɩ nɛ pakpanɩ-ɩ pʋʋ ŋgʋ́ kʋ-yɔɔ pɛ-tɛtʋ wɛɛ yɔ kʋ-ñʋʋ taa se potuzi-i nɛ ɛtɔlɩ kajalaŋa taa. 30Ɛlɛ́, Yesu tɩŋnɩ pɛ-hɛkʋ taa hɛɛɛ nɛ ɛcaŋ ɛɖɛɛ.
Yesu wazɩ abalʋ weyi eleeu nɔɔyʋ wɛ ɛ-wayɩ yɔ
(Mrk 1.21-28)
31Yesu ɖɛwa lɛ, ewolo Kapɛrnayum Galilee egeetiye taa nɛ ɛwɩlɩɣ ɛyáa Ɛsɔtɔm Ɛsɔ ɖɩsɛyɛ taa kɩyakʋ kɩhɛzʋʋ wiye. 32Peeɖe pɩlabɩ-wɛ piti nɛ ɛzɩma mbʋ́ ɛwɩlaɣ-wɛ yɔ, mbʋ́ pʋyɔɔ yɔ, ɛwɩlaɣ-wɛ nɛ abalɩtʋ.
33Puwiye lɛ, abalʋ nɔɔyʋ kɛwɛ peeɖe, eleeu nɔɔyʋ kɛwɛ ɛ-wayɩ. Pɩkɛdaa lɛ, ɛma kubuka se: 34«Ou! Yesu Nazarɛɛtɩ tʋ, ɛbɛ ŋcaɣnɩ-ɖʋ? Ŋkɔm se ŋkʋ-ɖʋ yaa we? Mansɩm mbʋ́ ŋkɛnaa yɔ ɖeu. Ŋkɛ Ɛsɔ Ɛyʋ.» 35Peeɖe Yesu holini-i se: «Hei! Su peeɖe nɛ ŋse abalʋ ɛnʋ ɛ-wayɩ. Ɛlɛ́, eleeu co abalʋ ɛnʋ nɛ ɛyaɣ-ɩ nɛ tɛtʋ ɛyáa ɛsɩndaa nɛ ɛcaŋ ese. Ɛlɛ́, pɩtala abalʋ ɛnʋ pʋyʋ.» 36Peeɖe pɩɖɩɣzɩ ɛyáa tɩŋa nɛ pɔpɔzʋʋ ɖama se: «Tɔm ndʋ́ lɛ ḿbʋ́? Abalʋ ɛnɛ, ɛñazɩɣ aleewaa nɛ abalɩtʋ nɛ peseɣ.» 37Ḿbʋ́ labɩna nɛ Yesu hɩɖɛ sɛɛ Galilee egeetiye tɩŋa payɩ taa.
Yesu wazɩ kʋdɔndɩnaa sakɩyɛ pa-kʋdɔmɩŋ
(Mat 8.14-17; Mrk 1.29-34)
38Yesu lɩnɩ Ɛsɔ ɖɩsɛyɛ taa lɛ, ewolo Siimɔɔ tɛ. Kɩnamɩyɛ kɔɖɔkɩ Siimɔɔ yɔsɔ siŋŋ nɛ petendi Yesu se ɛla nɛ ɛ-yɔɔ cɛ. 39Peeɖe Eluzi ɛ-tɩ nɛ eholini kɩnamɩyɛ ńɖɩ́ se ɖɩcɛ nɛ ɖɩcɛ ɖɔɖɔ halʋ ɛnʋ ɛ-yɔɔ nɛ ɛtɩkʋyɩ ɛha-wɛ lɩm.
40Wɩsɩ ɖʋwa lɛ, mbá patɩŋa paawɛnɩ kʋdɔndɩnaa ndɩ ndɩ yɔ, powoni-wɛ Yesu cɔlɔ nɛ ɛtɩnɩ e-nesi paa weyi ɛ-yɔɔ nɛ ɛ-yɔɔ cɛ. 41Ɛɖɔɔnɩ aleewaa ɖɔɖɔ ɛyáa sakɩyɛ wayɩ nɛ pamakɩ kubusi se: «Ŋkɛ Ɛsɔ Pɩyalʋ.» Ɛlɛ́, Yesu paɣ́-wɛ se pataakuli ɛ-wayɩ. Mbʋ́ pʋyɔɔ yɔ, pasɩm-ɩ se ɛnʋ lɛ Weyi Ɛsɔ Lɩzaa Yɔ.
Yesu woba Yudee egeetiye taa se esusi Ɛsɔtɔm
42Tɛʋ tɩfema lɛ, Yesu lɩɩ ewolo lakʋ taa. Peeɖe ɛyáa samaɣ pazɩ-ɩ ñɩnʋʋ. Pana-ɩ lɛ, powolo ɛ-cɔlɔ nɛ palaɣzɩɣ-ɩ se ɛtaaɖɛɛ. 43Ɛlɛ́, Yesu heyi-wɛ se: «Pʋwɛɛ se monsusi ɖɔɖɔ Ɛsɔ Kewiyaɣ Laŋhɛzɩyɛ Tɔm tɛtʋ lɛɛtʋ taa. Mbʋ́ pʋyɔɔ yɔ, pɩ-maɣmaɣ pʋ-yɔɔ Ɛsɔ tiyi-m.» 44Peeɖe ɛɖɛwa nɛ esusuu Ɛsɔtɔm Yudee egeetiye taa Ɛsɔ ɖɩsɛyɛ ndɩ ndɩ taa.
Currently Selected:
Luka 4: KABI
Highlight
Share
Copy
Want to have your highlights saved across all your devices? Sign up or sign in
