Génesis 19
19
Sodomawan Gomorra puchukasqanmanta
1Chay iskay angelkunam Sodoma llaqtaman tardeykuytaña chayarurqaku. Lotñataqmi tiyachkarqa Sodoma llaqtapa punkunpi, chaymi angelkunata rikuykuspan paykunata chaskiq rirqa, hinaspam pampaman kumukuykuspan 2nirqa: Taytaykuna, ama hina kaspayá kay serviqnikichikpa wasinman samakunaykichikpaq chaynallataq chakikichiktapas mayllakunaykichikpaq yaykuykamuychik, paqarin achikyaqtañachiki pasakunkichik, nispa.
Chaymi paykunañataq nirqaku:
Graciastam qoykiku, ñoqaykuqa kay plazallapim achkisaqku, nispanku.
3Ichaqa Lotmi paykunata hikutarqa, chaymi wasinman yaykurqaku, Lotñataqmi mikuyta yanurachispa mana levadurayuq tantatawan qoykuptin mikurqaku.
4Manaraq puñuykuchkaptinkum Sodomapi llapa runakuna, jovenkunamanta qallarispa machukunakama Lotpa wasinta lliw muyururqaku. 5Hinaspam Lotta qayaykacharqaku:
¿Maytaq kunan tuta samachisqayki runakuna? Hurqomuy abusanaykupaq, nispanku.
6Chaymi Lot lloqsimuspan punkuta wichqaykurqa paykunawan rimananpaq. 7Hinaspanmi nirqa:
Llaqtamasillaykuna, amayá chay mana allintaqa ruwaychikchu. 8Kachkanmi manaraq qari reqsiq iskay warmi churiykuna, paykunata hawaman hurqoramuptiyá munasqaykichikta ruwaychik. Kay runakunataqa ama imatapas ruwaychikchu wasiypi samakusqanrayku, nispa.
9Hinaptinmi chay runakunañataq nirqaku:
Suchuy kaymanta, huklaw llaqtayuq kachkaspachu ¿kunanñataq juezña rikurirunki? Kunanqa paykunamantapas aswantaraqmi ruwasqaykiku, nispanku.
Chaymi tukuy kallpankuwan Lotta tanqarqaku hinaspam punku pakinankupaq asuykurqaku. 10Hinaptinmi chay samakuqkuna Lotta wasi ukuman aysaykuspanku punkuta wichqarurqaku. 11Hawapi runakunatañataqmi llapallankuta ñawsayarachirqaku, hinaptinmi manaña ima ruwakuyta atispa punkuta maskarqaku. 12Chaymantam chay samakuq runakuna Lotta nirqaku:
¿Kachkanchu kaypi aylluykikuna, masaykikuna, qari churikikuna hinaspa warmi churikikuna? Sichum kaptinqa llapallanta kay llaqtamanta hurqoy. 13Kay llaqtatam puchukachisaqku. Paykunapa millakuypaq hucha ruwasqankum Tayta Diospa qayllanman chayarun, chaymi pay kachamuwanku puchukachinaykupaq, nispanku.
14Chaymi wasinmanta Lot lloqsispan warmi churinkunata casaray munaqkunata nimurqa: Kay llaqtamanta utqayman lloqsiychik, Diosmi kay llaqtata puchukachinqa, nispa.
Chay runakunam ichaqa burlapaq hapirurqaku. 15Achikyaykamuchkaptinmi angelkuna Lotta hikutarqaku:
Utqayman lloqsiy, warmikiwan chaynallataq iskaynin warmi churikikunapiwan, kay llaqtata puchukachiptiyku mana wañunaykichikpaq, nispanku.
16 # 2 Pe 2.7. Lot mana utqayman lloqsiptinmi, Tayta Diospa kuyapayakuyninman hina, chay iskaynin angelkuna Lotta, warminta hinaspa iskaynin warmi churinkunata makinmanta aysaspa llaqtamanta hawaman hurqorqaku. 17Hurqoramuspankum huknin ángel nirqa:
Salvakuyta munaspaykiqa utqayman ayqey. Ichaqa amam qepaykita qawarikamunkichu amataqmi kay pampapiqa sayayllapas-sayaykunkichu, ama puchukarunaykipaq orqoman lluptiy, nispa.
18Hinaptinmi Lot nirqa:
Taytallaykuna amayá chaynaqa pasakuchunchu. 19Kay siervollaykitaqa anchatañam yanapaykuwanki, kuyakuynikiman hinataqmi vidallaytapas salvaykuwanki, orqoman ayqeytaqa manam atiymanchu, qonqaytachá imapas pasawaptin wañuruyman.
20Waqaya wak taksa llaqtacha hichpallapi kachkan, wakmanyá lluptikusaq mana wañurunaypaq, nispa.
21Chaymi huknin ángel nirqa:
Kay mañakuynikitapas uyarinim, chaynaqa wak niwasqayki llaqtachataqa manam puchukachisaqchu. 22Chaynaqa, utqayman lluptiy, wakman chayanaykikamam mana imatapas ruwasaqchu, nispa.
Chayraykum chay llaqtachapa sutin #19.22 Zoar ninanqa “taksalla” ninanmi.Zoar karqa.
23Lotmi inti qespimuyta Zoar llaqtachaman chayarurqa. 24Tayta Diosñataqmi azufretawan ninata cielomanta parachimurqa Sodoma, Gomorra llaqtakunaman. 25#Mt 10.15; 11.23-24; Lc 10.12; 17.29; 2 Pe 2.6; Jud 7.Hinaspanmi chay qechwapi llaqtakunatapas, chaypi yachaq runakunatapas chaynallataq plantakunatapas lliwta puchukarachirqa. 26#Lc 17.32.Lotpa warminñataqmi qepaman qawariruspa kachi rumiman tikrakururqa.
27Paqarinnintin tutapaytam Abraham rirqa Dioswan parlasqanku sitioman. 28Chaymi Sodoma, Gomorra llaqtakuna lawta chaynataq tukuy qechwankunata qawariptin hornopa qosniynin hinaraq qosnirimuchkasqa. 29Chaynatam Dios chinkarachirqa qechwapi llapallan llaqtakunata. Ichaqa Abrahamta yuyarispam Lotta hurqorqa, yachasqan llaqtapi mana puchukarunanpaq.
Moabpa, Amonpa qallariyninmanta
30Lotmi Zoar llaqtachapi yachayta manchakuspan orqopi machayman pasakurqa, hinaspam iskaynin warmi churinkunapiwan chaypi yacharqa. 31Chaymi sullkanta piwi kaq nirqa:
Taytanchikqa machuñam. Runakunapa costumbrenman hina casarakunanchikpaqpas manam ima qaripas kanñachu. 32Chaynaqa, taytanchikta vinowan sinkarachispayá paywan puñurusunchik chaynapi paypa miraynin mana qollunanpaq, nispa.
33Hinaspam chay tuta taytankuta vinowan sinkarachirqaku, chaymi taytanwan piwi kaq puñururqa. Taytanmi ichaqa mana musyakurqachu churin ustuykusqanta nitaq hatarisqantapas.
34Paqarinnintinñataqmi sullkanta piwi kaq nirqa:
Chisi tutam taytanchikwan puñururqani, chaynaqa kunanpas huktawanyá sinkarachisun, qamñataq paywan puñunaykipaq, chaynapi taytanchikpa miraynin mana qollurunanpaq, nispa.
35Chay tutapas taytankuta sinkarachiptinkum sullka kaqñataq paywan puñururqa, taytanmi ichaqa mana musyakurqachu churin ustuykusqanta nitaq hatarisqantapas. 36Chaynapim Lotpa iskay warmi churinkunaqa taytankupa churinta wiksayakururqaku. 37Piwi kaqmi wachakuruspan Moabwan suticharqa, paypa mirayninkunam Moab casta runakuna karqaku. 38Sullka kaqpas wachakuruspanmi #19.38 Hebreo simipi Ben-ami ninanqa “runaykunapa churin”.Ben-amiwan suticharqa, paypa mirayninkunam Amón casta runakuna karqaku.
Currently Selected:
Génesis 19: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
