Génesis 23
23
Sara wañukuptin pampasqankumanta
1Saram kawsarqa pachak iskay chunka qanchisniyuq watankama 2Payqa Quiriat-arba llaqtapim wañukurqa, chay llaqtapa huknin sutinmi Hebrón. Hebronqa tarikun Canaán allpapim. Sara wañukuptinmi Abraham llumpayta waqarqa. 3Chaymi warminpa ayanta saqeykuspan Het ayllukunawan rimaq rirqa, 4#Heb 11.13.#Hch 7.16.hinaspam nirqa: Ñoqaqa huklaw llaqtayuqmi qamkuna ukupi yachani. Chaynaqa, warmiy pampanaypaqyá allpata rantikuwaychik, nispa.
5Chaymi Hetpa mirayninkuna nirqaku:
6Taytayku uyariykuwayku: Qamqa Diospa akllasqan runam ñoqayku ukupi kanki, ayaykitaqa allinnin sepulturapiyá pampaykuy, manam mayqanniykupas michakusqaykikuchu, nispanku.
7Chaymi Abraham hatariykuspa Het ayllukunapa qayllanpi kumuykuspan 8nirqa:
Sichum warmiypa ayan pampanayta munaspaykichikqa uyariykuwaspayá Zoharpa churin Efronta rimapayaykaysiwaychik, 9allpanpi kaq Macpela sutiyuq machayta rantikuruwananpaq. Preciontam pagapusaq chaynapi qamkuna ukupi pampakunayku allpa kananpaq, nispa.
10Efronpas chaypim tarikurqa Het runakunawan kuska. Chaymi llaqtapa punkunta llapallan yaykuqkuna uyarichkaptinku chaynataq Hetpa mirayninkunapa qayllanpi Abrahamta nirqa:
11Taytalláy, kayqaya allpapas machaypas makikipi, llaqtamasiykunapa qayllanpim mana qollqellapaq qoyki, chaypiyá wañukuqnikita pamparamuy, nispa.
12Hinaptinmi Abrahamqa chay Het ayllukunapa ñawpaqninpi huktawan kumuykuspan 13Efronta nirqa:
Ama hina kaspayá uyariykuway: Chay allpapa preciontayá chaskiykuway, chaynapi warmiypa ayanta chaypi pampamunaypaq, nispa.
14Chaymi Abrahamta Efrón nirqa:
15Taytalláy uyariykuway: Chay allpaqa cuestan tawa kilo parten qollqem, ¿ñoqanchikpiqa mayna achkamá chayqa? Chaypiyá warmikipa ayanta pampamuy, nispa.
16Hinaptinmi Efronpa nisqanta Abraham uyarispan, Het ayllukunapa qayllanpi tawa kilo parten qollqeta pagarqa, negociantekunapa paganan preciota. 17Chaynapim Mamrepa chimpan Macpela lawpi Efronpa allpan, chaypi machaypas chaynataq sachankunapas 18Abrahampaña karqa. Chaytaqa rikurqakum Het runakunapas chaynataq llaqtapa punkun yaykuqkunapas.
19Chayta ruwaruspanmi, warmin Sarapa ayanta Abraham pamparqa, Mamrepa chimpan Macpela machaypi. Mamre llaqtapa huknin sutinmi karqa Hebrón. Chayqa kachkan Canaán allpapim. 20Chaynapim Het ayllukunamanta rantisqan allpawan machaypas pampakunankupaq Abrahampaña karqa.
Currently Selected:
Génesis 23: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
