1 KORINTENA 15
15
DAYTA-KULOTA
Dayta-kulota vi Yesu Kristu
Mat 28; Mark 16; Luk 24; Yoh 20:21
1Ɓosiyonna, wulini nan min gigi humgi kay labara ma firina ma nan kusum tigina, ma nigi vumna, ma nigi ka lakay hayam wulini, 2Nigi fi su'dawa hiɗi namu kaw, la nigi vi dono'o hiɗi yoboyn ma nan kusum tigina, la naɗi vida vigi goy waa'a.
3Va ma jewn kayn ala nan vul tigiya va ma nan kaw fumna: Kayn ala Kristu miti kay sulukŋa vaya, ki ɗota di nala, 4nam piy gaa'a, nam dayay kulo'o kaw hay buurta ɦidita, ki ɗota di nala,#15:4 ɗuw hay Es 53:7-9; Nul 16:10. 5nam vul tuwam kir Kefas, bugolda kir sa doogo yam ma'na. 6Bugol kayni nam vul tuwam kir ɓosiyom tuwsina suw kis-vasl hay liyn kepe, ŋolsiya ka iriya ta-ta wulini, may segena kalay sene kaw. 7Bugol kayni nam vul tuwam kir Yakub, bugolda kir sa Apostolayna kaf.
8Bugolsi kaf nam vul tuwam kiran nanu, nan ki goor ma vuɗi hiɗi tilam hini vokomu nala.#15:8 Fi kayni hay Lop Ap 9:1-9. 9Kay nanu mi ma kiɗayna jar sa Apostolayn kaf, nan nagay a sa yan Apostolɗi kaw, kay nan li tapna vi Lawn lasi. 10May kuɗ slugota vi Lawna, nan ka hay liyanna dok-doko, slugota valam ta nam la' kanta nam may la' goy sur waaɗi, may nan li lopawa suwsi kafe, may mi nan kay tuwanɗi, may ti slugota vi Lawna ta ka hiɗi nanu. 11Kuɗ kayni, la mi nanu, la nisiya kaw, kayni ti kusta vuma'a, kayni mi va ma nigi vumu.
12May la yoboyna kusi ala Kristu dayawa kulo'o hay mitta pa, segen jargiya fi di ala dayta-kulota vi sa mitin tayɗi kayn nanige? 13La dayta-kulota vi sa mitin tayɗi, nala Kristu kaw bay day kulo'o. 14May la Kristu bay day kulo'o, nala yoboyna ma numa kusumna kayni waa'a kaw, vida vigiya waa'a kaw. 15Nala numa kaw muɗi si sum sa ka sin tam Lawna, kay numa li di-goyt kalam ala nam day Yesu kulo'o, may doli nam bay dayam kulo'o, la sa mitin may day kuloɗi. 16Kay la sa mitin day kuloɗi, Kristu bay day kulo'o kaw. 17May la Kristu bay day kulo'o, vida vigi kayni waa'a kaw, nigi ka hay sulukŋa vigi tuwa kaw. 18Nala nisi sa kalay sene hay Kristu nisi baawa goyo kaw. 19La nay ka hiɗi cubta-sle'ta hay Kristu kayni kuɗ irita ta hay nagat tanta ɦawa, nay muɗi haw ŋolo suw sum segen kaf.
Yesu Kristu vun-jaf ma day kulo jewna
20May wulini Kristu dayawa kulo'o hay mitta pa dayna, nam muɗi vun-jaf ma niyi jewna jar sa kalay senna. 21Kay mitta maawa kuɗ san kepe, nala dayta-kulota vi sa mitina maawa kuɗ san kepe kaw. 22Kay ki kaf mit hay Adam, nala kafe ma muɗ iriya hay Kristu kaw. 23May gigekaw col hay liyna valamu valamu: Kristu mi vun-jaf ma niyi jewna, bugolda sa fi Kristuna (ma day kulo'o) hay mata valamu. 24Bugolda dabaŋ-gu'ta ma ma'a, hay li ma nam ma vul mulda tam Lawna Bumna, hay li ma nam ma vat sle ma ŋulona hiɗi sle ma donona hiɗi sle ma gaŋeraŋa goy kaf vatna. 25Kay la litigekaw nam ma ti mulda ta-ta nam cuk sa gawt kalamna gaa kuɗ wur-selemu. 26Mitta kayni ti gawta ta nam ma vata' goy bugol kafta. 27Kay na'ta Lawn cuk slenawa kaf gaa kuɗ wur-selemu. May hay li ma nam di ala nam cuk slenawa kaf gaa kuɗ wur-selemu, kayn di ala nam ma cuk slen gaa kuɗ wur-selemu may hayɗi. 28May hay li ma nam (Lawna) cuk slenawa gaa kuɗ wur-sem Goora cukŋa, Goora kaw ma hot yalam gaa kuɗ nam ma cukum slen gaa kuɗ wur-selemna, nala Lawn ma mus mul kay slen kafe.
29Nisi sa hin tuwsi li baptisma kay sa mitina, nisi ma li linige? La sa mitin day kulo noŋɗi, nisi hin tuwsi fi baptisma kisiya kay mige? 30Numa hin tuwma tuɗ vun mitta dok-dok kayn kay mige? 31Hay buurta kaf nan ka vun mitta, ɓosiyonna, la nan fi subur tuwanu kigi nigiya, nan as subur tuwan hay Bum-Sumuna vaya Yesu. 32Nan dur hiɗi muura hay Efesus,#15:32 Ɗuw hay Lop Ap 19:23. la kayni kuɗ yalda vi sana, nan as fum kuɗ kayni mi mige? La sa mitin day kuloɗi,
nay taya, nay caya kaw, kay jifini nay ma mita.#15:32 Ɗuw kayni hay Es 22:13.
33Ɗut tuwgi goyɗi, poy hiɗi nuriyom sa joona ɓulak varta vi sa ŋaana. 34Hotgiyay hay hagata, ki sum sa ɗigera nala, ligi sulukɗi, kay sara'a may wi Lawnɗi. Nan di kayni kay nigi ma muɗ zulo'o.
Tuwna vi sa dayay-kulona
Fil 3:20-21; Dan 12:3; 1 Tes 4:13
35May san fi di ala: Sa mitina day kulo'o ir nanige? Tuwsi ma nisi ma goy hiɗi namna ir nanige? 36Naŋ sa ma ɦay-ɦayna, jaf ma naŋ cukum gaana, hot muɗ iri bay mitɗi. 37Hay li ma naŋ cuk jaf gaa'a, naŋ cukum kayni may mi tuwam ma day kulonɗi, may mi wal-jafna ɦawa, la mi jaf alkamare kla, la mi jaf mige kla. 38May Lawna vulum tuwna ki nam min nala, tam jafn marige nam vulum tuwna kuɗ jafamu jafamu.
39Tuwna kuɗ jafam valamu valamu. Tuw hena hay sana, tuw hay muura, tuw hena hay layayna, tuw hena hay kulufna kaw.
40Tuw ma wuralawn ka'a, tuw ma nagatna ka kaw, tuw ma wuralawna gajijita valam ir valamu, tuw ma nagatna gajijita valam ir valamu kaw. 41Wileta vi fatta ir va'a, wileta vi tilla ir valamu; mislekŋa kaw wileta valamu may ŋrayɗi.
42Dayta-kulota vi sa mitina kaw nala, tuwsi cuki gaa'a hay ɓulakka, may nisi ma day kulo hiɗi ɓulakɗita. 43Tuwsi cuki gaa'a hay zulota may nam day kulo'o hay gajijita, nam cuki gaa'a hay maŋayta, may nam day kulo'o hay gaŋeraŋa. 44Nam cuki gaa'a hay tuwna ma sliwna, may nam day kulo'o tuw ma ŋusta, kay tuw ma sliwna ka'a, tuw ma ŋusta ka kaw. 45Ki ɗot ɗo'ay nala ala: Sa ma jewna Adam muɗi goy ciwta irita, Adam ma cawna muɗi ŋusta ta vul irita.#15:45 Ɗuw hay Ct 2:7. 46Sa ma hiɗi ŋusta may co jewɗi, co jew mi ma bay-ŋusta, ma ŋusta co bugolda. 47Sa ma jewna yawamay goy hay nagat pa, nam vi nagata, sa ma sem ma'na may vi wuralawn pa may. 48Nisi sa fi nagatna ka ki nam ma may goy vi nagat pana nala, nisi sa fi wuralawna ka ki nam may goy wuralawn pa nala kaw. 49Ki nay sli tuw nam ma kotom hay nagat nala, nay ma sli tuw nam ma may wuralawn pa nala kaw.
Kolda vi sa viyna hay buur ma cawna
1 Tes 4:13-18
50May ɓosiyonna nan min digi ala: Hay sliwna hiɗi busuwna, san as yaw vocota hay mulda-Lawnɗi. Ɓulakka as yaw vocota hay ɓulakɗitɗi.
51Humgiya, nan min digi va ma ŋayayna: Nay ma kal sen kafɗi, may nay kaf ma muɗa, 52Ir liyn neeɗa ɦawa, ki san li iram mirik' nala, kuɗ buwna vi togolomna ma cawna. Kay togolomna ma buwa, sa mitina ma day kulo'o hay ɓulakɗita, nay kaf ma muɗa. 53Kay nanige kaw ma ɓulakay tanna ma cuk ɓulakɗita talamu, ma mit tanna ma cuk mitɗita talamu kaw. 54Hay li ma nam ma ɓulak tanna ma cuk ɓulakɗita talam cukŋa, hay li ma nam ma mit tanna ma cuk mitɗita talam cukŋa, hay na'ta yoboy ma ɗoy tani vunam hobawa goyo, (yoboy ma ala):
Mitta piy gaa hay kolda,
55Nak mitta, jarfayna vagu ka arige?
Nak mitta kolda vagu ka arige?#15:55 Fi kayni hay Es 25:8; Luk 20:36; Hos 13:14.
56May jarfayna vi mitta kayni mi sulukŋa, gaŋeraŋa vi sulukŋa kayni mi vun-ma-gatna. 57May gi deɓ mi Lawna ma vulay koldawa hay Bum-Sumuna vaya Yesu Kristu.
58Hay na'ta, ɓosiyon sa hayan kigina, lakgi dono'o, ge'ɗi, wulgi vokgi dok-dok hay lopna vi Bum-Sumuna, kay nigi wi ala lopna vigiya hay Bum-Sumuna li goy sur waaɗi.
Currently Selected:
1 KORINTENA 15: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001