1 KORINTENA 16
16
Gutda kuɗ ɓosiyayna
Rom 15:25-27
1May kay tok slena kay sa peldetna kayni, nigi ma li ki nan di tam tapna hay Galatiya nala: 2Hay buurta jewta vi lumuta, hin san gige gige jargiya ŋay slena valam kulo'o hay ziyna valamu, kuɗ donota valamu, kay nigi ma tun caw tar vulda vigiya hay li ma nan ma coys jargi tuwaɗi. 3Hay li ma nan coysawa, sum sa nigi vileksiya kay nisi ma nar vulda-minda vigi hay Yerusalemna, nan ma cuksiya hiɗi ɗerwel hay ɓisiya: 4May la ŋaa'a kay nan kay tuwanu ma tuɗa kaw, sum nisina ma tuɗ hiɗi nanu.
5Nan ma coys goy vigiya hay li ma nan jikisawa hay Makedoniya pana, kay nan min jikis hay Makedoniya pa. 6Kla, nan ma mus jargiya, la ta-ta hay cayda noŋo kla, kay nigi ma gan diranu hay liy ma nan min tuɗ hayna. 7Kuɗ ta wulinta, nan min ɗuwgi kulo kay senɗi, may nan min mus jargi ir neeɗa, la Lawn vul hagata.
8May nan min mus hay Efesus ta-ta hay pantekotta. 9Kay vun-galan ka mali goy kan vidiŋ' kay nan li lop ɗawni, may sa gawt ka ŋolo.
10Hay li ma Timotewus coysawa jargiya, nigi ma li a nam ma mus jargi bay narta, kay nam ka li lopna vi Bum-Sumuna ki nan nala. 11Nigi ma ɗuwum birek-cekɗi, gum diram hay hagata hiɗi toyta, kay nam ma co katanu, kay nan ka cubumu hiɗi ɓosiyayna.
12May ɓasuyna Apolos, nan siɗawan ŋolo kay nam ma tapis kuɗ ɓosiyayna kay tuɗis katgiya. May minda ka'a kay tuɗis katgi wulinɗi; la nam fi liynawa, nam ma coysa.
13Lakgi jigere, colgi dono'o hay vida, ligi kursulita, muɗgi dono'o. 14Slen pet ma nigi li'e, lum hay ti-kamda.
15Ɓosiyonna, nan min hin dit kayni katgi lo: Nigi wi ala ziyna vi Stefanas kayni mi vun-jafna ma jewna hay Akaya, nam ka gut kuɗ sa peldetna kaw. 16Sum sa ki kayn nala nigi ma slisi yisi kulo'o, hiɗi sum sa ka gut hay lopna, sa ka mak tuwsiya kaw.
17Dikan ka li firi ŋolo kay cota vi Stefanas hiɗi Fortinatus hiɗi Akaykus, kay nisi vurnaawa hay baŋalgiya, 18kay nisi sleɗan hayan nanawa, sleɗgi haygi nigiyawa kaw. Hay na'ta vargi ŋaa'a kay nisi sa li nana.
19Tapna hay Asiya gigi deɓe. Akuilas hiɗi Priskila hiɗi tapna sa ka hay ziyna visiya gigi deɓ ŋaa ŋolo hay Bum-Sumuna. 20Ɓosiyayn kaf gigi deɓe. Gigi deɓ jar-tuwgiya hiɗi ŋaf-vunda peldetta.
21Gi-deɓta (van) kayni hiɗi ɓan nan Paulus kay tuwanu.
22La sa min Bum-Sumunɗi nam beɗay goyo, (Anatema!) Maranata.#16:22 Maranata min di'e Bum-Sumuna vay ma ma'a.
23Slugota vi Bum-Sumuna vaya Yesu Kristu mus hiɗi nigiya.
24Minda vanu ka kigi kaf hay Yesu Kristu. Amen.
Currently Selected:
1 KORINTENA 16: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001