CAWA'TA TUNITA 15

Lawna deŋ nagat Kanaan mi jafna vi Abram

1Bugol slen kayni, Ma-Vatɗina vul tuwam kir Abram, nam ka di yoboyn talam ala: Naŋ ma li narɗi Abram, kay nan ka hiɗi naŋu, nanu mi bogorayna vaŋu, wurakŋa vaŋ ma li ŋolo. 2Abram hotom dit ala: Bum-Sumun Ma-Vatɗina, naŋ ma vulanti ɗawn meloge, nan mit ɗawn bay gooro, yaw vocota van ɗawn kaw mi Eliyezer ma Damasna. 3Abram di'e: naŋ may vulan jafɗi, yaw vocota van ɗawn mi sa ma vo hay daŋŋa van ɦawa. 4Bugolda Ma-Vatɗin di yoboyn talam lo ala: May yaw vocota vaŋ ɗawn mi namɗi, sa ma yaw vocota vaŋŋa ma vuɗum ɗawn mi naŋ kay tuwaŋu. 5Ma-Vatɗin tuɗum goy jiya, ka dum ala: Ɗuwaŋ iraŋ kulo dukalawn tige, mislekŋa kayn naŋ asay kay ŋaɓam su? Nan daŋu: Jafna vaŋ kaw ma li ɗawn ŋol ki mislek kay kulon nala. 6Abram tun vida valam kay Ma-Vatɗina. Ma-Vatɗina ŋaɓ ɗigerta kalamu.

7Ma-Vatɗin hot dum lo: nanu mi Ma-Vatɗina ma vaŋay goy hay Ur hay nagat Kaldee pa, kay nan min vulaŋ nagat tani.

8Abram hotom dita: Bum-Sumuna Ma-Vatɗina, nan ma wi ala nagat tani ma muɗ goy vanu ɗawn hiɗi mige? 9Ma-Vatɗin hot dumu: naŋ ma vi putta-gunayta ta busata va' ɦidi, ɦu-meeta ta busata va' ɦidi, ɦu-gamalana ma busata valam ɦidina, gukgulina kepe hiɗi goor-gukka kepe may. 10Abram yaw sle namna, kaam iram goy ma' ma', nam lakam goy vok tuwam ca-ca', may layayna nam min kaam iram goyɗi. 11Layayn ma ti sliwna cuki gaa'a kay ti sliw namna; Abram digiɗim goyo. 12Hay li ma fatta ɗigawa, senda-ŋolda vi Abram, narta hiɗi jufunda ŋolda co kalamu.

13Ma-Vatɗin di tam Abram: Naŋ ma wi ala gurona vaŋ sa bugolaŋŋa ma kal goy gorvo'o hay nagata ta may visiɗi, sumun ma lisi gorvo ŋolo, sumun ma curoɗsi ŋolo ta-ta ir busat kis-fiɗi. 14May nan ma ka kitata kay jaf sum sa lisi gorvona, bugolda nisi ma kalay goyo hiɗi farayn hay ɓisi ŋolo. 15Naŋ ma hot gaa tam sumiyaŋu hiɗi sle'ta, nisi paŋ ɗawn naŋ muɗi maar muɗu'. 16Jafna vaŋ ma bugolaŋ sem fiɗin ma hotay tani, kay jiw-zlata vi sum sa Amoriyana ya' bay dab tuwa.

17Hay li ma fatta ɗigawa gaa'a, jufunda li ŋolo; ɗuw na kayni, kuta ŋolda mok nuku, hiɗi sin-kuta kaw, nam jik jar muuriyan ma kaay goyna. 18Hay liy namna Ma-Vatɗin jun bonot hiɗi Abram, nam di'e: Nagat waŋŋi nan min vula' mi jafna vaŋ sa bugolaŋŋa, fokis hay niy-lumna Egipte pa ta-ta tam niy-lumna ma ŋolla ma yum Eufrata. 19Kayni ti nagata vi sum sa Keniyena hiɗi sum sa Keniziyena, hiɗi sum sa Kadmoniyena. 20Hiɗi sum sa Hetiyena, sa Peresiyena, sa Refayimna kaw, 21sa Amoriyana, sa Kanaaniyana, sa Girgasiyena hiɗi sa Yebusiyena.

Currently Selected:

CAWA'TA TUNITA 15: Massana

Highlight

Copy