يُوحَنَّا 4

الْفَصْلْ الرَّابْعْ

يَسُوعْ وْالْمْرَاة السَّامِرِيَّة

1وْمْلِّي عْرَفْ الرَّبّْ يَسُوعْ بْلِّي الْفْرِّيسِيِّينْ سْمْعُو بْلِّي التّْلَامْدْ كَيْجِيوْ لْعَنْدُه وْكَيْعَمّْدْهُمْ كْتَرْ مْنْ يُوحَنَّا، 2وَاخَّا مَاشِي يَسُوعْ بْرَاسُه هُوَ اللِّي كَانْ كَيْعَمّْدْ وَلَكِنْ التّْلَامْدْ دْيَالُه، 3خْلَّا بْلَادْ الْيَهُودِيَّة وْرْجَعْ تَانِي لْلْجَلِيلْ. 4وْكَانْ خَاصُّه يْدُوزْ مْنْ السَّامِرَة. 5وْهُوَ يْوْصَلْ لْوَاحْدْ الْمْدِينَة فْالسَّامِرَة سْمِيتْهَا سُوخَارْ، قْرِيبَة لْلْفْدَّانْ اللِّي كَانْ عْطَاهْ يَعْقُوبْ لْوَلْدُه يُوسْفْ.#يشوع 24‏:32 6وْكَانْ تْمَّ الْبِيرْ دْيَالْ يَعْقُوبْ. وْحِيتْ كَانْ يَسُوعْ عْيَّانْ بْالسّْفَرْ، ݣْلَسْ فْجَنْبْ الْبِيرْ، وْكَانْتْ السَّاعَة جْوَايْهْ الطّْنَاشْ.

7وْجَاتْ وَاحْدْ الْمْرَاة مْنْ السَّامِرَة بَاشْ تْسْݣِي الْمَا، وْݣَالْ لِيهَا يَسُوعْ: «عْطِينِي نْشْرَبْ». 8وْكَانُو تْلَامْدُه مْشَاوْ لْلْمْدِينَة بَاشْ يْشْرِيوْ الْمَاكْلَة. 9وْهِيَ تْݣُولْ لِيهْ الْمْرَاة السَّامِرِيَّة: «نْتَ يْهُودِي وْأَنَا سَامِرِيَّة، إِيوَا كِيفَاشْ كَتْطْلَبْ مْنِّي نْعْطِيكْ تْشْرَبْ؟». حِيتْ لِيهُودْ مَا كَيْتّْعَامْلُوشْ مْعَ السَّامِرِيِّينْ. 10وْجَاوْبْهَا يَسُوعْ وْݣَالْ لِيهَا: «كُونْ عْرَفْتِي آشْ كَيْعْطِي اللَّهْ، وْشْكُونْ هُوَ اللِّي كَيْݣُولْ لِيكْ عْطِينِي نْشْرَبْ، كُونْ رَاكِ نْتِ اللِّي طْلَبْتِي مْنُّه وْعْطَاكْ الْمَا دْيَالْ الْحَيَاةْ». 11وْݣَالْتْ لِيهْ الْمْرَاة: «آ سِيدِي، نْتَ مَا عَنْدْكْ دْلُو، وْالْبِيرْ غَارْقْ، إِيوَا مْنِينْ جَاكْ الْمَا دْيَالْ الْحَيَاةْ؟ 12وَاشْ نْتَ حْسَنْ مْنْ جْدّْنَا يَعْقُوبْ اللِّي عْطَانَا الْبِيرْ، وْهُوَ بْرَاسُه شْرَبْ مْنُّه وْشْرْبُو مْنُّه وْلَادُه وْالْبْهَايْمْ دْيَالُه؟». 13وْجَاوْبْهَا يَسُوعْ وْݣَالْ لِيهَا: «ݣَاعْ اللِّي كَيْشْرَبْ مْنْ هَادْ الْمَا، غَادِي يْعَاوْدْ يْعْطَشْ. 14وَلَكِنْ اللِّي غَيْشْرَبْ مْنْ الْمَا اللِّي غَنْعْطِيهْ لِيهْ أَنَا، رَاهْ عَمّْرُه مَا غَادِي يْعْطَشْ، وْالْمَا اللِّي غَنْعْطِيهْ لِيهْ غَادِي يْوَلِّي فِيهْ عِينْ كَتْفِيضْ بْالْمَا دْ الْحَيَاةْ الدَّايْمَة». 15وْݣَالْتْ لِيهْ الْمْرَاة: «آ سِيدِي، عْطِينِي هَادْ الْمَا بَاشْ مَا نْعَاوْدْشْ نْعْطَشْ وْلَا نْجِي لّْهْنَا بَاشْ نْسْݣِي!». 16وْݣَالْ لِيهَا يَسُوعْ: «سِيرِي وْعَيّْطِي عْلَى رَاجْلْكْ وْرْجْعِي لّْهْنَا». 17وْجَاوْبَاتْ الْمْرَاة وْݣَالْتْ لِيهْ: «مَا عَنْدِي رَاجْلْ». وْرَدّْ عْلِيهَا يَسُوعْ: «عَنْدْكْ الْحَقّْ مْلِّي ݣْلْتِي مَا عَنْدِي رَاجْلْ، 18عْلَاحْقَّاشْ كَانُو عَنْدْكْ خَمْسَة دْ الرّْجَالْ، وْالرَّاجْلْ اللِّي كَيْعِيشْ مْعَاكْ دَابَا مَاشِي رَاجْلْكْ، هَادْشِّي اللِّي ݣْلْتِي رَاهْ صْحِيحْ». 19وْهِيَ تْݣُولْ لِيهْ الْمْرَاة: «كَيْبَانْ لِيَّ آ سِيدِي بْلِّي نْتَ نْبِي! 20جْدُودْنَا عْبْدُو اللَّهْ فْهَادْ الجّْبَلْ، وْنْتُمَ كَتْݣُولُو بْلِّي أُورْشَلِيمْ هِيَ الْمُوضْعْ اللِّي خَاصّْ يْتّْعْبَدْ فِيهْ اللَّهْ». 21وْݣَالْ لِيهَا يَسُوعْ: «تِيّْقِينِي آ الْمْرَاة، رَاهْ غَادِي يْجِي وَاحْدْ الْوَقْتْ اللِّي فِيهْ مَا غَادِيشْ تْعَبْدُو الْآبْ لَا فْهَادْ الجّْبَلْ وَلَا فْأُورْشَلِيمْ. 22نْتُمَ كَتْعَبْدُو اللِّي مَا كَتْعَرْفُوهْشْ، أَمَّا حْنَا رَاهْ كَنْعَبْدُو اللِّي كَنْعَرْفُوهْ، حِيتْ النّْجَا غَيْجِي مْنْ لِيهُودْ. 23وْغَيْجِي وَاحْدْ الْوَقْتْ، وْرَاهْ جَا دَابَا، فِينْ اللِّي كَيْعَبْدُو عْلَى حَقّْ غَيْعَبْدُو الْآبْ بْالرُّوحْ وْالْحَقّْ، عْلَاحْقَّاشْ الْآبْ كَيْقَلّْبْ عْلَى بْحَالْ هَادُو اللِّي كَيْعَبْدُوهْ. 24اللَّهْ رُوحْ، وْاللِّي كَيْعَبْدُوهْ خَاصّْهُمْ يْعَبْدُوهْ بْالرُّوحْ وْالْحَقّْ». 25وْݣَالْتْ لِيهْ الْمْرَاة: «أَنَا كَنْعْرَفْ بْلِّي الْمَسِيَّا -اللِّي هُوَ الْمَسِيحْ- غَادِي يْجِي. وْمْلِّي غَادِي يْجِي غَيْفَسّْرْ لِينَا كُلّْشِي». 26وْݣَالْ لِيهَا يَسُوعْ: «رَاهْ هُوَ أَنَا اللِّي كَنْتّْكَلّْمْ مْعَاكْ».

27وْدِيكْ السَّاعَة رْجْعُو تْلَامْدُه، وْتّْعَجّْبُو مْلِّي لْقَاوْهْ كَيْهْضَرْ مْعَ مْرَاة. وَلَكِنْ حْتَّى وَاحْدْ مَا سْوّْلُه: «أَشْنُو بْغِيتِي؟»، وْلَا «عْلَاشْ كَتْهْضَرْ مْعَاهَا؟». 28وْخْلَّاتْ الْمْرَاة الْݣْلَّة دْيَالْهَا وْمْشَاتْ لْلْمْدِينَة، وْݣَالْتْ لْلنَّاسْ: 29«أَجِيوْ تْشُوفُو وَاحْدْ الرَّاجْلْ ݣَالْ لِيَّ ݣَاعْ دَاكْشِّي اللِّي دْرْتْ. وَاشْ يْمْكَنْ يْكُونْ هَادَا هُوَ الْمَسِيحْ؟». 30وْخَرْجُو النَّاسْ مْنْ الْمْدِينَة وْجَاوْ لْعَنْدْ يَسُوعْ.

31وْفْنَفْسْ الْوَقْتْ، كَانُو التّْلَامْدْ كَيْطْلْبُو يَسُوعْ وْكَيْݣُولُو لِيهْ: «آ الْمُعَلِّمْ، كُولْ!». 32وَلَكِنْ هُوَ رَدّْ عْلِيهُمْ: «عَنْدِي مَاكْلَة كَنَاكُلْهَا مَا كَتْعَرْفُوهَاشْ نْتُمَ». 33وْبْدَاوْ التّْلَامْدْ كَيْݣُولُو لْبَعْضِيَّاتْهُمْ: «وَاشْ جَابْ لِيهْ شِي وَاحْدْ مَا يَاكُلْ؟». 34وْݣَالْ لِيهُمْ يَسُوعْ: «مَاكْلْتِي هِيَ نْدِيرْ مُرَادْ هَادَاكْ اللِّي صِيفْطْنِي، وْنْكَمّْلْ الْخْدْمَة دْيَالْتُه. 35يَاكْ كَتْݣُولُو: مْنْ دَابَا رْبَعْ شْهُورْ غَيْجِي الْحْصَادْ! إِيوَا رَانِي نْݣُولْ لِيكُمْ: هْزُّو عِينِيكُمْ وْشُوفُو الزّْرَعْ فْالْفْدَادْنْ كِيفْ وْلَّى طَايْبْ وْمُوجُودْ لْلْحْصَادْ. 36وْالْحْصَّادْ كَيَاخُدْ الْأُجْرَة وْكَيْجْمَعْ الْغْلَّة لْلْحَيَاةْ الدَّايْمَة، بَاشْ يْفْرَحْ هَادَاكْ اللِّي كَيْزْرَعْ وْهَادَاكْ اللِّي كَيْحْصَدْ. 37وْمَا كْدَبْشْ هَادَاكْ اللِّي ݣَالْ: وَاحْدْ كَيْزْرَعْ وْلَاخُرْ كَيْحْصَدْ. 38رَانِي صِيفْطْتْكُمْ بَاشْ تْحَصْدُو دَاكْشِّي اللِّي مَا ضْرَبْتُوشْ عْلِيهْ تَمَارَة، نَاسْ خْرِينْ ضْرْبُو تَمَارَة وْنْتُمَ كَتْجْنِيوْ الْغْلَّة دْ تَمَارَة دْيَالْهُمْ».

39وْآمْنُو بْيَسُوعْ فْدِيكْ الْمْدِينَة بْزَّافْ دْيَالْ السَّامِرِيِّينْ بْسْبَابْ كْلَامْ الْمْرَاة اللِّي كَانْتْ كَتْشْهَدْ وْكَتْݣُولْ: «ݣَالْ لِيَّ ݣَاعْ دَاكْشِّي اللِّي دْرْتْ». 40وْمْلِّي جَاوْ لْعَنْدُه السَّامِرِيِّينْ، طْلْبُو مْنُّه بَاشْ يْبْقَى مْعَاهُمْ، وْبْقَى تْمَّ يُومَيْنْ. 41وْزَادُو آمْنُو بِيهْ بْزَّافْ دْ النَّاسْ بْسْبَابْ كْلَامُه. 42وْݣَالُو لْلْمْرَاة: «رَاهْ حْنَا مَاشِي غِيرْ بْسْبَابْ كْلَامْكْ كَنْآمْنُو، وَلَكِنْ كَنْآمْنُو حِيتْ حْنَا نِيتْ سْمَعْنَاهْ وْعْرَفْنَا بْلِّي بْالصَّحْ هَادَا هُوَ الْمُنَجِّي دْيَالْ نَاسْ الدّْنْيَا».

يَسُوعْ كَيْشَافِي وَلْدْ الْخْدَّامْ دْيَالْ الْمَلِكْ

43وْمْنْ بَعْدْمَا دَازْتْ يُومَيْنْ، خْرَجْ يَسُوعْ مْنْ تْمَّ وْرْجَعْ لْلْجَلِيلْ. 44حِيتْ يَسُوعْ بْرَاسُه شْهَدْ بْلِّي مَا كَايْنْشْ شِي نْبِي كَيْتّْحْتَرْمْ فْبْلَادُه.#متى 13‏:57؛ مرقس 6‏:4؛ لوقا 4‏:24 45وْمْلِّي وْصَلْ لْلْجَلِيلْ، رَحّْبُو بِيهْ الْجَلِيلِيِّينْ عْلَاحْقَّاشْ مْشَاوْ لْأُورْشَلِيمْ فْيَّامَاتْ عِيدْ الْفِصْحْ، وْشَافُو ݣَاعْ دَاكْشِّي اللِّي دَارْ يَسُوعْ تْمَّ فْيَّامَاتْ الْعِيدْ.#يوحنا 2‏:23

46وْمْنْ بَعْدْ، رْجَعْ يَسُوعْ لْقَانَا اللِّي فْالْجَلِيلْ، فِينْ رَدّْ الْمَا خْمَرْ. وْكَانْ فْكَفْرْنَاحُومْ وَاحْدْ الْخْدَّامْ دْيَالْ الْمَلِكْ وَلْدُه مْرِيضْ.#يوحنا 2‏:1‏-11 47وْمْلِّي سْمَعْ هَادْ الرَّاجْلْ بْلِّي يَسُوعْ جَا مْنْ بْلَادْ الْيَهُودِيَّة لْلْجَلِيلْ، مْشَى لْعَنْدُه وْطَلْبُه يْمْشِي مْعَاهْ بَاشْ يْشَافِي لِيهْ وَلْدُه اللِّي كَانْ قْرِيبْ يْمُوتْ. 48وْݣَالْ لِيهْ يَسُوعْ: «مَا كَتْآمْنُو غِيرْ إِلَا شْفْتُو الْعَلَامَاتْ وْالْعْجَايْبْ». 49وْݣَالْ لِيهْ الْخْدَّامْ دْيَالْ الْمَلِكْ: «آ سِيدِي، أَجِي مْعَايَ قْبَلْ مَا يْمُوتْ وْلْدِي». 50وْرَدّْ عْلِيهْ يَسُوعْ وْݣَالْ: «سِيرْ، رَاهْ وَلْدْكْ حَيّْ!». وْآمْنْ الرَّاجْلْ بْالْكْلَامْ اللِّي ݣَالْ لِيهْ يَسُوعْ، وْمْشَى. 51وْمْلِّي كَانْ الرَّاجْلْ غَادِي فْطْرِيقُه لْلدَّارْ، تّْلْقَّاوْ لِيهْ الْعْبِيدْ دْيَالُه وْݣَالُو لِيهْ بْلِّي وَلْدُه حَيّْ. 52وْهُوَ يْسْوّْلْهُمْ فَاشْ مْنْ وَقْتْ بْرَا وَلْدُه. وْجَاوْبُوهْ: «الْبَارْحْ مْعَ الْوَحْدَة دْيَالْ النّْهَارْ تّْحَيّْدَاتْ مْنُّه السّْخَانَة». 53وْعْرَفْ الْبُو بْلِّي هَادِيكْ هِيَ السَّاعَة اللِّي ݣَالْ لِيهْ فِيهَا يَسُوعْ: «رَاهْ وَلْدْكْ حَيّْ». وْآمْنْ هُوَ وْعَائِلْتُه كُلّْهَا. 54وْكَانْتْ هَادِي هِيَ الْعَلَامَة التَّانْيَة اللِّي دَارْهَا يَسُوعْ مْلِّي رْجَعْ مْنْ بْلَادْ الْيَهُودِيَّة لْلْجَلِيلْ.

Currently Selected:

يُوحَنَّا 4: MSTD

Highlight

Copy