لُوقَا 15
15
الْفَصْلْ خْمْسْطَاشْ
الْمْتَالْ دْ الْخْرُوفْ الْمُّوضّْرْ
1وْكَانُو ݣَاعْ مَّالِينْ الضَّرِيبَة وْالْمُدْنِبِينْ كَيْقَرّْبُو لْيَسُوعْ بَاشْ يْسَمْعُوهْ.#لوقا 5:29،30 2وْبْدَاوْ الْفْرِّيسِيِّينْ وْالْعُلَمَا دْ الشّْرَعْ كَيْتّْشْكَّاوْ مْنْ يَسُوعْ وْكَيْݣُولُو: «هَادْ الرَّاجْلْ كَيْرَحّْبْ بْالْمُدْنِبِينْ وْكَيَاكُلْ مْعَاهُمْ!». 3وْهُوَ يْرَدّْ عْلِيهُمْ بْهَادْ الْمْتَالْ وْݣَالْ: 4«إِلَا شِي وَاحْدْ مْنّْكُمْ عَنْدُه مْيَةْ خْرُوفْ وْتّْوَضّْرْ لِيهْ وَاحْدْ مْنّْهُمْ، وَاشْ مَا غَيْخَلِّيشْ التّْسْعُودْ وْتْسْعِينْ فْالْخْلَا وْيْمْشِي يْقَلّْبْ عْلَى الْخْرُوفْ الْمُّوضّْرْ حْتَّى يْلْقَاهْ؟ 5وْمْلِّي يْلْقَاهْ، يْهَزُّه عْلَى كْتَافُه وْهُوَ فْرْحَانْ، 6وْمْلِّي يْرْجَعْ لْلدَّارْ، يْعْرَضْ عْلَى صْحَابُه وْجِيرَانُه وْيْݣُولْ لِيهُمْ: فْرْحُو مْعَايَ، عْلَاحْقَّاشْ لْقِيتْ الْخْرُوفْ دْيَالِي اللِّي كَانْ مُّوضّْرْ لِيَّ! 7نْݣُولْ لِيكُمْ: رَاهْ هَكَّا غَتْكُونْ الْفَرْحَة فْالسّْمَا بْمُدْنِبْ وَاحْدْ كَيْتُوبْ، كْتَرْ مْنْ الْفَرْحَة بْتْسْعُودْ وْتْسْعِينْ وَاحْدْ مْتَّاقِينْ اللَّهْ مَا مْحْتَاجِينْشْ لْلتُّوبَة».
الْمْتَالْ دْيَالْ الدّْرْهَمْ الْمُّوضّْرْ
8«وْإِلَا شِي مْرَاة كَانُو عَنْدْهَا عَشْرَة دْ الدّْرَاهْمْ، وْتّْوَضّْرْ لِيهَا دْرْهَمْ وَاحْدْ، وَاشْ مَا غَتْشْعَلْشْ الْقْنْدِيلْ وْتْشَطّْبْ الدَّارْ وْتْقَلّْبْ مْزْيَانْ حْتَّى تْلْقَاهْ؟ 9وْمْلِّي تْلْقَاهْ، تْعَيّْطْ عْلَى صْحَابَاتْهَا وْجَارَاتْهَا وْتْݣُولْ لِيهُمْ: فْرْحُو مْعَايَ عْلَاحْقَّاشْ لْقِيتْ الدّْرْهَمْ اللِّي وْضّْرْتْ. 10نْݣُولْ لِيكُمْ: رَاهْ هَكَّا كَيْفَرْحُو الْمَلَايْكَة دْ اللَّهْ بْمُدْنِبْ وَاحْدْ كَيْتُوبْ».
الْمْتَالْ دْ الْوَلْدْ الْعَاصِي
11وْݣَالْ لِيهُمْ عَاوْتَانِي: «هَادَا وَاحْدْ الرَّاجْلْ كَانُو عَنْدُه جُوجْ وْلَادْ، 12وْݣَالْ الصّْغِيرْ فِيهُمْ لْبَّاهْ: آ بَّا، عْطِينِي حَقِّي مْنْ الْوَرْتْ. وْهُوَ يْقْسَمْ عْلِيهُمْ دَاكْشِّي اللِّي كَانْ كَيْمْلَكْ. 13وْمْنْ بَعْدْ شِي يَّامَاتْ قْلَالْ، جْمَعْ الْوَلْدْ الصّْغِيرْ ݣَاعْ دَاكْشِّي اللِّي جَاهْ فْحَقُّه، وْسَافْرْ لْوَاحْدْ الْبْلَادْ بْعِيدَة، وْتْمَّ ضَيّْعْ فْلُوسُه فْوَاحْدْ الْعِيشَة دْيَالْ الْفْسَادْ. 14وْمْلِّي خْسَرْ كُلّْشِي، جَا وَاحْدْ الجُّوعْ صْعِيبْ فْدِيكْ الْبْلَادْ، وْمَا بْقَى عَنْدُه بَاشْ يْعِيشْ. 15وْمْشَى يْخْدَمْ عَنْدْ وَاحْدْ الرَّاجْلْ مْنْ دِيكْ الْبْلَادْ، وْهُوَ يْصِيفْطُه لْلْفْدَادْنْ دْيَالُه بَاشْ يْسْرَحْ الْحْلَالْفْ. 16وْكَانْ كَيْتّْمَنَّى يْشْبَعْ وَاخَّا غِيرْ مْنْ الْخَرُّوبْ اللِّي كَيَاكْلُوهْ الْحْلَالْفْ، وَلَكِنْ حْتَّى حَدّْ مَا عْطَاهْ لِيهْ. 17وْمْلِّي شَافْ حَالْتُه كِيفَاشْ وْلَّاتْ ݣَالْ مْعَ رَاسُه: شْحَالْ مْنْ خْدَّامْ عَنْدْ بَّا كَتْشِيطْ عْلِيهْ الْمَاكْلَة، وْأَنَا هْنَا كَنْمُوتْ بْالجُّوعْ. 18غَنُّوضْ نْمْشِي عَنْدْ بَّا وْنْݣُولْ لِيهْ: آ بَّا، رَانِي دْنَبْتْ فْحَقّْ اللَّهْ وْفْحَقّْكْ، 19وْمَا بْقِيتْشْ كَنْسْتَاهْلْ نْتّْسَمَّى وَلْدْكْ، حْسْبْنِي بْحَالْ وَاحْدْ مْنْ الْخْدَّامَا دْيَاوْلْكْ. 20وْنَاضْ رْجَعْ عَنْدْ بَّاهْ. وْمْلِّي كَانْ مَازَالْ بْعِيدْ، شَافُه بَّاهْ وْحَنّْ عْلِيهْ وْجْرَّى لْعَنْدُه وْعَنّْقُه وْبَاسُه. 21وْݣَالْ لِيهْ الْوَلْدْ: آ بَّا، رَانِي دْنَبْتْ فْحَقّْ اللَّهْ وْفْحَقّْكْ، وْمَا بْقِيتْشْ كَنْسْتَاهْلْ نْتّْسَمَّى وَلْدْكْ. 22وَلَكِنْ بَّاهْ ݣَالْ لْلْعْبِيدْ دْيَالُه: جِيبُو دْغْيَا اللّْبْسَة الْمْخَيّْرَة وْلَبّْسُوهَا لِيهْ! وْلَبّْسُو لِيهْ الْخَاتْمْ فْصَبْعُه وْالصّْبَّاطْ فْرْجْلِيهْ! 23وْجِيبُو الْعْجَلْ السّْمِينْ وْدْبْحُوهْ! وْيَالَّاهْ نَاكْلُو وْنْفَرْحُو، 24عْلَاحْقَّاشْ وْلْدِي كَانْ مْيّْتْ، وْحْيَا، وْكَانْ مُّوضّْرْ، وْتّْلْقَا. وْهُمَ يْبْدَاوْ الْحَفْلَة دْيَالْهُمْ.
25وْكَانْ وَلْدُه الْكْبِيرْ خْدَّامْ فْالْفْدَّانْ، وْمْلِّي رْجَعْ وْقَرّْبْ لْلدَّارْ، سْمَعْ الْمُوسِيقَى وْالشّْطِيحْ. 26وْعَيّْطْ لْوَاحْدْ الْخْدَّامْ وْسْوّْلُه: آشْ هَادْشِّي اللِّي وَاقْعْ؟ 27وْهُوَ يْجَاوْبُه: خُوكْ رْجَعْ، وْدْبَحْ لِيهْ بَّاكْ الْعْجَلْ السّْمِينْ، عْلَاحْقَّاشْ رْجَعْ لِيهْ بِخِيرْ وْعْلَى خِيرْ. 28وْتّْقَلّْقْ الْوَلْدْ الْكْبِيرْ وْمَا بْغَاشْ يْدْخَلْ. وْخْرَجْ بَّاهْ لْعَنْدُه كَيْرَغْبُه بَاشْ يْدْخَلْ، 29وْݣَالْ لْبَّاهْ: شْحَالْ مْنْ عَامْ وْأَنَا خْدَّامْ عَنْدْكْ وْعَمّْرْنِي مَا عْصِيتْ كْلَامْكْ. وْعَمّْرَكْ مَا عْطِيتِينِي وَاخَّا غِيرْ مْعْزَة بَاشْ نْفْرَحْ مْعَ صْحَابِي. 30وَلَكِنْ مْلِّي رْجَعْ هَادْ وَلْدْكْ، بَعْدْمَا ضَيّْعْ دَاكْشِّي اللِّي كْنْتِ كَتْمْلَكْ عْلَى الْعْيَالَاتْ الْفَاسْدَاتْ، دْبَحْتِي لِيهْ الْعْجَلْ السّْمِينْ! 31وْݣَالْ لِيهْ بَّاهْ: آ وْلْدِي، نْتَ دِيمَا مْعَايَ، وْاللِّي دْيَالِي رَاهْ دْيَالْكْ. 32وَلَكِنْ كَانْ خَاصّْنَا نْفَرْحُو وْنّْشْطُو، عْلَاحْقَّاشْ خُوكْ كَانْ مْيّْتْ وْحْيَا، وْكَانْ مُّوضّْرْ وْتّْلْقَا».
Currently Selected:
لُوقَا 15: MSTD
Highlight
Share
Copy
Want to have your highlights saved across all your devices? Sign up or sign in
© 2012 دار الكتاب المقدس بالمغرب. جميع الحقوق محفوظة
© 2012 Morocco Bible Society. All rights reserved
