Lc 12

Taq' Jesus xnaq'tzb'il tib'aju' xmletz'il

(Mt 10.26-27)

1Nimtzun txqan xjal b'aj kb'u'yi'n kyib', inxi'xtoq kylmu'nkyib'. Aq'wi Jesus yolil, nejtl xitma'n kye t-xnaq'tzb'en kjalu: B'a'nqe'xe' teju' ttx'amal kyu'n parisey, aju' kxmletz'il. 2Qu'n mixti' jun ti'xti' toj ewaj laywit tz'el yal, ex mixti' jun ti'xti' e'wa'n laywit tz'el tqanil. 3Ikytzu'n tkyaqilju' matxi' kma'ne' toj qlolj, kb'injtzel te q'ijtl; exju' matxikyma'ne' toj ewaj ex tujaxi', kb'injtzel kyu'n kkyaqil xjal.

Alqe tu'n qxob'a'

(Mt 10.28-31)

4Kxe'l nma'ne' kyeye' wamiw, lalun che xob'e' kyeju' nche kub' b'yonte t-xmilal wnaq, yajxi'tzuntel mixti'tlte tu'n tb'ant kyu'n. 5Atzu' tu'n kyxob'a'kye' teju' ati toklen kyi'je' kykyimlenxi'ye' tzalu twitz tx'otx', tu'n kyxi' q'o'ne' toj q'aq' tu'n. Te tzunte che xob'a'kye'.

6¿Ma myatzun naq kab'e' tal pwaq nche'xa' k'a'yi'n jwe' pich'? Mixpetzunti' nik'tna'l jun ja'lu tu'n Dyos. 7Yajtzunkye', majx pena' ajla'nqe' t-xya'mal kywi'ye' toj junjunali'n tu'n. Qu'mtzun lalun che xob'e': nimkye' kyoklen kyekywitz txqan pich'.

Aye' nkyek'u'n qa okslalqe' te Jesus kyxol xjal

(Mt 10.32-33; 12.32; 10.19-20)

8Kxe'l nma'ne' kyeye', alkye matziyan weye' kywitz xjal, ikxwe' ayine' Tk'wal Dyos, kntziya'ye' kywitz tanjl Dyos; 9Alkyetzunte makub' ewan weye' kywitz xjal, ex kb'el wewa'ne' kywitz tanjl Dyos.

10Kb'el tnajsa'n Dyos til jun xjal qama tma tyol myab'a'n wi'je' ayine' Tk'wal Dyos; atzu'n xjal matz'ok tik'le'n Xewb'aj Xjan kyu'n tyol, lay kub' najsa'n til.

11Ajkyxi' q'i'ne' kyoj ja te k'u'lb'il mujqa kywitz ajkawil ex tzyul kawb'il, lalun che lab'tiye' se'n tu'n kyklonteya' kyib'e' mo titi' kxe'l kyma'ne', 12ajtponju' kmuj tu'n kyoline', kxe'l t-xnaq'tza'n Xewb'aj Xjan kyeye' titi' kxe'l kyma'ne', chi Jesus.

Xob'ajilxju' q'inumal

13Xitma'n jun kxolju' xjal te Jesus:

—Xnaq'tzal, q'manxa te ntzike' tu'n tkub' taq'pu'n qetzb'ile', chij.

14Xitzun ttzaq'we'n Jesus te:

—Wamiw, ¿Alkye sokq'onweye' te ajkawil mo pa'l tx'otx' kyib'aje'? chij.

15Ex xitma'ntl:

—Kyka'yinx kyib'e' te tkyaqil jamjoni'n; qu'n mya tu'nwt ati nim ti'xti' kyeye' che anq'ila'xi'xe'.

16Xi'tzun tma'n jun techlal lu kye: Atitoq jun ichan q'inun, nim twitz tawal matxitoq jaw twitzju' ttx'otx'. 17Kub' t-xima'n q'inun kjalu: ¿Ti'tzu'n knb'incha'ye'? Mixti'tl jatu'n tk'uyeta' twitz wawale' xjaw, chij. 18Ex kub' t-xima'n: Matx kane toj nwitze' titi' knb'incha'ye'. Che jawil nxitu'ne' nk'ujaye' ex che jawil nb'incha'n txqantle' nimaqqe'xi'x, tu'n kyxink'u'ne' twitz wawale' ex tkyaqilju' ati weye' kyoj. 19Knma'tzuntze' wexe': Nim ti'xti' k'u'n te b'a'npun ab'q'i teya wamiw; tz'ojlana, wana, k'wana, tzalajxa toju' tchwinqlala, chij. 20Atzunte Dyos tzaj tma'n te: Mixti' tnab'la, texju' qonik'an ja'lo kkyimela, ¿yajtzu'n k'u'n tu'na, alqe k'ajb'ela'? chij. 21Ikytzun nb'aju' ti'ju' xjal nkub' tb'u'yi'n txqan tq'inumal tex, prowtzunte' twitz Dyos, chi Jesus.

Ka'yi'n qe'kye' Dyos tk'wal tu'n

(Mt 6.25-34)

22Yajxi'tzuntl tma Jesus kye t-xnaq'tzb'en: Qu'mtzun kxe'l nma'ne' kyeye': Lalun b'ajx kyk'u'je' titi' kxe'l kywane' tu'n kyanq'ine', mo titi' k'okyel kyq'o'ne' kutxb'ilkyeye'. 23Nimxi'xte' toklen kychwinqlale' kyetwitz kywaye', ex nimxi'x toklen kyxmilale' kyetwitz kyxb'alune'. 24Ka'nqe'xpe' joj: min nche awan ex min nche chmon twitz kyawal, ex mixti' kyk'uja; q'o'ntzun kywa tu'n Dyos. ¡Nimxi'x pena'kye' kyoklen kyekywitzju' pich'! 25Tu'npetzu'n inxi'x b'ajx kyk'u'je', ¿ma jakutzun b'a'n tok kytz'aqtza'n jun q'ijtle' kychwinqlale' twitz tx'otx' ti'ju' ntzaj tq'o'n Dyos? 26Qa laype' b'entju' ch'i'nxi'x toklen, ¿tiqu'ntzun inxi'x b'ajx kyk'u'je' ti'ju' txqantl ti'xti'?

27Kyximankupe'ye' se'n nche ch'iya' b'ech toj k'ul: min nche aq'unan ex min nche chqon. Atzunte Salomon, tu'npetzu'n tb'anilqexi'xju' ti'j, mixpeti' ok jun t-xb'alun se'nqe' b'ech lu. 28Qana' nche tktxu'n te Dyos b'o'schaq k'ul, ati ja'lo toj kojb'il ex najchi'j b'aj tz'e'y toj chuj, ¡Okpe'na' che ktxunjtzelkye' tu'n, aye'ye' xjal naq ch'i'n kyokslab'le'! 29Qu'mtzun lalun che b'isune', inxi'xwit b'ajx kyk'u'je' titi' kxe'l kywane' mo titi' kxe'l kyk'wa'ne'. 30Qu'n kykyaqil txqantl xjal atzu' nb'ajxa' kyk'u'j ti'j tkyaqilju' ti'xti' lu, aye'tzunkye' ati jun Kymane' tojtzqi'n qa nche ojqelan ja'lu kyeye'. 31Kyq'onk tilile' tu'n kyanq'inteye' tkawb'il Dyos, ex che tzajel tq'o'n Dyos ti'xti' lu nojqelan kyeye', chi Jesus.

Q'inumal toj kya'j

(Mt 6.19-21)

32Lalun che xob'e' tal nrit; naqjte'x kyb'aje', atzunte Dyos Manb'aj, b'a'n sela' toj twitz tu'n txitq'o'n kawb'il kyeye'. 33Kyk'ayinxju'ye' ati kyeye', ex kyq'onxe' kye prow; kyq'onk tilile' tkb'el kyq'inumale' aju' lay b'aj, aju' kyq'inumale' te toj kya'j mib'ajela', ja lay tz'exa' tu'n eleq' ex lay b'aj tu'n pok'. 34Majx atzu' toka'kye' kyk'u'j jata' kyq'inumale', chi Jesus.

Naq b'antnitl kytene'

35-36Che okxe' se'nqe' majin nche ayon te kyajaw tu'n tanjtzti'j tojun ninwan ti'j mjeb'le'n, b'antnitl kyten ex q'i'n kykantil nche k'ant, naq nche ayontl tu'n tokx kyjqo'n ja naqa sokx tk'ojcha'n ajtul. 37Tzalajb'ilte' kyeju' majin min nche wtan ajtulju' kyajaw. Axxi'x kxe'l nma'ne' kyeye', aku'pe' kyajaw kb'el q'uqb'ankye ti'j mes ex kxe'l tq'o'n kywa. 38Tzalajb'ilxi'x kyi'j, qa itz'qe' ajtul, maskye matzul tk'u'j aq'b'il mujqa nqo sqix. 39Kyximankupe'ye' lu: naqwit b'i'n tu'n jun xjal alkye kmuj tzulju' eleq' toj tja, jaku' lay taj tu'n tokx juntl xjal alq'al toju' tja. 40Ikxtzunkyeju'ye' che okxe' b'incha'n kytene'; qu'n naqx minab'en ajwule' ayine' Tk'wal Dyos, chi Jesus.

Aju' majin b'a'n b'in exju' mib'a'n b'in

(Mt 24.45-51)

41Xitqani'n Luch te Jesus:

—Taye, ¿Ma o'kxtzu' xtmaya'ya techlal lu qeye' mujqa te kykyaqil? chij.

42Xi'tzun tma'n Qajaw: ¿Alkye jun nuk'ul b'a'n b'in, nche kyej tq'o'n tajaw toj tja toj tq'ob', tu'n txitq'o'n kywa tojxju' kmuj nojqelan? 43Tzalajb'ilxi'x teju' majin, inche tb'incha'n taq'un ajtulju' tajaw. 44Axxi'x kxe'l nma'ne' kyeye', k'okyel q'o'n majin lu tu'n tajaw ka'yilte tkyaqilju' ati te. 45Qatzun makub' t-xima'n majin lu qa yaj tzulju' tajaw, ex matz'okten b'yolkyeju' txqantl majin ichan ex qya, qama tz'okten wal ex k'wal, ex matz'okten tx'ojtel, 46naq minab'en ajtulju' tajaw toju' q'ij min xima'n tu'n ex toju' kmuj min b'i'n tu'n, ex kb'el tz'e'ysa'n twitz, k'okyel q'o'n se'nqe'xju' mib'a'n che niman.

47Aju' majin b'i'n tu'n titi' tajb'ilju' tajaw tu'n tb'inchante, ex mya b'incha'n tten ex minb'in te, kb'el tz'e'ysa'n twitz kuwxi'x. 48Atzu'n majin min b'i'n tu'n alkye tajb'il tajaw, ntb'incha'n ti'xti' myab'a'n, ktz'e'ysetel twitz myaxi'x kuw. Alkye nim nxiq'et te, k'okyel toj xjel tib'aj nim; ex alkye nim xiq'o'n toj tq'ob', nimxi'x k'okyela' toj xjel tib'aj.

Tu'n tpaj Jesus ntzaj pa'jtib'il kyxol xjal

(Mt 10.34-36)

49Ma chinule' txqol q'aq' kyxol xjal; ex ¡wajb'ile' naqwit nk'anttel! 50Ilti'j tu'n wik'e' tojun k'ixk'oj, ex ¡inxi'x chin yajtiye' tzmax ajtjapun! 51¿Ma ma chinule' q'ol nak'b'il twitz tx'otx' toj kywitze'? Minti', pa'jtib'il ẍinule' q'olte. 52Qu'n kxe'l qex ja'lo, jwe' xjal tojun ja tzul pa'jtib'il kyxol, oxe' ajq'oj kyi'j kab'e' ex kab'e' ajq'oj kyi'j oxe'. 53Kq'ojil manb'aj ti'j tk'wal ex kq'ojil k'walb'aj ti'j tman; kq'ojil txub'aj ti'j tal qya, ex kq'ojil a'lb'aj qya ti'j ttxu; kq'ojil lib'un qya ti'j tlib' ex kq'ojil lib'j ti'j tlib' qya, chi Jesus.

Techlal tab'q'iyil

(Mt 16.1-4; Mc 8.11-13)

54Ex xitma'n Jesus kye xjal kjalu: Ajkyka'yinteye' ajtjaw muj toj tkub'exq'ij, nkyma'ne' qa tzul jb'al, ex iky nb'ajiju'. 55Ex ajttzaj kyq'iq' toj tnayajkya'j, nkyma'ne' qa tzul kyaq, ex iknb'ajiju'. 56¡Xmletz'qe'ye'! Qa nelkynik'e' ti'j se'n tka'yinx twitz kya'j ex twitz tx'otx', ¿tiqu'ntzun min nel kynik'e' tiju' tq'ijlalil ja'lo? chij.

B'incham ttena tuk'i'l tajq'oja

(Mt 5.25-26)

57¿Tiqu'ntzun min nkub' kyxima'ne' kyib'xkyib'e' alkyeju' tnik'alilti'j? 58Qama b'ajsanjtza tu'n jun xjal ex matxi'ya tuk'i'l twitz tzyul kawb'il, yolina tuk'i'l tu'n kynk'unte kyib'e' nej, tu'ntzun lalun ponq'i'na tu'n twitz ajkawil; qatzun min, kxe'l q'o'na toj kyq'ob' xq'uqil kars tu'n ajkawil, k'okyex q'o'ntzuntza toj kars. 59Kxe'l nma'ne' teya, laytzun tz'etztza tzmaxi'j ajtchjonteya tkyaqilju' maqaninjz teya, chi Jesus.

Currently Selected:

Lc 12: MAMO

Highlight

Copy