Lc 16

Techlal ti'ju' myab'a'n nuk'ul

1Ex xitma'n Jesus ja'lu kye t-xnaq'tzb'en: Atitoq jun ichan q'inun atitoq jun tnuk'ul; pon q'unb'aj te qa naqtokju' tnuk'ul najsalteju' ati te. 2Txoklitzun tu'n tajaw ex xitma'n te: ¿Se'n taq'witzunju' ntzaj q'ma'n weye' ti'ja? Q'ontza jun tqanil ti'ju' npwaqe' ex ti'xti' weye', qu'n lay tentla te nnuk'ule', chij. 3Kub' tenju' nuk'ul ximal: ¿Titi' knb'incha'ye' ja'lo mixti'tl waq'une' tu'n wajawe'? Lay wipaye' tu'n waq'unanteye' tx'otx' ex ch'ixb'ilx tu'n nqanin nkotze'. 4Matxi' tzul toj nnab'le' titi' knb'incha'ye', tu'ntzun ati alkye kk'molweye' toj tja ajnkyaje' mixti' waq'une', chij. 5Eb'ajtxko'n xjal ati kyk'as te tajaw toj junjunali'n. Xitqani'n teju' pon nejtl: ¿Jte' tch'exa te wajawe'? chij. 6Xittzaq'we'n te: jo'naq b'aril aseyt nch'exe' te, chij. Xitma'n nuk'ul te: Lu u'j jatz'ib'ana' tch'exa, qeku'ya ex tz'ib'anku'ya juntl naq te kab'naqlajoj, chij. 7Xitqani'ntzuntz te juntel: ¿Yajtzunta jte' tch'exa te wajawe'?, chij. Xittzaq'we'n xjal te: Jo'naq mlon triy we' nch'ex te, chij. Ex xitma'n te: Lu u'j jatz'ib'ana' tch'exa; tz'ib'anku' juntla naq te kyajnaq mlon, chij. 8Eltnik'ju' tajaw ti'ju' myab'a'n nuk'ul qa lwiyxi'x nximet tu'n se'n nche tb'incha'na' ti'xti'. Lwiyxi'xna' nximette' kyu'n xjal mya okslal toj kyaq'un titi' kxe'l kb'incha'n kyekwitzju' te' spik'unqe'.

9Kxe'l nma'ne' kyeye' nxnaq'tzb'en, tz'ajb'enju' q'inumal twitz tx'otx' kyu'ne' tu'n kknet kamiwe', tu'ntzun ajtkub'aju' q'inumal twitz tx'otx', ati jun k'molkyeye' toju' najb'il tejumajx.

10Alkye tnik'alti'j taq'un tib'aj ch'i'n, ex tnik'alti'j taq'un tib'aj nim; ex alkye mya tnik'alti'j tib'aj ch'i'n, layx tz'aq'unan toj tnik'alti'j tib'aj nim. 11Qu'mtzun qa mya tnik'alkyi'je' tuk'i'lju' q'inumal mya q'uqli tk'u'jlalil te twitz tx'otx', ¿alkye kxe'l q'onte q'inumalxi'x toj kyq'ob'e'? 12Qa mya tnik'alkyi'je' tuk'i'lju' mya kyeye', ¿alkye kxe'l q'onteju' kyeye' toj kq'ob'e'?

13Mix-a'lo' jun majin tu'n tb'ant tajb'en te kab'e' tajaw; qu'n junju' ktk'u'jla' atzun juntl k'elel tik'o'n, mujqa k'ajb'el teju' jun atzu'n juntl k'elel tik'o'n. Lay b'ent kyajb'ene' te Dyos ex te q'inumal.

14Kyb'itzun pariseyju' yol lu, eb'aj xmayin ti'j Jesus, qu'n tokxi'xtoq kk'u'j ti'j pwaq. 15Xitma'n Jesus kye: Nok kq'o'n kyib'e' naku'j tnik'alkyi'je' kwitz xjal, extzun tojtzqi'nte Dyos kyanmiye'; qu'n aju' nimxi'x toklen toj kywitz txqan xjal, mixti'xte' toklen toj twitz Dyos.

Tkawb'il Moyses ex tkawb'il Dyos

16Atitoq tkawb'il Moyses ex tqanil kyu'n t-sanjelal Dyos tzmax sul Xwan jawsal a'. Atzun ja'lo tzajx ti'j Xwan, npakb'etju' tpakb'al b'a'n ti'j tkawb'il Dyos, ex kkyaqil xjal noktilil kyu'n tu'n kyokx toj.

17Naqch'i'n toka' tu'n tnaju' kya'j ex tx'otx', atzunte' kawb'il ilxi'xti'j tu'n tjapun, mixti' tu'n tel jun techtz'ib' ti'j, chi Jesus.

Q'on Jesus xnaq'tzb'il ti'ju' ajpaji'n

(Mt 19.1-12; Mc 10.1-12)

18Qama kub' tpa'ntib' jun ichan tuk'i'l t-xu'jil ex mamje tuk'i'l juntl qya, in ok te ajpajil; ex alkye mamje tuk'i'l jun qya kub'ni tpa'ntib' tuk'i'l tchmil, ex in ok te ajpajil.

Techlal ti'ju' q'inun tuk'i'l prow Lasaro

19Atitoq jun ichan q'inun, tb'anil sed toq t-xb'alun ex tkyaqil q'ij nkub' tq'o'n tb'anil nimaqwan. 20Ex atitoq jun prow Lasaro tb'i, nimtoq tx'a'k ti'jile ex intoq kub' qe twitz tx'otx' ttzi tja q'inun. 21Tajb'iltoqju' prow lu tu'n twan ti'ju' tb'uchub' wab'j neltz'aq ti'j tmes q'inun; expe' nche oklq'e tx'yan leq'ulte ttx'a'k. 22Tetzun tkyim Lasaro, xiq'i'n kyu'n anjl tu'n tkub' qe wal tk'etz Ab'raam. Ex kyimju' q'inun, ex ku'x mqu'n.

23Tetzunj intoq yajti q'inun toju' knajb'il kyimni, jaw ka'yin ex til atitoq Ab'raam najchaq, ex q'uqlitoq Lasaro tk'etz. 24Jaw ẍch'intzuntz: ¡Taye Ab'raam, q'aq'antz tk'u'ja wi'je'! Chq'onxa Lasaro tu'n tku'x tak'sa'n twitq'ob' toj a' ex tu'n ttzaj ak'salte twi' waq'e', qu'n inxi'x chin yajtiye' toju' q'aq' lu, chij. 25Atzunte Ab'raam xittzaq'we'n te: Na'ntza nky'ajul, maten ti'xti' teya toju' tchwinqlala, atzunte Lasaro toj yajb'il xtena'. Atzu'n ja'lo maq'uqb'anjtz tk'u'j, atzunta toj yajb'il. 26Expe' ati jun nin xaq qxol kyuk'i'le'; qa kyab'ilju' ate'qe' tzalu tu'n kyik'x na'tz, lay b'ent kyik'x, exqe' ate' na'tz lay b'ent kyik'tz tzala, chi Ab'raam te.

27Xi'tzun tma'n q'inun te Ab'raam: Okna' kxe'l nkub'sa'ne' teya, taye Ab'raam, chq'onx ch'i'na Lasaro q'malte kyeju' toj tja nmane', 28jwe' witz'ine' ate', tu'ntzun kyb'inte, laytzun che ultz toju' yajb'il lu, chij. 29Atzunte Ab'raam xitma'n te: Ate'nakye' tuj Moyses ex kyuj t-sanjelal Dyos kyuk'i'l: ¡che kyb'inku'! chij. 30Xittzaq'we'n q'inun: Taye Ab'raam, laynate' okxju' lu; atzunte' qama jaw anq'in jun kyimni ex makub' tyek'u'ntib' kywitz, k'anjetzti'j kyanmi, chij. 31Atzunte Ab'raam xitma'n te: Qa min xikyb'i'n tuj Moyses ex kyuj t-sanjelal Dyos, ex layx che okslan maskye majaw anq'in jun kyimni, chi Ab'raam, chi Jesus.

Currently Selected:

Lc 16: MAMO

Highlight

Copy