1. Korinta 3
3
Spoolungen enne Jemeent
1Leewe Breeda, ekj kunn to junt nich soo räden aus to jeistliche Menschen, oba soo aus to fleeschelje, aus to onmindje Kjinja en Christus. #Joh 16,12 2Ekj jeef junt Malkj to drinkjen, un nich stoakje Kost. Jie wieren noch nich reed doafäa, un jie kjennen daut uk noch nich vedroagen. #1Pet 2,2 3Jie sent noch fleeschlich, noch too sea no june nosikj Natua. Wan jie noch soo leicht aufjenstich sent un junt zanken, dan meent daut, daut jie noch fleeschlich sent un no june oole Natua läwen. #1Kor 1,10-11; 11,18 4Wäajen wan eena sajcht: Ekj hool daut met Paulus, un een aundra sajcht: Ekj hool daut met Apollos, sent jie dan nich noch fleeschlich? #1Kor 1,12
Aula oabeiden aum selwjen Woakj
5Wäa es Apollos? Un wäa es Paulus? Daut sent Deena, derch dee jie toom Gloowen jekomen sent. Een jiedra von dee beid deed daut, wuatoo Gott am de Jeläajenheit jeef. 6Ekj deed plaunten, Apollos goot Wota, oba Gott muak daut waussen. #Apost 18,24-28 7Doawäajen es nich dee waut, dee doa plaunten deit, uk nich dee, dee doa jeeten deit. Wäa waut es, es Gott, dee daut waussen moakt. 8Tweschen däm, dee doa plaunten deit, un däm, dee doa jeeten deit, es kjeen Unjascheet. Gott woat eenem jiedren doano beloonen, aus hee jeoabeit haft. #1Kor 4,5
9Wie sent Gott siene Metoabeida, un jie sent Gott sien Akawoakj un Gott sien Buwoakj. #Mat 13,3-9; Efs 2,20 10Doano aus Gott mie Jnod jeef, hab ekj dän Grunt jelajcht aus een weisa Bumeista. Een aundra but doabowen wieda. Oba lot eenen jiedren väasechtich sennen, woo hee doabowen but.
11Kjeena kaun eenen aundren Grunt lajen aus dee, dee aul jelajcht es, daut es Jesus Christus. #1Pet 2,4-6 12Opp disen Grunt kaun met Golt, Selwa, diere Steena, Holt, Hei ooda Stroo wieda jebut woaren. 13Oba jiedrem siene Oabeit woat verendach komen. De Jerechtsdach woat daut kloa moaken, waut bliewen woat, wiels dee Dach kjemt met Fia. Derch daut Fia woat sikj wiesen, von woone Sort jiedrem siene Oabeit wia. #1Kor 4,5 14Un wan daut, waut opp däm Grunt jebut es, de Fiaproow bestonen woat, woat deejanja Loon kjrieen. 15Wan oba irjentwäm sien Woakj vebrennen woat, dan woat hee Schoden lieden. Hee selfst oba woat jerat woaren, oba mau jrod soo aus utem Fia jeräten.
16Weet jie nich, daut jie Gott sien Tempel sent un daut Gott sien Jeist en junt wont? #1Kor 6,19; 2Kor 6,16 17Wäa Gott sienen Tempel toschaund moakt, dän moakt Gott uk toschaund. Gott sien Tempel es heilich, un jie sent dee Tempel.
Kjeen Grunt toom Menschen veharlichen
18Kjeena sull sikj selfst waut faulschet väamoaken. Wäa doa meent, daut dise Welt am aus weis hoolen deit, däm lot ieescht toom Noa woaren, daut hee opp iernst weis woaren kaun. #Opb 3,17-18 19Dise Welt äare Weisheit es bie Gott Onsenn. Wiels doa steit jeschräwen: “Bie am ranen de weise sikj en äare Kluakheit faust”. #Hiob 5,13 20Un dan uk: “De Har weet waut de weise denkjen, un daut daut nuscht meent”. #Psa 94,11 21Kjeena sull wäajen Menschen stolt sennen. Junt jehieet je aules. 22Auf daut Paulus ooda Apollos ooda Kefas es, ooda de Welt ooda Läwen ooda Doot, ooda Jäajenwuat ooda Tookunft, aules daut jehieet je junt. 23Un jie jehieren Christus, un Christus jehieet Gott. #1Kor 11,3
Currently Selected:
1. Korinta 3: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.