2. Korinta 6
6
Gott siene Metoabeida
1Aus Gott siene Metoabeida moak wie junt Moot, soo to läwen, daut Gott siene Jnod fa junt nich vejäfs es. #2Kor 1,24 2Hee sajcht:
“Aus de Tiet kjeem, junt jnädich to sennen, hieed ekj junt,
un aus de Dach kjeem, junt to raden, holp ekj junt.” #Jes 49,8; Luk 4,19.21
Horcht emol, dee aunjenäme Tiet es nu. De Dach, junt to raden, es nu hia!
De Apostel em Deenst fa de Bootschoft vonne Veseenunk
3Wie jäwen kjeenem de Jeläajenheit, sikj aun waut en onsem Deenst to steeten, daut doavon nich schlajcht jerät woat. 4Wie bewiesen en aules waut wie doonen, daut wie Gott siene Deena sent. En Trubbel, Noot un Angst bliew wie staunthauft un jeduldich. 5Wie woaren jeschloagen, enjestopt un vefolcht. Wie motten schwoa oabeiden, wie komen weinich toom schlopen un toom äten. #1Kor 4,11-13; 2Kor 11,23-27 6Wie bliewen jeduldich un leeftolich, vestendich un frintlich. Wie bliewen em Heiljen Jeist un sent aundre werkjlich goot. #1Tim 4,12 7En Gott siene Krauft räd wie de Woarheit. Onse Jewäaren sent rajchtsch un linkjsch jerajcht haundlen. #1Kor 2,4; 2Kor 4,2; Efs 6,14-17 8Wie woaren jeieet un uk jespott. Von ons woat goodet un schlajchtet jerät. Wie woaren aus soone, dee lieejen, hanjestalt, un räden doch de Woarheit. 9Wie woaren aus framde behaundelt, un sent doch bekaunt. Wie sent aus soone waut stoawen, un doch läw wie. Wie woaren jeschloagen, oba wie komen nich om. #Psa 118,18; Apost 14,19; 2Kor 4,10-11 10Wie woaren truarich jemoakt, oba sent emma froo. Wie sent oam, un doch woaren väle derch ons rikj. Wie haben nuscht, un doch jehieet ons aules. #Flp 4,12-13
Komt wieda, komt met
11Wie haben to junt Korinta sea frie jerät un ons Hoat fa junt wiet opjemoakt. 12Daut es nich, daut jie en ons weinich Rum haben. Oba jie haben en june Hoaten fa ons nich Rum. 13Ekj räd met junt soo aus ekj met miene Kjinja räden wudd. Doot to mie doch uk soo un moakt june Hoaten wiet op. #1Kor 4,14
14Lot junt nich toopspaunen met soone waut nich jleewen. Wiels waut kaun Jerajchtichkjeit met Ojjerajchtichkjeit to doonen haben? Ooda woo kaun Licht met daut diestre Jemeenschoft haben? #Efs 5,11 15Kaun Christus met Soton stemmen? Waut haben dee waut jleewen toop met dee waut nich jleewen? 16Waut haft Gott sien Tempel met Jetta to doonen? Wie sent doch däm läwendjen Gott sien Tempel, soo aus Gott sajcht:
“Ekj well mank an läwen un waundlen.
Ekj well äa Gott sennen, un see sellen mien Volkj sennen.” #3Mo 26,11-12; Hes 37,27; 1Kor 3,16
17Un wieda: “Velot an un sondat junt auf. Habt nuscht met orreinet to doonen, dan well ekj junt aunnämen. #2Sam 7,14; Jes 52,11; Hes 20,41; Opb 18,4 18Ekj well jun Voda sennen, un jie sellen miene Säns un Dajchta sennen”, sajcht de aulmajchtja Har. #Jes 43,6; Hos 2,1
Currently Selected:
2. Korinta 6: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.