Aposteljeschicht 19
19
Paulus en Efesus. Bejäajnunk met Jinja von Johanes
1Aus Apollos en Korint wia, reisd Paulus derch de Huachlenda un kjeem no Efesus. Doa troff hee waut Jinja, 2un fruach an: Kjrieej jie dän Heiljen Jeist, aus jie toom Gloowen kjeemen? See säden: Nä, wie haben noch niemols jehieet, daut doa een Heilja Jeist es. #Apost 2,38 3Dan säd hee to an: Wuaropp word jie dan jedeept? See säden: Opp Johanes siene Doop. 4Paulus säd: Johanes siene Doop wia een deepen doaropp, daut see omkjieren sullen. Doamet säd hee to de Menschen, daut see aun dän jleewen sullen, dee no am komen wudd, daut es aun Christus Jesus. #Mat 3,11 5Aus see daut hieeden, leeten see sikj en dän Harn Jesus sienen Nomen deepen. 6Un aus Paulus an de Henj oppjelajcht haud, kjeem de Heilja Jeist äwa an, un see räden en Tungen un profezeiden. #Apost 8,17; 10,44.46 7See wieren aules toop 12 Maun.
Paulus bleef äwa twee Joa en Efesus
8Hee jinkj oba en de Judenschool nenn un prädijd dree Moonat frie rut, un lieed un räd drinjent met an vom Gottesrikj. 9Oba aus eenje sikj vehoaden un nich jleewen wullen un ver daut Volkj schlajchtet äwa dän Wajch räden deeden, veleet Paulus an un neem de Jinja met sikj un räd aule Dach to an en Tieranus siene School. #19,9 Eenje oole Schreften sajen uk noch von de fefte bat de tieende Stund, daut es, von Klock alw bat Klock vea. 10Un dit hilt twee Joa aun, soo daut aule, dee en Asien wonden, dän Harn sien Wuat hieeden, beides de Juden un uk de Griechen.
Skeva siene Säns doljenomen, Menschen komen loos von Zaubarie
11Gott deed derch Paulus butajeweenelje Wunda, #Apost 14,3; 2Kor 12,12 12soo daut wan see Schneppeldieekja un Schaldieekja, dee Paulus jebrukt haud, no de kranke brochten, worden dee jesunt, un de beese Jeista veleeten an. #Apost 5,15
13Eenje Juden, dee romjinjen un beese Jeista utdreewen, proowden uk dän Harn Jesus sien Nomen äwa dee to brucken, dee doa beese Jeista hauden, un säden: Wie beschwieren junt bie dän Jesus, dän Paulus prädicht. #Luk 9,49 14Daut wieren dän Huagenpriesta Skeva siene säwen Säns, dee daut deeden. 15De beesa Jeist säd to an: Jesus kjan ekj, un ekj weet wäa Paulus es, oba wäa sent jie? 16Un dee Mensch, en däm de beesa Jeist wia, sprunk opp an nopp un kjrieech an aula unja, soo daut see noaktich un bloodrich utem Hus sikj doavon brochten. 17Aus de Juden un Griechen, dee en Efesus wonden, dit to hieren kjrieejen, äwakjeem an aula eene Forcht, un dän Harn Jesus sien Nomen wort sea huach jehoolen.
18Dan kjeemen uk väle, dee toom Gloowen jekomen wieren, un bekjanden un kjeemen doamet verendach, waut see jedräwen hauden. 19Un väle, dee sikj met Zaubakrauft aufjejäft hauden, brochten äare Zaubabieekja toop un vebrenden dee, wua aulemaun daut seenen kunn, un see räakjenden ut, daut dee 50.000 Selwastekja wieet wieren. 20Opp disen Wajch vespreed daut Wuat sikj wiet, un neem de äwahaunt. #Apost 12,24
De Entschluss to Reisen
21Aus dit aula jeworden wia, neem Paulus sikj em Jeist väa derch Mazedonien un Achaja to gonen un dan no Jerusalem to reisen, un säd: Wan ekj doa ieescht jewast sie, mott ekj uk noch seenen no Room to komen. #Apost 23,11 22Un soo schekjt hee Timotäus un Erastus, twee von siene Deena, en Mazedonien nenn, oba hee selfst bleef noch eene Tietlank en Asien. #2Tim 4,20
De Opprua en Efesus
23Ojjefäa om dee Tiet jeef daut eene groote Oppräajunk äwa dän Wajch. #2Kor 1,8-9 24Een Selwaschmett, Demetrius jenant, muak kjliene, selwane Diana Tempelkjes un brocht dee Hauntoabeida grooten Jewenst en. 25Hee roopt dee toop, un uk dee Oabeida, dee eene änelje Beschaftjunk hauden, un säd: Leewe Mana, jie weeten daut wie derch disen Haundel eene goode Ennom haben. 26Un jie hieren un seenen, daut dis Paulus nich bloos en Efesus, oba meist aulawäajen en Asien, väle Menschen jäajen ons äwarät. Hee sajcht: Menschenhenj kjennen kjeen Gott moaken. 27Dan es nich bloos dis Haundel en Jefoa en de Grunt to gonen, oba daut soogoa de groote Jettin Diana äa Tempel woat veacht woaren, un daut see äa aunseenen velieren woat, dee aulemaun en Asien un de gaunze Welt aunbäden deit. 28Un aus see dit hieeden, räajd sikj en aulem de Wutt, un see schrieejen: Groot es de Efeesa äare Diana! 29Soo wia en dee gaunze Staut een Derchenaunda. Un aus see Gajus un Aristarch von Mazedonien, Paulus siene metreisende, faustjenomen hauden, moarachten see aula tojlikj em Teauta nenn. #Apost 20,4 30Aus Paulus dan ver de Menschen gonen wull, leeten siene Jinja daut nich. 31Uk eenje von de väaschte en Asien, Paulus siene goode Frind, schekjten han un leeten am sajen, daut hee sikj nich sull em Teauta seenen loten. 32Eenje Menschen schrieejen eenalei un de aundre waut aundret. Doa wia soon Wirwoa, daut de mieeschte, waut toopjekomen wieren, nich wisten wuarom see doa wieren. 33Un see trocken Alexanda, dän de Juden väajeschowen hauden, utem Volkj rut. Alexanda vesocht daut Volkj derch siene Hauntbewäajunk steltomoaken, un wull sikj veteidjen. 34Oba aus see enworden daut hee een Jud wia, schrieejen see aula tojlikj twee Stund en eent: Groot es de Efeesa äare Diana! 35Aus de Stautskaunsla daut Volkj ieescht stell haud, säd hee: Jie Mana von Efesus, wua es een Mensch, dee doa nich weet, daut de Staut Efesus de Tempelwajchta fa de groote Jettin Diana es, un uk äwa de Figua, dee vom Himmel foll. #19,35 De oole Schreften sent hia nich kloa to vestonen. 36Un wiels doa nich jäajen to räden es, sull jie stell sennen un nuscht onbedochtet doonen. 37Wiels jie haben dise Menschen häa jebrocht, dee nich Tempelreiba, uk nich Lastra äwa june Jettin sent. 38Wan dan nu Demetrius un de Hauntoabeida, dee opp siene Sied sent, eene Kloag jäajen wäm haben, daut Jerecht es doa, un doa sent uk Rechta; lot an sikj doa unjarenaunda vekloagen. 39Wan jie noch irjentwaut aundret opptobrinjen haben, #19,39 Eenje oole Schreften sajen noch äwa aundre Sachen daut mott dan en eene ordentliche Volkjs Vesaumlunk jeschlicht woaren. 40Wiels wie sent en Jefoa, daut wie wäajen dän vondoagschen Opprua kjennen vekloacht woaren, wiels doa licht kjeene Sach väa, wuamet wie ons fa disen Opprua entschuljen kjennen. Un aus hee dit jesajcht haud, leet hee de Vesaumlunk gonen.
Currently Selected:
Aposteljeschicht 19: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
