Amos 3
3
De Profeet kaun nich stell bliewen
1Nu horcht emol, jie Israeliten,
waut de Har äwa aul de Famieljes sajcht,
dee hee ut Ägipten rutbrocht:
2Hee haft bloos junt jewält
von aule Menschen oppe Ieed;
un doawäajen woat hee junt bestrofen
fa aul june Sinden. #5Mo 4,34
3Gonen twee toop,
wan see sikj nich eenich sent?
4Brelt een Leiw em Woolt,
wan hee nuscht jejräpen haft?
Grolt een Tia en siene Heel,
wan hee nuscht to fräten haft?
5Felt een Voagel en eene Schlenj,
wan am nuscht jejräpen haft?
Klaupt eene Faul too,
wan doa nuscht bennen es?
6Kaun eena eene Trompeet enne Staut blosen,
onen daut sikj wäa oppräacht?
Woat eene Staut Schoden lieden,
wan de Har daut nich jebrocht haft? #Jes 45,7; Kloag 3,37
7Gott de Har deit nuscht
onen daut hee siene Profeeten sajcht,
wuarom hee daut deit. #1Mo 18,17
8De Leiw haft jebrelt,
wäa wudd nich angst haben?
Gott de Har haft jerät,
wäa kaun sikj dan trigjhoolen?
9Sajcht en de Schutzstäda
en Aschdod un en Ägipten:
Sajcht see sellen aula komen
no de Boaj rom Samaria,
un seenen woo hunjsch daut toojeit
un woo ojjerajcht see doa sent.
10Dee vestonen nich daut rajchte to doonen.
Dit lot junt vom Harn jesajcht sennen.
Dee kleiwen sikj toop waut see kjennen,
un wan derch stälen un Jewault.
11Un doawäajen, sajcht Gott de Har:
Dit Launt woat vom Fient besat woaren,
un jun Schutz woat to nuscht woaren;
un june Paulausten woaren bestolen woaren.
12De Har sajcht:
Krakjt soo aus een Hoad
mau twee Knoakes un een haulwet Ua,
ut däm Leiw siene Frät raden kaun,
soo woaren mau weinich von Samaria
met daut Läwen doavon komen,
un met een Brat von äa Badstäd
un eene Akj von de wieekje Benkj.
13Horcht emol häa, un woarnt Jakob siene Nokomen,
Gott de Har, de Gott dee aules rejieet, sajcht:
14Aun dän Dach wan ekj Israel fa äare Sinden bestrof,
woa ekj de Aultoaren en Betel dolbräakjen,
un de Akjspetzen von de Aultoaren em Drakj faulen loten.
15Ekj woa daut Wintahus un daut Sommahus dolrieten,
soo aus de groote Hiesa met Aulfenbeen;
kjeen Paulaust woat wieda bestonen.
Dit lot junt vom Harn jesajcht sennen. #1Kjen 22,39; Psa 45,9
Currently Selected:
Amos 3: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.