Amos 5
5
Woarnungen un Kroagen
1Nu horcht no dit Trualeet, jie Israeliten,
daut ekj wäajen junt sinj.
2De Mejal Israel es jefollen
un woat nich wada oppstonen.
See es en äa Launt jefollen,
un doch es doa kjeena waut ar halpt.
3Un nu sajcht Gott de Har to daut Volkj Israel:
Von de Staut wua 1.000 Soldoten rutjinjen,
woaren mau 100 trigjkomen;
un dee waut 100 em Kjrich schekjt
woat mau 10 trigjkjrieen.
4Un nu sajcht de Har,
to daut Volkj Israel:
Bemieecht junt, daut jie mie finjen;
dan woa jie läwen. #Jer 29,13
5Got nich no Betel ooda Gilgal,
un got nich no Beerscheba,
wiels Gilgal woat onbedinjt
faustjenomen un wajchjefieet woaren,
un Betel woat enne Grunt jebrocht woaren. #Hos 4,15; Amos 4,4
6Bemieecht junt däm Harn to finjen,
dan woa jie läwen.
Aundasch woat hee äwa Josef siene Nokomen
soo äwa rollen aus een Stapfia,
waut kjeena hoolen kaun,
un Betel woat dolbrennen.
7Soo aus jie nom rajcht seenen, moakt eenem betta,
un jie schlapen jerajcht sennen em Blott. #Jes 5,20; Amos 6,12
8De Har muak daut Säwenstiern un Orion,
hee vejajcht zemorjes de Nacht
un zeowes dän Dach;
hee roopt daut Wota vom Mäa,
un jitt daut opp daut Launt.
Sien Nomen es Har. #Hiob 38,31; Amos 9,6
9Wäa brinjt daut vedoawen opp de stoakje,
soo daut de dikje Mieren kjeenem waut halpen?
10See horchen nich no däm Rechta biem Puat,
un veachten däm, dee de Woarheit sajcht. #Jes 29,21
11Wiels jie de oame utnutzen
un an moakt een Poat von äare Arnt aufjäwen,
woa jie nich en de Hiesa wonen,
dee jie von Steen jebut haben;
un jie woaren nich dän Wien to drinkjen kjrieen,
von de schmocke Wiengoades, dee jie aunjelajcht haben. #Zef 1,13
12Ekj weet woo foaken jie junt veschulcht haben,
un woo groff june Sind es.
Jie vefoljen opprechtje Menschen,
jie nämen Schmäajelt,
un jie vedreien de Kloag
von däm oamen em Jerecht.
13Wäa Ensecht haft,
blift en soone Tiet stell,
wiels daut es eene beese Tiet.
14Bemieecht junt met goodet doonen,
un hieet met daut schlajchte opp,
dan woa jie läwen.
Dan woat de Har, de Gott, dee aules rejieet,
met junt sennen, soo aus jie nu meenen.
15Stalt junt jäajen daut beese,
un räakjent daut goode väl.
Moakt secha, daut wan jie rechten,
daut jie daut rajchte doonen.
Veleicht woat de Har,
de Gott, dee aules rejieet,
noch jenstich sennen,
met dee waut von Josef siene Nokomen äwabliewen. #Psa 34,15; Reema 12,9
16Doawäajen sajcht de Har,
de Gott, dee aules rejieet, jun Har:
Opp aule Gaussen woaren see truaren,
opp jieda Wajch woaren see, “Oba nä!” sajen.
See woaren däm Foarma kroagen toom truaren,
un toom hielen, wäa bloos daut Trualeet kaun.
17En aule Wiengoades woaren see hielen,
wan ekj mank junt komen woa.
Dit lot junt vom Harn jesajcht sennen.
18Woo woat junt daut gonen,
dee jie junt däm Harn sienen Dach wenschen?
Wuarom wensch jie junt däm Harn sienen Dach?
Dee Dach woat diesta sennen, nich dach. #(18-20) Joel 2,11
19Daut woat sennen,
aus wan eena vom Leiw rant
un eenen Boa bejäajent;
aus wan eena en een Hus nenn jeit
un sikj doa aun eene Waunt länt,
un dan woat von eene Schlang jebäten.
20Gaunz secha, woat däm Harn sien Dach
diesta sennen, un nich dach,
stock diesta onen irjent eenen schien.
21De Har sajcht:
Mie äakjlen june Fasta.
Mie freien june iernste Vesaumlungen nich. #Jes 1,11-15
22Wan jie mie uk Brauntopfa brinjen
ooda jun Jeträajdopfa stalen,
woa ekj dee nich aunnämen.
Ekj well daut Opfa
von jemaste Kjalwa
nich mea seenen. #Micha 6,6-7
23Hieet opp met june lude Leeda;
ekj well june Hoap nich mea aunhieren.
24Lot jun nom rajcht seenen
soo rollen aus Wota,
un jun jerajcht sennen
aus een Riefa, dee nienich utdrieecht.
25Brocht jie Israeliten Opfa
en dee 40 Joa enne Wiltnis? #(25 un 26) Jer 7,22-23; Apost 7,42-43
26Druag jie doa Jetta,
dee jie selfst jemoakt hauden?
Haud jie doa Sakut, jun Kjennich,
un Kewan, dän Stiern Gott?
27Doawäajen woa ekj junt bat hinja Damaskus
aus faustjenomne wajchleiden.
Dit lot junt vom Harn jesajcht sennen.
Sien Nomen es, de Gott, dee aules rejieet.
Currently Selected:
Amos 5: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.