Amos 9
9
Gott sien Jerecht
1Un dan wees Gott mie emol, daut hee äwa däm Aultoa stunt, un hee säd: Schlo bowen opp de Past, soo daut de Grunt scheddat, un soo daut an aula daut Koppstekj en Bieta oppem Kopp felt. Dee waut dan noch jebläwen sent, woa ekj met daut Schwieet ombrinjen. Kjeena von an woat wajchranen, un nich eena woat wajchkomen.
2Wan see sikj unjen bie de Doodes vegrowen
woat miene Haunt an doch von doa holen;
un wan see huach enne Loft nopp krupen
woa ekj an von doa rauf steeten. #Hiob 26,6; Psa 139,8
3Wan see sikj bowen oppem Karmel Boajch vestäakjen,
woa ekj dee doa sieekjen un rauf brinjen;
un wan see sikj unjen em Mäa von mie vestäakjen,
woa ekj de Schlang sajen daut dee an bitt.
4Un wan see faustjenomen woaren,
un ver äare Fiend wajch jeleit woaren,
dan woa ekj an doa met daut Schwieet ombrinjen.
Mien Plon es an schoden auntodoonen,
un nich an goodet to doonen. #Jer 44,11
5Wan Gott, de Har, dee aules rejieet,
dee Ieed aunschieet, scheddat dee,
un aule Menschen doabowen woaren truarich;
un daut gaunze häft sikj aus de Niel Riefa,
un lajcht sikj soo aus de Riefa en Ägipten. #Amos 8,8
6Hee but siene Stowen huach em Himmel
un stalt dän Foot oppe Ieed;
hee roopt daut Wota em Mäa,
un jitt daut oppe Ieed.
Hee heet Har. #Psa 104,3; Amos 5,8
7Sent jie Israeliten mie mea wieet aus de Lied von Kusch? frajcht de Har.
Ekj brocht junt Israeliten ut Ägipten rut,
un ekj brocht Filista ut Kaftor rut un de Aramäa ut Kir. #5Mo 7,7; Jer 47,4
8Horcht emol. Gott de Har recht siene Uagen no daut sintelje Rikj,
doaropp daut hee daut von de Ieed utrot,
wan hee Jakob siene Nokomen uk nich gaunz utroden woat.
Dit lot junt vom Harn jesajcht sennen.
9Paus opp. Ekj woa daut Wuat jäwen,
un de ojjerajchte bestrofen;
de Israeliten woaren mank de Velkja vestreit woaren,
soo aus wan eena met een Säw scheddat
un kjeen Steen oppe Ieed felt.
10Aule Sinda von mien Volkj woaren unja daut Schwieet omkomen,
aul dee waut sajen: De schoden woat woll nich bat ons komen un ons trafen. #Amos 6,3
De Har woat Israel wada enwartlen loten
11Un aun dän Dach, woa ekj dee,
dee von David siene Nokomen jebläwen sent, opphäwen,
un an von Grunt opp trajchthalpen,
un de Famieljes oppbuen soo aus dee emol wieren. #1Kjen 12,19; Apost 15,16-17
12Dan sellen see rejieren, äwa daut waut von Edom jebläwen es,
un von de aundre Lenda, dee däm Harn jehieeden.
Dit lot junt vom Harn jesajcht sennen,
dee dit utfieren woat.
13Paust opp, sajcht de Har.
De Dach woat komen,
wua dee waut toopläsen,
nich woaren foadich sennen,
ea de Plieeja kjemt,
un jie woaren noch Wiendruwen veoabeiden,
wan daut Tiet toom seien es.
De Boaj woaren scheenen Wien kjwidren,
un de läaje Boaj woaren sea väl Jeträajd jäwen. #3Mo 26,5; Joel 4,18
14Ekj woa mien Volkj Israel wada häastalen.
Ekj woa de vedorwne Städa
oppbuen un bewonen loten.
See woaren wada Wiendruwen aunplaunten,
un dän Wien loten scheen schmakjen.
See woaren Goades plaunten,
un von daut Jreens äten. #5Mo 30,3; Jes 65,21
15Ekj well an en äa Launt enwartlen,
daut see nich mea rutjebrocht woaren
von daut Launt, woont ekj an jejäft hab,
sajcht de Har jun Gott.
Currently Selected:
Amos 9: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.