5. Mose 8
8
Denkjt woo goot Gott es
1Jie sellen oppaussen daut jie aul dise Jesazen hoolen, dee ekj junt vondoag jäw, soo daut jie läwen un toonämen kjennen, un daut jie daut Launt, woont de Har june Vodasch opp een Eit vesproaken haft, ennämen un junt moaken kjennen. 2Denkjt doaraun woo de Har jun Gott junt dee 40 Joa opp de lange Reis derch de Wiltnis leid. Hee jeef junt schwoare Erfoarungen, un proowd junt auf. Hee wull junt deemootich moaken, daut hee seenen kunn waut vonne Enstalunk jie hauden, un auf jie wudden siene Jebooten hoolen. #1Mo 22,1; 2Mo 16,4; 20,20; 5Mo 13,4; Rech 2,22 3Hee leet junt hungrich woaren un dan jeef hee junt Mauna to äten, soont aus jie un june Menschen noch nienich ea jejäten hauden. Hee deed dit om junt to wiesen, daut eena nich bloos von Broot läft, oba daut eena sikj opp aules veloten kaun, waut de Har sajcht. #2Mo 16,13-15; Mat 4,4 4Un en dise 40 Joa sent june Kjleeda nich vebrukt worden, un june Feet sent nich schlemm jeworden. #5Mo 29,4 5Denkjt doaraun, daut de Har jun Gott junt strofen un trajchtwiesen deit, soo aus een Voda sien Kjint belieet. #Jes 28,26; Jer 30,11; 46,28 6Dan doot nu waut de Har jun Gott junt jesajcht haft. Hoolt de Jesazen un jehorcht dee. 7De Har jun Gott brinjt junt en een goodet Launt nenn, een Launt daut Riefasch haft un Kjwalen, soo daut daut Wota enne Boaj un enne Täla rant. 8Daut es een Launt woont Weit un Joascht, Wiendruwen, Fiejen, Apel, Oliewen un Honnich drajcht. 9Daut es een Launt wua jie nienich hungren woaren, ooda en Noot sennen woaren. Daut es een Launt wua jie Iesa en de Steena finjen woaren, un wua jie Koppa en de Boaj mienen kjennen. 10Jie woaren jenuach haben toom saut äten, un jie woaren däm Harn junen Gott lowen fa daut goode Launt, daut hee junt jejäft haft.
11Paust sea opp daut jie däm Harn junen Gott nich vejäten. Siet flietich siene Jesazen un Väaschreften to hoolen dee ekj junt vondoag jäw. 12Wan jie ieescht aules to äten haben waut junt jankat un jie junt haben goode Hiesa jebut un en dee wonen, 13un wan jie Vee un Schop un Selwa un Golt un aundre Sachen toopjesaumelt haben, 14dan paust sea opp, daut jie junt nich stolt doonen un däm Harn junen Gott vejäten woaren. Daut wia hee, dee junt haft ut Ägipten, ut de Sklowarie, rut jebrocht. 15Hee leid junt derch dee groote un framde Wiltnis, wua doa de jeftje Schlangen un jeftje Spanden wieren. Un en dee drieeje Jäajent, wua schia nich eene Lakj Wota to finjen es, muak hee Wota utem hoaden Steen komen, daut jie toom brucken hauden. #2Mo 17,6; 4Mo 21,6 16Un enne Wiltnis jeef hee junt Mauna to äten, soont aus june Menschen noch nienich jekjant hauden. De Har schekjt soone schwoare Tieden om junt deemootich to moaken un junt auftoproowen, soo daut junt daut oppe Lenjd kunn goot gonen. 17Denkjt nienich daut jie junt met june ieejne Krauft haben rikj jemoakt. 18Hoolt däm Harn junen Gott em denkj; daut es hee, waut junt de Krauft jeft rikj to woaren. Un hee deit daut wiels hee vondoag noch dän Bunt helt, woonen hee june Vodasch opp een Eit vespruak. #5Mo 4,31
19Vejät däm Harn junen Gott nienich, un got nienich no aundre Jetta, om dee to deenen un auntobäden. Wan jie daut wudden, daut kaun ekj junt vondoag secha sajen, dan woa jie omjebrocht woaren. 20Wan jie däm Harn nich jehorchen woaren, dan woat hee junt ombrinjen, krakjt soo aus hee dee Velkja venichten woat, wua jie nu nengonen.
Currently Selected:
5. Mose 8: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.