2. Mose 39

De Kjleeda fa de Priesta

(2Mo 28,1-43)

1Dan worden Kjleeda jemoakt von jewowne bleiwe, bleiwroode un kloa roode Woll fa de Priesta enne Heilje Stow. See muaken de jeweide Kjleeda fa Aaron, jrod soo aus Moses daut vom Harn jekjräajen haud. 2See muaken dän Efod von Golt, von bleiwe, bleiwroode un kloa roode Woll un von goodet jesponnenet Lienzeich. 3See klopten Golt plaut to denne Flekja un schneeden doavon Dräd, om dee sea krakjt en de bleiwe, bleiwroode un kloa roode Woll un daut goode jesponnene Lienzeich nentoneien. 4See muaken de twee Schullasträmels un neiden de unjaschte Enja doa naun. 5See brukten von daut selwje Golt, Woll un Lienzeich om daut Gortsträmel to moaken, krakjt soo aus de Har Moses daut jesajcht haud.

6See schnizten de Nomes von Israel siene Säns en twee Onniks Steena, un saden de Steena jieda en eenen goldnen Raunt. 7Eent von dise Steena wort dan opp jieda Schulla von däm Efod aunjemoakt, Israel siene Säns toom Aunjedenkj. Dit wia soo aus de Har Moses daut jesajcht haud.

8Daut Broststekj toom unjascheeden wort uk von soone Oabeida jemoakt, waut krakjte Oabeit doonen kunnen, un wort uk von Golt, von bleiwe, bleiwroode un kloa roode Woll un von goodet jesponnenet Lienzeich jemoakt. 9Daut wia eene veakauntje Fupp, 25 Zentimeeta delenjd jieda Sied, 10un haud vea Rieej kostboare Steena von väaren. Enne ieeschte Rieej wieren een Sarder, een Topas, un een Smaracht, 11en de tweede Rieej een Rubin, een Safier un een Diamaunt, 12en de dredde Rieej een Linkurer, een Achat un een Ametist, 13un en de vieede Rieej een Turkis, een Onniks, un een Jaspies. Een jieda Steen wia en eenen goldnen Raunt nenjemoakt. 14De twalf Steena hauden jieda eenen von de Nomes von Israel siene Säns, soo aus de twalw Stam sent, doa nenjeschnizt. 15See muaken jeflochtne Kjäden fa daut Broststekj von reinet Golt. 16Wieda muaken see twee goldne Eesen, eene fa jieda Schulla, un twee goldne Rinj, dee aun de bowaschte Akjen vom Broststekj kjeemen. 17See muaken de goldne Kjäden aun de Rinj aum Broststekj naun, 18un de aundre Enja von de Kjäden aun de Eesen oppe Schulren. 19See muaken uk twee goldne Rinj, un muaken dee aun de unjaschte Akjen von daut Broststekj gaunz dicht aum Efod aun. 20Noch twee goldne Rinj muaken see aun daut unjaschte Enj vom Schulla Strämel, dicht biem Soom von daut fein jewowne Gort. 21Dan bungen see eenen bleiwen Baunt derch de goldne Rinj aum Broststekj un no de goldne Rinj aum Gortsträmel vom Efod, soo daut daut Broststekj nich frie schoklen kunn. Aul dit wia krakjt soo aus Moses daut vom Harn jekjräajen haud.

22See muaken dän Rock, dee unja däm Efod kjeem. Dee wort gaunz von jewowne bleiwe Woll jemoakt. 23Daut Haulsloch aun däm Rock haud eenen Baunt doabennen, daut et nich soo leicht enrieten wudd. 24Runtom, aum unjaschten Raunt worden Mostasch von Apel utjeneit met bleiwe, bleiwroode un kloa roode Woll un goodet jesponnenet Lienzeich. 25Tweschen de Apel wort jiedatsmol een goldna Kjlinja aunjeneit, 26soo daut doa emma een Aupel un een Kjlinja wieren, runtom dän Rock, soo aus de Har Moses jesajcht haud. De Rock wia toom em Heilichtum deenen. 27See muaken lange Mauntels von goodet jewownet Lienzeich. Dise wieren fa Aaron un siene Säns. 28See brukten uk daut goode Lienzeich toom de Koppbinj moaken, un de Metzen un Unjabekjsen. 29Dän Gort wäwden see von daut Lienzeich un bleiwe, bleiwroode un kloa roode Woll en schmocke Mostasch, soo aus de Har Moses jesajcht haud.

30Aun daut Strämel rom däm Kopp muaken see eene heilje Plot von reinet Golt met de Wieed: “Däm Harn jeweit”, doabowen. De Wieed wieren oppligjent, aus aun een Stampel, un bewees Macht. #2Mo 29,6; 3Mo 8,9 31De Plot wort met eenen bleiwen Baunt aun de Koppbinj doabowa naun jemoakt, jrod soo aus de Har Moses daut jesajcht haud.

De Oabeit woat foadich

(2Mo 35,10-19)

32Soo verechten see aule Oabeit aun de Heilje Woninj, daut Vesaumlungszelt. De Israeliten deeden aules, krakjt soo aus de Har Moses daut jesajcht haud. 33Un see brochten de foadje Heilje Woninj no Moses, daut Zelt un aules waut doatoo jehieed, de Hoakes, de Stendasch, de Dwäastekja, Past un Feet, 34de Dakj von roode Bock Ladasch, de Dakj von Seekoo Ladasch, un de Gardien toom ver daut Aulaheilichste, 35de Kjist met de Jebooten met siene Droagstangen, un daut Veseenungsdakjsel, 36dän Desch met daut waut doatoo jehieet, un daut jeweide Broot, 37dän Laumpenhoola von reinet Golt met de Laumpen un daut Toobehia fa däm Laumpenhoola un de Eelj, 38dän goldnen Aultoa, de Saulweelj, un dän scheenrikjenden Weiruak, un de Gardien fa däm Engank, 39dän bronsnen Aultoa, de bronsne Glootpaun doatoo, un de Droagstangen, daut Toobehia fa dän bronsnen Aultoa, de Wauschkomm un dän Foot doatoo, 40de Gardienen fa däm Hoff, de Past doatoo un de Feet, de Gardien toom Engank vom Hoff, aul de Strenj un de Zeltstekjels, un daut Toobehia fa de Heilje Woninj, daut Vesaumlungszelt, 41de jewowne Kjleeda fa de Tempeldeena, un de jeweide Kjleeda fa Aaron, däm Priesta, un siene Säns, dee Priesta wieren. 42De Israeliten deeden aules soo aus de Har Moses daut väajesajcht haud. 43Un Moses besach sikj aul de Oabeit, un aus hee aules krakjt soo funk aus de Har daut väajeschräwen haud, säd hee dän Säajen äwa daut.

Currently Selected:

2. Mose 39: PB

Highlight

Compare

Copy